جەكە تۇلعانىڭ بانكروتتىعى تۋرالى زاڭنىڭ قانداستارعا قاتىسى بار ما

نۇر- سۇلتان. قازاقپارات - مەملەكەتتىك كىرىستەر كوميتەتى جەكە تۇلعانىڭ بانكروتتىعى تۋرالى زاڭ جوباسىن كۇشىنە ەنگەننەن كەيىن دە جەتىلدىرۋدى ۇسىنىپ وتىر، دەپ حابارلايدى قازاقپارات ءتىلشىسى.

بۇل تۋرالى مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ ءمالىم ەتتى.

«زاڭ جوباسىنا ەنبەي قالعان وزگە دە ۇسىنىستار بار. سول ۇسىنىستار نەگىزىندە زاڭدى قولدانىس تارتىبىندە جەتىلدىرۋ كوزدەلىپ وتىر. اتاپ ايتساق، نەسيە بەرۋشىلەرگە سوت ارقىلى بانكروتتىق راسىمدەۋ باستاماسىن كوتەرۋگە مۇمكىندىك بەرۋ ۇسىنىلدى. سونداي- اق، اتالعان زاڭنىڭ كۇشىن شەتەلدىكتەرگە، قانداستارعا جانە قازاقستان اۋماعىندا تۇراقتى تۇراتىن تۇلعالارعا دا تاراتۋ قاجەت دەگەن پىكىرلەر بار. بانكروتتىعىن راسىمدەگەن جەكە تۇلعالارعا باسشىلىق لاۋازىم اتقارۋعا، اكسيونەرلىك زاڭدى تۇلعانىڭ قۇرىلتايشىسى بولۋعا تىيىم سالۋ جانە مەملەكەتتىك ورگانداردا جۇمىس ىستەۋگە شەكتەۋ قويۋ تۋرالى ۇسىنىستار بولدى. بۇلاردى زاڭ كۇشىنە ەنىپ، قولدانىسقا ەنگەن كەزدە تاجىريبەگە سۇيەنىپ، اسىقپاي قاراۋ كەرەك»، - دەدى كوميتەت ءتوراعاسىنىڭ ورىنباسارى.

زاڭ جوباسىن ازىرلەۋگە قاتىسقانداردىڭ اراسىندا نەسيە بەرۋشىلەرگە بورىشكەردىڭ وتباسى مۇشەلەرى تۋرالى اقپارات جيناۋعا رۇقسات بەرۋدى ۇسىنعاندار دا بولعان كورىنەدى.

«سونداي- اق، نەسيە بەرۋشىگە بانكروتتىعىن راسىمدەگەن جەكە تۇلعانىڭ وتباسى مۇشەلەرىنىڭ مۇلكى تۋرالى اقپاراتقا قول جەتكىزۋ مۇمكىندىگىن بەرۋ كەرەكتىگى ايتىلدى. ءبىز ازىرگە مۇنداي مۇمكىندىكتى قارجىلىق باسقارۋشىعا عانا بەرۋدى ۇسىنامىز. ءارى قارايعىسىن زاڭ كۇشىنە ەنگەن كەزدە كورۋ كەرەك»، - دەدى قايرات مياتوۆ.