«مەنى توقايەۆقا قوسىڭىز»: توتەنشە جاعدايدا جەدەل جەلىگە قانداي سۇراقتار كەلىپ ءتۇستى - پسيحولوگپەن سۇحبات
وسى ورايدا قازاقپارات ءتىلشىسى قاڭتار وقيعاسى كەزىندە قازاقستاندىقتارعا قانداي قولداۋ قاجەت بولدى جانە كومەكتىڭ قالاي كورسەتىلگەنى تۋرالى زارينا كەنجەكارمەن اڭگىمەلەسكەن ەدى.
«ءوزىم - 4 بالانىڭ اناسىمىن. ۇيدە تۋعان اعام مەن جەڭگەم - اسكەري قىزمەتشىلەر. جاپپاي تارتىپسىزدىكتەر كەزىندە ەلدە قانداي جاعداي بولعانىن ءبارىمىز بىلەمىز. ءبىزدىڭ ۇيدە دە كۇتپەگەن جاعداي بولدى. سەبەبى اعام مەن جەڭگەم قىزمەت بابىمەن 5 كۇن ۇيدە بولمادى. ۇيدە انام، مەن جانە بالا- شاعا عانا قالدىق. سول ساتتە ارىپتەسىم جەدەل پسيحولوگيالىق قولداۋ كورسەتۋ ورتالىعى قۇرىلىپ جاتىر دەپ ماعان جۇمىس ىستەۋدى ۇسىندى. ويلانا كەلە، توتەنشە جاعدايدا از دا بولسا ەلگە پايدام ءتيسىن دەپ، ۆولونتەر رەتىندە جۇمىس ىستەۋگە كەلىستىم»، - دەدى زارينا كەنجەكار.
ونىڭ ايتۋىنشا، توتەنشە جاعداي كەزىندە 2 ءتۇن بويى جەدەل جەلىگە حابارلاسقان جاندارعا پسيحولوگيالىق كومەك كورسەتكەن. سول 2 ءتۇننىڭ ىشىندە ءبىراز جاننىڭ جانايقايىن ەستىپ، قولداۋ بىلدىرگەن.
«تۇنگى اۋىسىمدا جۇمىس ىستەۋگە كەلىسكەن سەبەبىم - كۇندىز بالالارىمنىڭ تاربيەسىمەن اينالىستىم. توتەنشە جاعداي كەزىندە 1414 جەدەل جەلىسىنە تۇرعىندار ءتۇرلى سۇراقتارمەن حابارلاستى. نەگىزىنەن ونلاين فورماتتا، ياعني تەلەفون ارقىلى پسيحولوگيالىق قولداۋ كورسەتتىك. ءبىراق قاجەت جاعدايدا جۇزدەسىپ، ماسەلەنى بەتپە- بەت قاراۋ مۇمكىندىگى دە بولدى. قوڭىراۋ ەلىمىزدىڭ بارلىق وڭىرىنەن كەلىپ ءتۇستى. دەگەنمەن كوبىنەسە الماتى، شىمكەنت جانە قىزىلوردا تۇرعىندارى حابارلاستى. كەلىپ تۇسكەن سۇراقتار مەن ماسەلەلەر ءارتۇرلى بولدى. شىنى كەرەك، كەي ادامدار جەدەل جەلىگە نە ءۇشىن حابارلاسقانىن دا ايتا الماي جاتتى. ەلدە كۇتپەگەن جاعداي بولعاندىقتان ادامداردىڭ ساسىپ قالعانى دا تۇسىنىكتى. قاراپايىم حالىقتىڭ كاسىبي تۇردە پسيحولوگتىڭ كومەگىنە جۇگىنە قويمايتىنى بايقالدى»، - دەيدى ول.
ماماننىڭ سوزىنشە، جەدەل جەلىگە حابارلاسقان جانداردىڭ دەنى مۇڭىن تىڭداۋدى وتىنگەن. ولار ءۇشىن سول ساتتە جان دۇنيەسىمەن ءبولىسۋ ماڭىزدى بولعان.
