امەريكالىقتار اسىراپ العان قازاق بالاسىنىڭ وقيعاسى
بۇل جونىندە Kazakh tv اقپارات بەرەدى.
مەن ميچيگان شتاتىنىڭ گراند- راپيس قالاسىندا ءوستىم. ميچيگاننىڭ شەتكى ايماقتارىندا جيحاز شىعاراتىن ەڭ ۇلكەن زاۋىتتار ورنالاسقان. مەنىڭ بالالىق شاعىم ادەتتەگىدەي ءوتتى: فۋتبول مەن باسكەتبول وينادىم، دوستارىممەن ءجيى كوڭىل كوتەرەتىنمىن، ال جازدا وتباسىم دەمالىس الاتىن. بالا كەزىمدە مەن قازاقستاندىق بالالارمەن ارالاسا المادىم. رەسەيدەن بالا اسىراپ العان وتباسىمەن ءبىزدىڭ وتباسىمىز جاقسى ارالاستى. جانە مەنىڭ ەكى تۋىس باۋىرلارىمدى رەسەيدەن اسىراپ العان. اينالامدا قازاقستاندىق ەشكىم بولعان جوق.
ۋنيۆەرسيتەتتە وقىپ جۇرگەنىمدە، ءوز ءومىرىم جايلى تولىق بىلگىم كەلدى، نەگە مەنىڭ ءتۇرىمنىڭ باسقالاردان وزگەشە ەكەنىن انىقتاعىم كەلدى. مەن ۋاقىتىمنىڭ كوبىن وتباسىما ارناپ ۇيرەنگەنمىن. سەبەبى مەنى سولاي تاربيەلەدى. اتا- انام مەنىڭ بىلىمىمە ءاردايىم كوڭىل ءبولىپ وتىراتىن. ازيالىق ەكەنىمە قاراماستان، مەنى ادامداردىڭ بولگەنىن، مەن جايلى اڭگىمە ايتقاندارىن، كەمسىتكەندەرىن بايقاعان ەمەسپىن. امەريكالىق زامانداستارىمنان ءوزىمدى باسقاشا دەپ ەسەپتەمەدىم.
ا ق ش - مادەنيەتتەرىنىڭ سان الۋاندىعىمەن ەرەكشەلەنەتىن مەملەكەت، ءبىراق مەنىڭ قالام كىشكەنتاي بولدى. مۇمكىن، مەنى ازيالىق، قىتاي نەمەسە جاپون دەپ ويلاعاندار دا بولعان شىعار. ادامدار نەنى ساتتىلىك دەپ سانايتىنىن ءتۇسىنۋ ءۇشىن، مەن ولاردىڭ ءىس- ارەكەتتەرىن ءاردايىم باقىلاپ جۇرەتىنمىن. سوندىقتان، اتا- اناما ماعان بەرگەن تاربيەسى ءۇشىن العىسىمدى ايتامىن: ولار ماعان ومىرگە تۋرا كوزبەن قاراۋدى، سونداي- اق، بۇل ومىردە ەڭ ماڭىزدى نارسە - جيناقىلىق، ادالدىق، تاپقىرلىق جانە راقىمىدىلىق ەكەنىن ۇيرەتتى. جىلدار وتكەن سايىن ولار ايتقان ءاربىر ءسوزدىڭ ماعىناسىن ءتۇسىنىپ كەلەمىن. ەگەر مەن قانداي دا ءبىر جەتىستىككە جەتەتىن بولسام، اتا- انامنىڭ تاربيەسىنىڭ ارقاسىندا بولاتىن ەدى.
