وقۋ جىلى ۇزارتىلا ما؟ ءبىلىم مينيسترلىگى جاۋاپ بەردى
بۇل تۋرالى مينيسترلىكتىڭ باسپا ءسوز قىزمەتى اقپارات تاراتتى، دەپ جازادى Egemen.kz.
«وسىعان دەيىن 2021 -جىلعى تامىز كەڭەسىنىڭ قورىتىندىسى بويىنشا مينيسترلىك ى. التىنسارين اتىنداعى ۇلتتىق ءبىلىم بەرۋ اكادەمياسىنا وقۋشىلاردىڭ جۇكتەمەسىن ازايتۋ شارالارىنا قاتىستى، ءتيىمدى وقۋ جىلىنىڭ ۇزاقتىعىن انىقتاۋ، ءبىلىم بەرۋ ۇيىمدارىندا ەڭبەكاقى تولەۋدىڭ ساعاتتىق جۇيەسى مەن جانە جالاقىنىڭ ارتىقشىلىقتارىن، ۇلگىلىك وقۋ باعدارلامالارىن جاڭارتۋ جونىندە ءبىرقاتار زەرتتەۋلەر جۇرگىزۋدى تاپسىرعان بولاتىن»، دەلىنگەن حابارلامادا.
بۇل رەتتە ناقتى شەشىم قابىلداۋ جانە پيلوتتىق تۇردە جۇرگىزۋ ءۇشىن زەرتتەۋلەردى اياقتاۋ كەرەك.
«سوندىقتان بارلىق ءبىلىم بەرۋ ۇيىمدارى مەنشىك نىسانىنا قاراماستان مەملەكەتتىك جالپىعا مىندەتتى ستاندارتتى ساقتاۋعا مىندەتتى. جاڭا جوبالاردى ەنگىزۋ كەزىندە دالەلدەمەلەرمەن جانە الدىن الا تالقىلاۋمەن بەكىتىلگەن عىلىمي ءتاسىل ماڭىزدى دەپ سانايمىز. ءبىلىم جانە عىلىم مينيسترلىگى ءۇشىن وقۋشىلار مەن ستۋدەنتتەردىڭ مۇددەلەرى ءبىرىنشى كەزەكتە تۇرادى»، دەدى ۆەدومستۆو.
