مينيستر: قۇرىلىس نارىعىن ساباسىنا تۇسىرەمىز

نۇر-سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ قۇرىلىس نارىعىنداعى سۇرانىس پەن ۇسىنىستىڭ تەڭگەرىمىن قالاي رەتتەيتىنىن ءتۇسىندىردى، دەپ حابارلايدى قازاقپارات ءتىلشىسى.

«وكىنىشكە قاراي، قولدانىستاعى مەملەكەتتىك ساتىپ الۋ جۇيەسى بويىنشا ءبىز كەز كەلگەن قاتىسۋشىنى قانداي دا ءبىر كونكۋرسقا قاتىسۋعا جىبەرۋدەن باس تارتا المايمىز. مىسالى ءىرى كومپانيا اقتاۋداعى جول قۇرىلىسىنىڭ كونكۋرسىن جەڭىپ الادى. ءبىراق ولاردىڭ سول جاققا كۇش جۇمىلدىرىپ جاتقانىن كورە بەرمەيمىز. ياعني، وسى جاقتان بۇكىل تەحنيكاسىن اپارىپ اۋرە بولمايدى. سول جەردەگى تەحنيكانى، ادامداردى جالداي باستايدى. سوندىقتان جەرگىلىكتى قۇرىسشىلارعا الدەقايدا تەڭ مۇمكىندىك بەرۋ ءۇشىن «ەگەر ءىرى نىساننىڭ تەندەرىنە قاتىسساڭ، سول جەردە ءوز تەحنيكاڭ مەن ادامدارىڭ بولسىن» دەگەن تالاپ قويماقشىمىز. ءبىز وسىنداي جولمەن جۇرەمىز. ياعني، بىرەۋدى سوزبەن كوندىرەيىك دەپ وتىرعان جوقپىز. مونوپوليزاتسياعا جول بەرمەۋ ءۇشىن جانە بىرەۋلەردىڭ نارىقتا ۇستەمدىك ەتۋىن بولدىرماۋ ءۇشىن جۇيەلى شارالار قابىلدايمىز»، - دەدى قايىربەك وسكەنبايەۆ.

سونداي-اق، ول بيىل باسپانا نارىعىنا بىلتىرعىداي ينۆەستيسيا بولماۋى مۇمكىن ەكەنىن ايتتى. «بىلتىر زەينەتاقى جيناعىنداعى شەكتى مولشەردەن ارتىلعان سومانى باسپانا ماسەلەسىنە جۇمساۋعا رۇقسات بەرىلگەن كەزدە ءبىر مەزەتتە نارىققا اقشا قۇيىلدى. بيىل ونداي بولمايدى. ءبىز جىل سايىن شامامەن 2 ميلليون شارشى مەتر باسپانا ءوسىمىن قامتاماسىز ەتىپ كەلەمىز. ءبىراق قۇرىلىس يندۋسترياسى بۇل قارقىنعا ىلەسە الماي جاتىر. ينجەنەرلىك كوممۋنيكاتسيا دا ۇلگەرمەي جاتىر. ويتكەنى جىلۋ، ەنەرگيا جەلىلەرىن كەڭەيتۋ ءۇشىن قوسىمشا ۋاقىت كەرەك. ولار ءبىر جىلدىڭ ىشىندە قۋاتتى 20-30 پايىز كوتەرە المايدى. سوندىقتان مەملەكەت باسشىسى قۇرىلىس يندۋسترياسى مەن ينفراقۇرىلىمنىڭ قولىنداعى قۋاتتى قازىرگى كولەممەن تەڭەستىرىپ الۋ تۋرالى مىندەت قويدى. قازىر تالداۋ جۇرگىزىپ جاتىرمىز. قۇرىلىس نارىعىن ءسال- ءپال ساباسىنا تۇسىرەتىن شىعارمىز»، - دەدى مينيستر.