جاڭا قازاقستان دەپۋتاتتىق توبى قۇرىلادى
«قاڭتار ايىنىڭ باسىندا ەلىمىز بۇرىن سوڭدى بولماعان قيىن جاعدايدى باسىنان وتكىزدى. قازاقستانعا قاستىق ويلاعان ىشكى جانە سىرتقى جاۋلار مەملەكەتىمىزدىڭ شاڭىراعىن شايقاپ، كەرەگەسىن سوككىلەرى كەلدى. وپاسىز ەكسترەميستىك توپتاردىڭ ارەكەتىنەن باۋىرلارىمىزدىڭ قانى توگىلدى، ازاماتتارىمىز اۋىر جاراقاتتار الدى، مەملەكەتتىك جانە كاسىپكەرلەرىك نىساندارعا جانە مۇلىكتەرگە نۇقسان كەلدى. حالىقتىڭ سابىرلىعى مەن اۋىزبىرشىلىگىنىڭ، پرەزيدەنتىمىز قاسىم- جومارت كەمەل ۇلى توقايەۆتىڭ تاباندىلىعى، قايسارلىعى جانە رەسپۋبليكاعا، كونستيتۋتسيالىق قۇرىلىمعا قارۋمەن قارسى شىققان سودىرلار مەن بانديتتەردى جويۋ جونىندەگى جاۋاپتى شەشىمىنىڭ ارقاسىندا، مەملەكەتتىڭ ەگەمەندىگى جانە تۇراقتىلىعى ساقتالىپ قالدى. بۇل جاعداي كەزدەيسوق بولعان جوق. ەلىمىزدە كوپتەن بەرى قوردالانىپ، ادىلەتسىزدىك پەن جەمقورلىقتىڭ كەسىرىنەن شەشىمىن تاپپاعان الەۋمەتتىك- ەكونوميكالىق ماسەلەلەر وقيعانىڭ تۇتانۋىنا سەبەپشى بولدى»، - دەپ توقتالدى ە. جاڭبىرشين.
وسى ورايدا ول قاڭتار وقيعاسى ءبارىمىز ءۇشىن ۇلكەن ساباق بولۋى كەرەك ەكەنىن اتاپ ءوتتى. ونىڭ العىشارتتارى - قوعام مەن بيلىكتىڭ شىنايى تازارۋى، اقيقاتتىڭ اشىق ايتىلۋى، قاتەلىكتەردىڭ مويىندالۋى، مەملەكەتتىك اپپارات پەن قۇرىلىمداردىڭ وليگوپوليا وكىلدەرى مەن جەمقورلاردان تازارتىلۋى بولىپ وتىر.
«بۇنى، بۇگىن قوعام بەلسەندى تالقىلاپ جانە ونى مەملەكەت باسشىسى باتىل تۇردە ىسكە اسىرا باستادى. پرەزيدەنتىمىزدىڭ قازاقستاندى جاڭارتامىن، دۇرىس ارناعا بۇرامىن دەگەن اق نيەتى بار. ال، ءبىز، ەل بولىپ ونى ءبىراۋىزدان قولداۋىمىز قاجەت! وزدەرىڭىزگە ءمالىم قاڭتاردىڭ 11 - جۇلدىزىندا پرەزيدەنت پارلامەنت ءماجىلىسىنىڭ جانە كەشەگى ۇكىمەتتىڭ وتىرىسىندا ەلىمىزدە اتقارىلاتىن ءبىراز ماڭىزدى ماسەلەلەردى ايقىنداپ، ناقتى مىندەتتەردى قويدى. جالپى قوعام مەن مەملەكەت اراسىنداعى قارىم- قاتىناستا ترانسفورماتسيانىڭ قاجەتتىلىگى تۋىنداعانىن جانە «جاڭا قازاقستاندى» قۇرۋ تۋرالى قاسىم- جومارت كەمەل ۇلى قايتا- قايتا ايتىپ ءجۇر. مۇنداي كەشەندى ترانسفورماتسيا ەڭ الدىمەن پارلامەنت قىزمەتىندە ورىن الىپ، ءماجىلىس قابىرعاسىنان باستالۋى شارت!»، - دەدى دەپۋتات.
«سوندىقتان پارلامەنتتىڭ تومەنگى پالاتاسىنداعى جۇمىستاردى جاڭا دەڭگەيگە كوتەرىپ جانە پرەزيدەنتتىڭ تاپسىرمالارىن ءماجىلىس دەپۋتاتتارى تاراپىنان قاداعالاۋ ماقساتىندا «جاڭا قازاقستان» اتتى دەپۋتاتتىق توپتى قۇرۋدى، رەسمي تۇردە جاريالايمىز!
«جاڭا قازاقستان» دەپۋتاتتىق توبى قوعامداعى ەڭ وزەكتى ماسەلەلەردى دەر كەزىندە پارلامەنت تورىندە كوتەرىپ، تۇرعىنداردىڭ مۇڭ- مۇقتاجدارىن ۋاقىتىندا شەشىۋگە قىزمەت ەتەدى. ۇكىمەتپەن بىرلەسىپ حالىقتىڭ رۋحانياتىن كۇشەيتەتىن، ءال- اۋقاتىن جاقسارتاتىن زاڭ جوبالارىن دايىنداۋعا، سايلاۋشىلارىمىزبەن ودان ءارى تىعىز قارىم- قاتىناستار ورناتۋعا مۇددەلى.
«جاڭا قازاقستان» دەپۋتاتتىق توپتىڭ قوعامداعى بارلىق بەلسەندى ساياسي پارتيالارمەن، نارازى توپتارمەن، ۇكىمەتتىك ەمەس ۇيىمدارمەن جانە ساراپشىلارمەن قويان- قولتىق قىزمەت جاساۋعا ىنتالى جانە دايىن ەكەنىن ءمالىم ەتەمىز. قازاقتا «بىرلەسىپ كوتەرگەن جۇك جەڭىل» - دەگەن ءسوز بار! جاڭا قازاقستاننىڭ جۇگىن ۇلىس بولىپ بىرگە كوتەرەيىك! پرەزيدەنت باستاعان رەفورمالاردى سابوتاجعا جىبەرمەي، اياعىنا دەيىن جەتكىزەيىك! بارشاڭىزدى، ەلدىڭ ىرگەسىن نىعايتۋعا شاقىرامىز!»، - دەدى ەدىل جاڭبىرشين.
بۇل باستاماعا ءماجىلىستىڭ ءبىرقاتار دەپۋتاتى قولداۋ بىلدىرگەن.
اۆتور: رۋسلان عابباسوۆ
