پرەزيدەنت سينگاپۋردىڭ كومپانيالار توبىنىڭ باس باسقارۋشى ديرەكتورىن قابىلدادى
بۇل كومپانيا جوبالاۋ، قۇرىلىس، قۇرلىق پەن تەڭىز پورتتارىن باسقارۋ، سونداي- اق كولىك- لوگيستيكالىق، ساۋدا جانە كەدەن ۇدەرىستەرىن سيفرلاندىرۋ جۇمىستارىمەن اينالىسادى. PSA جەلىسىنىڭ 26 ەلدە 50-دەن استام فيليالى بار.
اڭگىمەلەسۋ بارىسىندا قازاقستاندا ءبىرقاتار ينۆەستيتسيالىق جوبانى جۇزەگە اسىرۋدىڭ پەرسپەكتيۆالارى تالقىلاندى. قاسىم- جومارت توقايەۆ قازاقستاننىڭ كولىك- لوگيستيكالىق جانە ينفراقۇرىلىمدىق الەۋەتىنە نازار اۋدارىپ، قىتاي - ەۋروپا ءدالىزى بويىنشا قۇرلىق ترانزيتتىك تاسىمالدىڭ 83 پايىزى ءبىزدىڭ ەلىمىز ارقىلى وتەتىنىن اتاپ ءوتتى.
ونىڭ ايتۋىنشا، PSA كومپانياسىنىڭ پورتتاردى باسقارۋ، لوگيستيكا جانە سيفرلاندىرۋ باعىتىنداعى تاجىريبەسى ەرەكشە قىزىعۋشىلىق تۋعىزادى.
تان چون مەن كەزدەسۋگە مۇمكىندىك بەرگەنى ءۇشىن مەملەكەت باسشىسىنا العىس ايتىپ، قازاقستان اۋماعىنداعى ءارتۇرلى كولىك- لوگيستيكالىق جوبالارعا ينۆەستيتسيا سالۋعا زور قىزىعۋشىلىق تانىتىپ وتىرعانىن مالىمدەدى. سونىمەن قاتار سينگاپۋرلىق بيزنەسمەن «قازاقستان تەمىر جولى» ۇلتتىق كومپانياسىمەن بىرلەسىپ، لوگيستيكالىق قىزمەت كورسەتۋ جانە سيفرلىق كولىك ءدالىزىن دامىتۋ، سونداي- اق سينگاپۋرلىق تاجىريبەگە نەگىزدەلگەن كەدەندىك راسىمدەردى ترانسفورماتسيالاۋ ءۇشىن ءوزارا ءتيىمدى ىنتىماقتاستىق ورناتۋعا دايىن ەكەنىن جەتكىزدى.
كومپانيانىڭ جوسپارىمەن تانىسقان قاسىم- جومارت توقايەۆ PSA كومپانياسىمەن اراداعى ىنتىماقتاستىقتىڭ دامۋىن باقىلاۋعا الاتىنىن جانە ءوزارا ءتيىمدى ناتيجە كۇتەتىنىن ايتتى. كەزدەسۋ بارىسىندا سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ جانە «قازاقستان تەمىر جولى» ۇلتتىق كومپانياسىنىڭ ءتوراعاسى نۇرلان ساۋرانبايەۆ PSA كومپانياسىمەن بىرلەسكەن جۇمىستاردىڭ پەرسپەكتيۆاسىنا قاتىستى ءوز ويلارىمەن ءبولىستى.