«حابارلاسقان جاندار ىشكى دۇنيەسىن اقتاردى، ارينە، مەن ولاردى تىڭدادىم. سونىمەن قاتار، جاپپاي تارتىپسىزدىكتەر كەزىندە جاقىنىن جوعالتقاندار ءجيى حابارلاستى. مىسالى، الماتى تۇرعىنى «قاسكەلەڭدە تۇراتىن ءىنىم حابار- وشارسىز كەتتى، قايدا ەكەنىن بىلمەيمىن» دەپ كومەك سۇرادى. ارينە، قازىر ايتۋعا وڭاي، ءبىراق سول ساتتە اۋىر ءتيدى.
سەبەبى، ول كىسى تۋعان باۋىرىنىڭ ءولى- ءتىرىسىن بىلمەي، امال جوقتىعىنان بىزگە حابارلاسىپ تۇر. تاعى ءبىر تۇرعىن تالعاردان قوڭىراۋ شالدى. ونىڭ ايتۋىنشا، ءوزى 3 بالانىڭ اكەسى ەكەن، ايەلى بالا كۇتىمىمەن ۇيدە وتىر. ول جاپپاي تارتىپسىزدىكتەردىڭ سالدارىنان جۇمىسسىز قالعان. وتباسىن اسىراۋ كەرەك، نە ىستەرىن بىلمەي بىزگە جۇمىس تاۋىپ بەرىڭىزدەرشى دەپ كومەك سۇرادى. ودان بولەك، 2 بالانىڭ اناسى، جالعىزباستى ايەل حابارلاستى. ول الماتىنىڭ ورتالىعىندا تۇرادى ەكەن، ۇيىندە ازىق- تۇلىك بىتكەن، سىرتقا شىعۋ - قاۋىپتى. ءوزىم ءۇشىن ەمەس، بالالارىمدى ۋايىمدادىم دەيدى»، - دەپ ەسكە الدى مامان.
سونداي-اق، پسيحولوگ ورتالىققا كەلىپ تۇسكەن سۇراقتار مەن وتىنىشتەردىڭ اياسى كەڭ ەكەنىن ايتتى. زارينا كەنجەكار تۇنگى ساعات 22:00-دەن تاڭعى ساعات 07:00 ارالىعىندا جەلىدە بولىپ، حابارلاسقان جاندارعا پسيحولوگيالىق قولداۋ كورسەتكەن. «مەنى توقايەۆقا قوسىڭىز» دەپ حابارلاسقان ازامات تا بولدى. كەيىن انىقتالعانداي، ول ەگدە جاستاعى كىسى بولىپ شىقتى، پرەزيدەنتكە ايتاتىن كەڭەسىم بار دەيدى. تاعى ءبىر جاعداي، تۇندە قىز بالا حابارلاسىپ، «شىلىم تارتقىم كەلىپ تۇر» دەيدى.
تەمەكىسى ءبىتىپ قالعان، سىرتقا شىعايىن دەسە - كومەندانتتىق ساعات. ايتا بەرسەم، وقيعالار جەتىپ جاتىر. جەدەل جەلىگە بىرەۋ شىنىمەن ۇلكەن پروبلەماسىمەن، نە ىستەرىن بىلمەي حابارلاسىپ جاتسا، بىرەۋلەردە كەرىسىنشە بولدى»، - دەيدى مامان.
پسيحولوگ اڭگىمە سوڭىندا قانداي جاعداي بولماسىن مامان رەتىندە قولداۋ كورسەتۋ مىندەتى ەكەنىن ايتتى.
«جالپى پسيحولوگيادا ءار جاعدايعا بايلانىستى قولداناتىن ارنايى ءادىس-ءتاسىل بار. ءوز باسىم توتەنشە جاعداي كەزىندە حابارلاسقان جاندارمەن گەشتالت جانە ترانساكتىلىك تالداۋ مەتوديكاسى ارقىلى جۇمىس ىستەدىم. نەگىزى مەنىڭ پسيحولوگياداعى جۇمىس باعىتىم - ەركەك پەن ايەل، اتا- انا مەن بالا قارىم-قاتىناسى، سونداي-اق 12 جاستان اسقان جاسوسپىرىمدەرمەن جۇمىس ىستەيمىن» - دەدى ز. كەنجەكار.
اۆتور: ءالي يبرايەۆ
