مەملەكەت باسشىسى مىسىر پرەزيدەنتى ابدەل فاتتاح اس-سيسيمەن تەلەفون ارقىلى سويلەستى

نۇر-سۇلتان. قازاقپارات - مىسىر تاراپىنىڭ باستاماسىمەن ۇيىمداستىرىلعان جوعارى دەڭگەيدەگى سۇحبات بارىسىندا مەملەكەتتەر باسشىلارى ەكىجاقتى قاتىناستاردىڭ قازىرگى جاعدايى مەن پەرسپەكتيۆالارىن تالقىلادى، دەپ حابارلايدى اقوردا.

قاسىم-جومارت توقايەۆ قازاق-مىسىر قاتىناستارىنىڭ تامىرى تەرەڭ بولعانىمەن، ەكى ەل اراسىنداعى زاماناۋي ديپلوماتيالىق قاتىناستاردىڭ ورناعانىنا بيىل 30 جىل عانا تولعانىن اتاپ ءوتتى.

وسى مەرزىم ىشىندە ەكىجاقتى ىنتىماقتاستىقتىڭ ءارتۇرلى سالاسى بويىنشا ءبىرقاتار جەتىستىكتەرگە قول جەتكىزىلدى.

دەگەنمەن، بۇگىنگى تاڭدا ەكى ەل اراسىنداعى بايلانىستارىنىڭ الەۋەتى تولىق پايدالانىلماي وتىرعانىنا نازار اۋدارعان قازاقستان پرەزيدەنتى مىسىر تاراپىن ساۋدا-ەكونوميكا سالاسىنداعى ىقپالداستىقتى دامىتۋعا شاقىردى.

سونىمەن قاتار، مەملەكەت باسشىسى قاڭتار وقيعالارىنا قاتىستى الاڭداۋشىلىق تانىتىپ، نيەتتەستىك بىلدىرگەنى ءۇشىن ابدەل فاتتاح اس-سيسي مەن مىسىر حالقىنا العىسىن جەتكىزدى. قاسىم-جومارت توقايەۆ ەلىمىزدەگى جاعدايدىڭ تۇراقتالعانىن اتاپ ءوتىپ، الەۋمەتتىك-ەكونوميكالىق قايتا قۇرۋدىڭ جاڭا ستراتەگياسىن جۇزەگە اسىرۋ شارالارى قابىلدانعانىنا توقتالدى.

پرەزيدەنتتىڭ ايتۋىنشا، قازاقستان حالقى بولاشاققا نىق سەنىممەن قارايدى. سۇحبات سوڭىندا مەملەكەت باسشىسى مىسىر پرەزيدەنتىن قازاقستانعا وزىنە قولايلى مەرزىمدە ساپارمەن كەلۋگە شاقىردى.