ءجيى ساياحاتتاۋعا شىعاتىنمىن، جاڭا اشىلۋلارعا ءمان بەرىپ جۇرەمىن. ميچيگەن ۋنيۆەرسيتەتىنىڭ، مامانداندىرىلعان رەزيدەنتتى «Global Scholars Program» پروگراماماسى بويىنشا باكالاۆرياتتا وقىدىم. 2-كۋرستان سوڭ ومىرگە دەگەن كوزقاراسىمنىڭ وزگەرۋىنە سەپتىگىن تيگىزگەن Grameen بانكىندە تاجىريبەدەن ءوتتىم. اۋىلدا بولىپ، جاعدايى تومەن مۇقتاج وتباسىلارعا كومەگىمدى تيگىزدىم. ءسويتىپ، ءوز بيسنەسىمدى باستاۋدى قولعا الدىم. مەن مادەني ءىس- شارالارعا ءجيى قاتىسىپ تۇرۋعا قىزىعاتىنمىن. ءبىر جىگىتپەن گونكونگتا تۇردىم، ءوز ەلىنىڭ مادەنيەتىمەن بولىسۋگە دايىن ستۋدەنتتەرمەن جاقىنىراق ارالاستىم.
جالپى، تەرەڭ ويلاۋعا جانە سىني- پىكىرلەر قالىپتاستىرا الاتىنداي جاقسى ءبىلىم الدىم دەپ ايتا الامىن. قازاقستانعا كەلگەنىمدە مەنى بىردەن ءوز ادامدارىنداي قارسى الدى. امستەردامداعى Schiphol اۋەجايىنان الماتى اۋەجايىنا قونعانىمدا، تەرمينال ىزدەپ ۇزاق ءجۇردىم. ىزدەۋ بارىسىندا ءتۇر- الپەتى ماعان ۇقسايتىن ادامداردى بايقادىم. ولارمەن ورىس تىلىندە ەندى تىلدەسە باستاعىنىمدا، ءوزىمدى جايلى سەزىنىپ، بىردەن اشىلا كەتتىم. قالا تاڭداۋ بارىسىندا مەن الماتى قالاسىنا توقتالدىم. رۇقسات الۋ ءۇشىن وقۋ ورىندارىنىڭ ستۋدەنتتەرىن ازيانىڭ ءتۇرلى ايماقتارىنا جىبەرەتىن پرينستون باعدارلاماسىنىڭ ارتىنان 15 اي بويى جۇگىرۋگە تۋرا كەلدى. ەندى، مىنە، مادەنيەتى مۇلدەم تاڭسىق كورىنگەن قازاقستانعا كەلۋ مۇمكىندىگى بۇيىرعانىنا وتە قۋانىشتىمىن. الماتىعا كەلگەن بويدا، ەڭ ءبىرىنشى كاسىپكەرلىك جانە شىعارماشىلىق جوبالارعا كوڭىل اۋداردىم. قازاقستان از ۋاقىت ىشىندە تالاي بەلەستەرگە كوز جەتكىزگەنىن بايقادىم. مەن ەكى ەلدىڭ دە (ا ق ش، قازاقستان) ءوسىپ- وركەندەۋىنە ۇلەسىمدى قوسقىم كەلەدى.
قازاقستانعا ساپار شەككەنىم ءوزىمنىڭ قازاق ەكەنىمدى سەزدىردى. ءوز تاجىريبەلەرىمەن، مادەنيەتىمەن بولىسەتىن دوستارمەن تانىستىم. ەلدىڭ جاڭالىقتارىن باقىلاپ وتىرۋ ءۇشىن جاڭالىقتاردى ۇنەمى وقىپ وتىرامىن. قازاقستان جەرىندە ءوزىمدى قوناق رەتىندە ەمەس، ەلدىڭ تۇرعىنى رەتىندە سەزىنە باستادىم. بولاشاقتا، الەم ءۇشىن ماڭىزدى ىسپەن اينالسقىم كەلەدى. ءومىر - بۋمەرانگ. قازىر نەمەن اينالىسىپ جۇرسەڭىز، بولاشاقتا ءبارى وزىڭىزگە قايتىپ كەلەدى. الەم ءۇشىن پايدالى ءىس جاساۋ - جارقىن بولاشاقتىڭ كەپىلى. مەن جارقىن بولاشاقتى كوزدەيمىن.
اۋدارعان: گۇلىم جاقان
«قامشى» سىلتەيدى. 2017
