اقىن بولعىڭ كەلسە، ريمدى ورتە
التى كۇن بويى ريم ءتىلسىز جاۋدىڭ ورتاسىندا جاتتى. وعان قوسا، بۇل وقيعا 64 -جىلدىڭ شىلىڭگىر شىلدە ايىنىڭ 18-جۇلدىزىندا، تۇندە بولعان. ىستىق الاپ پەن قىزىل الاۋدىڭ اسەرىنەن ريم كوگى القىزىل تۇسكە بويالعان ەكەن. ورتتە قالعانى بار، دەنەسىنە وت تيمەسە دە، وتتا جانعالى تۇرعان دۇنيەسىن جيناعانى بار - تۇرعىنداردىڭ ءبارى شىڭعىرىپ، وت قۇرساۋىنان شىعا الماعان. ناتيجەسىندە مىڭداعان ادام مەرت بولعان. اينالدىرعان التى كۇننىڭ ىشىندە قاسيەتتى (ءوز كەزىندە) ريم يمپەرياسىنىڭ استاناسى كۇلگە اينالعان.
ءسانى مەن سالتاناتى جاراسقان سارايلار، عيباداتحانالار مەن كىتاپحانالار، ريم تاريحىنداعى يمپەراتورلار مەن ريم ميفىندەگى قۇدايلار ەسكەرتكىشتەرىنىڭ دە كۇلى كوككە ۇشقانى - سول كەزدە. وسى كەزەڭ تۋرالى گەنريك سەنكيەۆيچ اتتى جازۋشى «كامو گريادەشي؟» دەگەن رومان جازعان. ونىڭ دەرەككوزىندە اۆگۋست پاتشانىڭ شوبەرەسى نەرون 64 -جىلعى ءورت كەزىندە بيلىك ەتكەن. نەرون - اۆگۋستتىڭ نەمەرەسى اگريپپيننىڭ بالاسى. ال ونىڭ ءسۇيىپ قوسىلعان بەسىنشى جارى كلاۆديا كۇيەۋىن (اگريپپيندى) ۋ بەرىپ ءولتىرىپ، تاققا ۇلى نەروندى وتىرعىزادى. ەس بىلمەي جاتىپ، وسىنداي قاتىگەزدىكتى كورگەن نەرون قايتپەك؟ ليون فەيحتۆانگەر ەسىمدى نەمىس جازۋشىسى «لجەنەرون» دەپ اتالاتىن رومانىندا پاتشانىڭ قالانى ورتەۋ سەبەبى بىلاي بەرىلەدى.
پاتشا نەرون كەدەيلىكتى جەك كورگەن، قالانىڭ قۋىس كوشەلەرىن، ونى مەكەن ەتەتىن جارلىلاردىڭ كوزىن جويعىسى كەلەتىن دەيدى. شىرىگەن كوكونىستەر مەن اشىپ كەتكەن ەتتەرگە داۋلاسقان ساۋداگەرلەردى كورىپ، تار كوشەنى باسىنا كوتەرە اڭىراپ كەلە جاتقان ەسەكتەردىڭ داۋسىن ەستىگەن ول ارام وي ويلايدى. وسى كورىنىستىڭ كەمشىلىگىن وزىنەن ەمەس، سول ادامداردان كورىپ، ولاردى ورتەپ جازالاۋدى دۇرىس دەپ تابادى. ءبىراق نە ءۇشىن؟ ارينە، بۇل - كوركەم شىعارماداعى اۆتوردىڭ ءوز ويى. ال ەجەلگى ريم جازۋشىسى گاي سۆەتوني «12 تسەزاردىڭ ءومىرى» اتتى كىتابىندا ريم تاريحىنداعى نەروندى وتانىن سۇيمەگەن، حالقىن اياماعان زالىم پاتشا رەتىندە كورسەتەدى. ول بىرەۋدىڭ «مەن ولگەندە جەر وتقا ورانسىن!» دەگەنىن قۇپتاماي، «جوق، مەن كوزىمنىڭ تىرىسىندە دە جەردى ورتەي الامىن!» دەپ ءوز دەگەنىن جاسادى دەيدى.
بۇعان تاعى ءبىر سەبەپ، نەرون ءوزىنىڭ اقىندىعىن تانىتۋ ءۇشىن، تانۋ ءۇشىن، رەاليستىك وقيعاعا نەگىزدەلگەن شىن تۋىندى جازۋ ءۇشىن قالاعا وت تاستاعان. ال پاتشا ءوزى مەتسەنات مۇناراسىنا شىعىپ، ۇستىنە ادەمى كيىمىن كيىپ، «ترويا كۇيرەۋى» اتتى ولەڭدى تومەندەگى حالىقتىڭ جان ايقايىنا قاراماستان وقىعان. جانىپ تۇرعان وتتان ءلاززات نە شابىت العان بولۋى كەرەك، قول استىنداعى جاۋىنگەرلەرىنىڭ جانۇياسى ورتتەن شىعا الماي جاتقان كەزدە دە، ولاردى جىبەرمەي، وعان قول شاپالاقتاپ تۇرۋدى بۇيىرعان. كىناسىنەن جالتارۋ ءۇشىن حريستيانداردى كۇدىكتى دەپ جازالاعان ەكەن.
ءبىر دەرەكتەردە نەرون شىدامسىز اناسى، قولىنان ءىس كەلمەيتىن جارى، كوڭىلدەسىنىڭ قىزعانشاق كۇيەۋى ءۇشىن ءوز سارايىن ورتەيمىن دەپ، بايقاۋسىزدا ءبۇتىن قالانى ورتەگەن دەسەدى. ءورت باسىلعان سوڭ، نەرون كورشى قالاعا كەتكەن. ەلگە جاڭا قالانىڭ نوبايىن جاساپ، ساۋلەت قۇرىلىستارىنىڭ ۇلگىسىن سىزىپ قايتقان... «ورنىندا بار وڭالار» دەگەنى بولار، ءبىراق قاي دەرەكتى الساق تا، بۇل ريم تاريحىندا بۇرىن- سوڭدى بولماعان، ادام قولىنان جاسالعان اپات. وسىنداي تاريحتاعى ەسسىز پاتشالاردى بىلەسىز بە؟
Massaget.kz
