مارات احمەتجانوۆ ق ر ىشكى ىستەر ءمينيسترى بولىپ تاعايىندالدى
«مارات مۇرات ۇلى احمەتجانوۆ قازاقستان رەسپۋبليكاسىنىڭ ىشكى ىستەر ءمينيسترى بولىپ تاعايىندالسىن، ول قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەتتىڭ) ءتوراعاسى لاۋازىمىنان بوساتىلسىن» دەپ جازىلعان ق ر پرەزيدەنتى قول قويعان جارلىقتا. احمەتجانوۆ مارات مۇرات ۇلى 1964 -جىلى 22-جەلتوقساندا دۇنيەگە كەلگەن. 1991 -جىلى ە. ا. بۋكەتوۆ اتىنداعى قاراعاندى مەملەكەتتىك ۋنيۆەرسيتەتىن بىتىرگەن، زاڭگەر.
ەڭبەك جولىن 1991 -جىلى تاعىلىمگەر قىزمەتىنەن باستاپ، كەيىن تەمىرتاۋ قالاسى پروكۋراتۋراسىنىڭ تەرگەۋشىسى بولىپ قىزمەت اتقارعان.
1993-1996 ج ج. - باس پروكۋراتۋرا جانىنداعى سىبايلاس جەمقورلىققا قارسى كۇرەس جونىندەگى ارنايى پروكۋراتۋرانىڭ اسا ماڭىزدى ىستەر جونىندەگى اعا تەرگەۋشىسى، باس پروكۋراتۋرانىڭ اسا قاۋىپتى قىلمىستاردى تەرگەۋ باسقارماسى ايماقتىق تەرگەۋشىلەر ءبولىمىنىڭ باستىعى.
1996-1997 ج ج. - مەملەكەتتىك تەرگەۋ كوميتەتىنىڭ اسا ءقاۋىپتى قىلمىستاردى تەرگەۋ باسقارماسىنىڭ ءبولىم باستىعى، مەملەكەتتىك تەرگەۋ كوميتەتىنىڭ اسكەري- تەرگەۋ دەپارتامەنتى تەرگەۋ باسقارماسىنىڭ باستىعى.
1997-1998 ج ج. - ىشكى ىستەر مينيسترلىگىنىڭ اسكەري- تەرگەۋ دەپارتامەنتى تەرگەۋ باسقارماسىنىڭ باستىعى.
1998-2001 ج ج. - تەرگەۋ دەپارتامەنتى ديرەكتورىنىڭ ورىنباسارى جانە ادىلەت مينيسترلىگىنىڭ سوت قاۋلىلارىن ورىنداۋ كوميتەتى ءتوراعاسىنىڭ ورىنباسارى.
2001-2003 ج ج. - باس پروكۋراتۋرانىڭ تەرگەۋ جانە انىقتاۋ ورگاندارىنداعى زاڭدىلىقتى قاداعالاۋ دەپارتامەنتىنىڭ باستىعى.
2003-2006 ج ج. - پاۆلودار وبلىسىنىڭ پروكۋرورى.
2006-2009 ج ج. - وڭتۇستىك قازاقستان وبلىسىنىڭ پروكۋرورى. 2009-2012 ج ج. – ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتوراعاسى. 2012-2014 ج ج. – ق ر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى.
2014-2016 ج ج. - اتىراۋ وبلىسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل دەپارتامەنتىنىڭ باسشىسى، اتىراۋ وبلىسى سىبايلاس جەمقورلىققا قارسى ءىس- قيمىل ۇلتتىق بيۋرو دەپارتامەنتىنىڭ باسشىسى.
2016-2021 ج ج. - قازاقستان رەسپۋبليكاسى باس پروكۋرورىنىڭ ورىنباسارى. 2021 -جىلدىڭ 16-ساۋىرىنەن باستاپ قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەتتىڭ) ءتوراعاسى بولدى.
«قۇرمەت» (2008) جانە IIدارەجەلى«داڭق» (2014) وردەندەرىمەن، «قازاقستان رەسپۋبليكاسىنىڭ تاۋەلسىزدىگىنە 10 جىل»، «قازاقستان كونستيتۋتسياسىنا 10 جىل»، «استانانىڭ 10 جىلدىعى» مەرەيتويلىق مەدالدارىمەن، «رەسەي فلوتىنا 300 جىل» ەستەلىك مەدالى جانە «ادميرال كۋزنەسوۆ» مەدالدارىمەن ماراپاتتالعان. وتباسىلىق جاعدايى: ۇيلەنگەن، ەكى بالا تاربيەلەپ وتىر.
