ءبىز الاش قايراتكەرلەرىنىڭ دارا جولىن باستى باعدار ەتىپ ۇستانامىز - ەرلان قارين

نۇر-سۇلتان. قازاقپارات - احمەت بايتۇرسىن ۇلى سياقتى جاسامپاز تۇلعالاردىڭ ەڭبەگى تاۋەلسىزدىك قۇندىلىقتارىمەن تىكەلەي استاسىپ جاتىر.

استاناداعى احمەت بايتۇرسىن ۇلىنىڭ 150 جىلدىعىنا ارنالعان حالىقارالىق عىلىمي-پراكتيكالىق كونفەرەنتسيادا ق ر مەملەكەتتىك حاتشىسى ەرلان قارين وسىنداي وي ايتتى، دەپ حابارلايدى قازاقپارات ءتىلشىسى.

«جيىرماسىنشى عاسىر باسىندا قازاق زيالىلارى ۇيىمداسىپ، حالقىنىڭ ازاتتىعى ءۇشىن كۇرەسكە شىققانى بارشاڭىزعا ءمالىم. احمەت بايتۇرسن ۇلى وسى كۇرەستە ءاليحان بوكەيحان، ءمىرجاقىپ دۋلات، جاقىپ اقبايەۆ سياقتى سەرىكتەرىمەن بىرگە ۇلتتىڭ كوشىن باستادى. احاڭ الاش قوزعالىسىنىڭ قارلىعاشى - قارقارالى قۇزىرحاتىن ۇيىمداستىردى. حالىقتى وياتقان «قىرىق مىسال»، «ماسا» پوەزيالىق جيناقتارىن شىعاردى، «ءتىل قۇرالدارىن» جازىپ، ەلدىڭ جاپپاي ساۋاتىن اشتى. ۇلتتى ءۇن جارياسى بولعان «قازاق» گازەتىنىڭ باس رەداكتورى بولدى. بۇل احاڭنىڭ ەلگە سىڭىرگەن ولشەۋسىز ەڭبەگىنىڭ ءبىر پاراسى عانا»، - دەدى مەملەكەتتىك حاتشى.

سونداي-اق، ول احمەت بايتۇرسىن ۇلى ءومىر سۇرگەن زامان - قازاقتىڭ جوعىن جوقتاپ، بارىن تۇگەندەگەن ءدۇبىرلى ءداۋىر دەپ ەسەپتەيتىنىن جەتكىزدى.

«حالقىمىز ءۇشىن اسا كۇردەلى كەزەڭدە ولار ناعىز ۇلت قايراتكەرى بولا ءبىلدى. الاش ارىستارى ءوز زامانداستارىنىڭ عانا ەمەس، كەيىنگى بارشا ۇرپاقتىڭ بويىنا ەل ءۇشىن ەمىرەنە ەڭبەك ەتۋگە دەگەن قۇلشىنىستى سىڭىرە الدى. قازىرگى تاۋەلسىزدىك ءداۋىرىنىڭ پەرزەنتتەرى سول تاعىلىممەن سۋسىنداپ كەلەدى. ءبىز الاش قايراتكەرلەرىنىڭ دارا جولىنان ونەگە الىپ قانا قويماي، ونى ءاردايىم باستى باعدار ەتىپ ۇستانامىز. ويتكەنى احاڭ سياقتى جاسامپاز تۇلعالاردىڭ ەڭبەگى تاۋەلسىزدىك قۇندىلىقتارىمەن تىكەلەي استاسىپ جاتىر»، - دەدى ەرلان قارين.

اۆتور: ەسىمجان ناقتىباي