تەرگەۋ يزولياتورلارىنداعى باقىلاۋدى ەكى ەسە كۇشەيتتىك - مەيرام ايۋبايەۆ

نۇر-سۇلتان. قازاقپارات - ەلىمىزدە تەرگەۋ يزولياتورلارىنداعى باقىلاۋ ەكى ەسە كۇشەيتىلدى.

بۇل تۋرالى ق ر قىلمىستىق- اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆ ايتتى، دەپ حابارلايدى قازاقپارات ءتىلشىسى.

«باسىم مىندەتتەرىمىزدىڭ ءبىرى - ول قۇقىققا قارسى ءىس-ارەكەتتەردىڭ كەز كەلگەن ءتۇرىن جويۋ. زاڭنامادا بۇنداي ارەكەتتەرگە قىلمىستىق جاۋاپتىلىق كوزدەلگەن. قازاقستان بۇزۋشىلىقتاردىڭ، ونىڭ ىشىندە قاتىگەز، ار-نامىستى قورلايتىن جانە ءومىر مەن دەنساۋلىققا قاۋىپتى ارەكەتتەردىڭ الدىن الۋ بويىنشا حالىقارالىق مىندەتتەمەلەردى الدى. قازاقستان زاڭناماسى «نەلسون ماندەلا ەرەجەلەرى» دەپ اتالاتىن تۇتقىندارعا قاتىستى مينيمالدى ستاندارتتى ەرەجەلەرگە سايكەس كەلەدى. «قاڭتارداعى وقيعالارعا» بايلانىستى قاماۋعا الىنعان ازاماتتاردىڭ ۇستاۋ جاعدايلارىنا قوعامنىڭ نازارى ەرەكشە اۋعان كەزدە ءبىز تەرگەۋ يزولياتورلارىنداعى باقىلاۋدى ەكى ەسە كۇشەيتتىك. قوعامدىق مونيتورينگ جۇرگىزۋگە تولىق مۇمكىندىك بەردىك»، - دەدى ءتوراعا ورىنباسارى ىشكى ىستەر مينيسترلىگىنىڭ باسپا ءسوز قىزمەتى الاڭىندا وتكەن بريفينگىدە.

ونىڭ اتاپ وتۋىنشە، ق ا ج كوميتەتىنە قاراستى مەكەمەلەر جابىق سانالادى. سوندىقتان بۇل جايتا قىلمىستىق- اتقارۋ جۇيەسىنە دەگەن سەنبەۋشىلىكتى تۋدىرۋى مۇمكىن. وسىعان وراي كوميتەت اشىقتىقتى قامتاماسىز ەتۋ ماقساتىندا قوعامدىق-باقىلاۋ كوميسسيالارمەن، ۇكىمەتتىك ەمەس ۇيىمدارمەن بىرگە جۇمىس ىستەپ جاتىر. ولار قاماۋداعى ازاماتتاردىڭ قۇقىقتارى مەن ۇستاۋ جاعدايلارىنا تاۋەلسىز مونيتورينگ وتكىزەدى.

«ماسەلەن، ولار 13 تەرگەۋ يزولياتورىندا 60 تان استام رەت بولدى. مەكەمەلەردەگى بارلىق تۇرعىن، قىزمەتتىك، كوممۋنالدىق- تۇرمىستىق بولمەلەردى قوعام مۇشەلەرىنىڭ كوميسسياسى تەكسەرەدى. تەرگەۋ يزولياتورلارىنا تۇسكەن بارلىق ادامدار مىندەتتى تۇردە مەديتسينالىق تەكسەرۋدەن وتەدى»، - دەدى ول.

ونىڭ دەرەگىنشە، ادام قۇقىقتارى جونىندەگى ۋاكىل ەلۆيرا ءازىموۆا، «ادام قۇقىقتارى ءۇشىن حارتيا» قوعامدىق قورىنىڭ باسشىسى جەمىس تۇرماعامبەتوۆا باستاعان كوميسسيا قوعام مۇشەلەرىمەن جانە ادۆوكاتتارمەن بىرگە تەرگەۋ يزولياتورلارىندا ۇستاۋ جاعدايلارىن تەكسەردى. ولار 6 وڭىردە تەرگەۋگە قامالعان 100-دەن استام ادامدى قابىلدادى.

«سونداي-اق، ۇستاۋ جاعدايلارىن ءماجىلىس، ءماسليحات دەپۋتاتتارى مەن جەرگىلىكتى اتقارۋشى ورگاندار تەكسەردى. وسى كەزدەسۋلەردىڭ ناتيجەسىندە مەكەمە اكىمشىلىگىنە شاعىمدار تۇسكەن جوق»، - دەدى مەيرام ايۋبايەۆ.