ازىق-تۇلىك باعاسى، ينفلياتسيا، كورسەتىلەتىن قىزمەتتەر قۇنى قانشالىقتى ءوستى - ۇلتتىق بانك مالىمەتتەرى
باسپا ءسوز قىزمەتىنىڭ مالىمەتتەرىنە قاراعاندا، ازىق-تۇلىك جانە ازىق-تۇلىك ەمەس ينفلياتسيا 2021 -جىلعى جەلتوقسان دەڭگەيىندە ساقتالدى. اقىلى قىزمەتتەر ينفلياتسياسى تۇرعىن ءۇيدى جالداۋ قۇنىنىڭ نەعۇرلىم جوعارى ءوسۋى اياسىندا جەدەلدەدى. 2022 -جىلعى قاڭتاردا تۇتىنۋ باعالارى 0,7 پايىزعا ءوستى، جىلدىق ماندە باعانىڭ ءوسۋى 8,5 پايىزعا دەيىن جەدەلدەدى (2021 -جىلعى جەلتوقساندا-8,4 پايىز). ازىق- تۇلىك تاۋارلارى باعاسىنىڭ جىلدىق ءوسۋى وتكەن جىلعى جەلتوقسان دەڭگەيىندە ساقتالىپ، 9,9 پايىزدى قۇرادى. 2022 -جىلدىڭ قاڭتارىندا نان ونىمدەرى مەن جارما، جەمىستەر مەن كوكونىستەر توبىندا باعانىڭ ءوسۋى بايقالدى.
الەمدىك نارىقتارداعى باعانىڭ نەعۇرلىم قالىپتى ءوسۋى اياسىندا قانت باعاسىنىڭ ءوسۋى باياۋلادى. 2022 -جىلعى قاڭتارداعى ازىق- تۇلىك ەمەس تاۋارلار باعاسىنىڭ جىلدىق ءوسۋ قارقىنى دا بۇرىنعى دەڭگەيدە (8,5 پايىز) ساقتالدى. سۇرانىستىڭ ارتۋى جانە كومپونەنتتەردىڭ، اتاپ ايتقاندا ميكروسحەمالاردىڭ الەمدىك تاپشىلىعى اياسىندا اۆتوموبيلدەر باعاسىنىڭ ءوسۋى جەدەلدەدى. سونىمەن قاتار، 2022 -جىلدىڭ قاڭتارىندا يمپورتتىق باعانىڭ وسۋىنە بايلانىستى ءدارى- دارمەكتەردىڭ قىمباتتاۋى بايقالدى.
2022 -جىلدىڭ قاڭتارىندا بەنزين، ديزەل وتىنى، سۇيىتىلعان گاز باعاسى تومەندەدى، بۇل وسى تاۋارلار باعاسىنىڭ جىلدىق ءوسۋ قارقىنىنىڭ باياۋلاۋىنا ىقپال ەتتى. وسىلايشا ازىق- تۇلىك ەمەس تاۋارلاردىڭ بارلىق توبى باعاسىنىڭ جىلدىق ءوسۋىن شەكتەدى. اقىلى قىزمەتتەردىڭ جىلدىق ينفلياتسياسى 2022 -جىلعى قاڭتاردا 6,8 پايىزعا دەيىن جەدەلدەدى (2021 -جىلعى جەلتوقسان - 6,5 پايىزعا ءوسۋ).
اباتتاندىرىلعان تۇرعىن ءۇيدى جالعا الۋ باعاسى سۇرانىستىڭ جوعارى بولۋىنا بايلانىستى وسە ءتۇستى. 2022 -جىلدىڭ قاڭتارىندا امبۋلاتوريالىق قىزمەتتەردىڭ قىمباتتاۋى بايقالدى. 2022 -جىلعى قاڭتاردا رەتتەلەتىن كوممۋنالدىق قىزمەتتەر باتىس قازاقستان وبلىسىندا ەلەكتر ەنەرگياسىنىڭ قىمباتتاۋى اياسىندا ازداپ قىمباتتادى. رەتتەلەتىن قىزمەتتەردىڭ قالعان تۇرلەرىنىڭ باعاسى 2022 -جىلعى قاڭتاردا وزگەرگەن جوق.
وڭدەۋ ونەركاسىبى مەن اۋىل شارۋاشىلىعىندا باعا ءوسىمى ءبىرشاما باياۋلاپ، 2022 -جىلعى قاڭتاردا وڭدەۋشى ونەركاسىپتەگى وندىرۋشىلەر باعاسىنىڭ ەل ىشىندە ساتىلاتىن ءونىم باعاسىنىڭ ءوسىمى 17,5 پايىزعا دەيىن (2021 -جىلعى جەلتوقساندا - 18,4 پايىز) باياۋلادى. ازىق-تۇلىك ءوندىرۋشى كاسىپورىندار اراسىندا ماي، توڭ ماي جانە قانت ءوندىرىسى باعاسىنىڭ ءوسۋى ايتارلىقتاي باياۋلادى. ەكىنشى جاعىنان، بيدايدىڭ ءالسىز شىعىمدىلىعى اياسىندا نان-توقاش جانە ماكارون ونىمدەرىن وندىرۋشىلەردىڭ، سونداي-اق مال ازىقتىق داقىلدارىنىڭ قىمباتتاۋىنا بايلانىستى ەت پەن ءسۇت ونىمدەرىنىڭ باعاسى ازداپ ءوستى.
اۋىل شارۋاشىلىعىندا 2022 -جىلعى قاڭتاردا وندىرۋشىلەر باعاسىنىڭ ءوسىمى 16,9 پايىزعا دەيىن باياۋلادى (2021 -جىلعى جەلتوقساندا - 17,3 پايىزعا ءوستى) . وسىمدىك شارۋاشىلىعىندا بيداي، ارپا، جۇگەرى جانە مال ازىقتىق داقىلدارى باعاسىنىڭ ءوسۋى قارقىن الا ءتۇستى. مال شارۋاشىلىعى ونىمدەرىنىڭ اراسىندا شيكى ءسۇت باعاسىنىڭ ءوسۋى باياۋلادى جانە جۇمىرتقا وندىرۋشىلەردىڭ باعاسى تومەندەدى.
