«سامۇرىق-قازىنا» قورىن تۇبەگەيلى قايتا قۇرۋ ءجۇرىپ جاتىر - پرەزيدەنت

نۇر-سۇلتان. قازاقپارات - بۇدان بىلاي بارلىق جوبالار اشىق ءارى كونكۋرس نەگىزىندە حالىقارالىق كومپانيالاردىڭ قاتىسۋىمەن جۇزەگە اسىرىلاتىن بولادى.

بۇل تۋرالى ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ كەزەكتەن تىس وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.

قازاقستان پرەزيدەنتى باسەكەلەستىكتى دامىتۋ، سىبايلاس جەمقورلىقتى جويۋ، ءتيىمدى مەملەكەتتىك باسقارۋدى قۇرۋ جانە ساپالى ادامي كاپيتال قالىپتاستىرۋ كوزدەگەن ماقساتقا جەتكىزەتىن جول دەپ اتاپ ءوتتى.

وسىعان وراي مەملەكەت باسشىسى ءبىرقاتار وزەكتى مىندەتكە نازار اۋداردى.

اتاپ ايتقاندا، پرەزيدەنت ءادىل ءارى بەيتاراپ سوت جۇيەسى عانا قۋاتتى ەكونوميكا مەن لايىقتى بيزنەس-كليمات قۇرۋدىڭ نەگىزى ەكەنىنە توقتالدى. ينۆەستورلاردىڭ زاڭدى مۇددەلەرى مەن قۇقىقتارىن قورعاۋدىڭ باستى كەپىلى ءدال وسى بولۋعا ءتيىس. مەملەكەت باسشىسى ينۆەستيتسيالىق داۋلاردى شەشۋ بويىنشا استانا حالىقارالىق قارجى ورتالىعى مەن حالىقارالىق اربيتراج ورتالىعىنىڭ الەۋەتىن تولىق پايدالانۋعا شاقىردى.

قاسىم-جومارت توقايەۆ ادال باسەكەلەستىكتى دامىتۋ ءىسىن جاڭا باعىتتىڭ تاعى ءبىر ماڭىزدى باسىمدىعى دەپ سانايدى.

«ەكونوميكانىڭ نەگىزگى سالالارىنداعى وليگوپوليالاردىڭ تاريحي ۇستەمدىگى نارىقتار مەن سالالاردىڭ دامۋىن تەجەيدى. بۇل جاعدايدى زاڭنامالىق جانە پراكتيكالىق تۇرعىدان باتىل وزگەرتەتىن بولامىز. بيىل قول قويىلعان باسەكەلەستىكتى دامىتۋ ماسەلەسى جونىندەگى زاڭدا ماڭىزدى باستامالار قاراستىرىلعان. بۇل - نارىق سۋبەكتىلەرىنىڭ شەكتەۋلى رەسۋستارعا قولجەتىمدىلىگى، نارىققا كىرۋ كەدەرگىلەرىن تومەندەتۋ جانە ارالاس نارىقتارعا مونوپوليانىڭ كەرى اسەرىن جويۋ. «سامۇرىق-قازىنا» قورىن تۇبەگەيلى قايتا قۇرۋ جۇمىستارى ءجۇرىپ جاتىر.

اكىمشىلىك رەسۋرستاردىڭ ەسەبىنەن تاپسىرىس العان كومپانيالار وزدەرىنىڭ ارتىقشىلىقتارى مەن كەلىسىم-شارتتارىنان ايرىلۋدا. قوردىڭ ينۆەستيتسيالىق جوبالارىنىڭ توپتاماسى - شامامەن 3,5 تريلليون تەڭگە. بۇدان بىلاي بارلىق جوبالار اشىق ءارى كونكۋرس نەگىزىندە حالىقارالىق كومپانيالاردىڭ قاتىسۋىمەن جۇزەگە اسىرىلاتىن بولادى. ەگەر، ولاي بولماي جاتسا، بىردەن ماعان تىكەلەي حابارلاڭىزدار. ويتكەنى بۇل - مەنىڭ پرەزيدەنتتىك قىزمەتىمدەگى اسا ماڭىزدى ءىس»، - دەدى قاسىم-جومارت توقايەۆ.

جيىنعا پرەزيدەنت اكىمشىلىگىنىڭ باسشىلىعى، ۇكىمەت مۇشەلەرى، مەملەكەتتىك ورگانداردىڭ وكىلدەرى، ءىرى ترانسۇلتتىق جانە ۇلتتىق كومپانيالاردىڭ جەتەكشىلەرى قاتىستى. كەزدەسۋگە قاتىسۋشىلار ادامي كاپيتالدى كۇشەيتۋگە، ەكونوميكا مەن ينۆەستيتسيالىق ساياساتقا ەكولوگيالىق، الەۋمەتتىك جانە كورپوراتيۆتىك باسقارۋدىڭ ستاندارتتارىن ەنگىزۋگە باسا ءمان بەرە وتىرىپ، ەلىمىزدىڭ ينۆەستيتسيالىق تارتىمدىلىعىن جاقسارتۋ جونىندە ءبىرقاتار ۇسىنىس ايتتى.