قىتاي قۇراماسىنداعى كونكيشى اقنار اداق قىزى اكەسىنىڭ اماناتىمەن ۇلكەن سپورتقا ورالعان
اقنار اداق قىزى 1999 -جىلى شىڭجاڭ ولكەسى، قۇتىبي اۋدانىندا تۋعان. اقنار 5 جاسىنان باستاپ كونكي تەبەدى. وعان العاشقى كونكيىن اعاسى سىيلاپتى. ءدال وسى سىيلىق ونىڭ سپورتتىق ءومىرىنىڭ باستاماسىنا اينالادى. 10 جاسىندا سپورتقا دەگەن اۋەستىگىنە كاسىبي تۇردە قاراپ، جاتتىقتىرۋشىسىنىڭ باعىت- باعدارىمەن شۇعىلدانا باستايدى. كۇن سايىنعى تىنىمسىز ەڭبەك پەن تاباندى جاتتىعۋلار كوپ ۇزاماي ناتيجەسىن دە كورسەتەدى. اقنار شىڭجاڭداعى جاسوسپىرىمدەر اراسىنان ايرىقشا كوزگە تۇسەدى.
قىتايدىڭ اقپارات قۇرالدارى اقناردىڭ سپورتتاعى ومىرلىك جولى تۋرالى جارىسا جازۋدا. ول 2012 -جىلى اكەسىنىڭ اۋىر سىرقاتىنا بايلانىستى جاتتىعۋدى توقتاتۋعا ءماجبۇر بولىپتى. اكەسىنە قاراۋ ءۇشىن ءبىراز ۋاقىت ۇيدە وتىرىپ قالادى. قىزىنىڭ قابىلەتىن بىلەتىن اكەسىنە بۇل وڭاي تيمەيدى. ول قايتىس بولار الدىندا: «ءوزىڭ جاقسى كورەتىن ىسكە مىقتاپ دەن قويۋىڭ كەرەك جانە ءبىر نارسەگە كىرىسسەڭ بارىڭدى سال. مەن سەنىڭ ۇلتتىق قۇراما قاتارىنا قوسىلىپ، ۇزدىك سپورتشى بولا الاتىنىڭا سەنەمىن...» دەپ امانات ايتىپ كەتكەن.
اقنار اكەسىنىڭ بۇل سوزدەرىن ومىرلىك ۇستانىمىنا اينالدىرىپ، ءۇمىتىن اقتاۋدى ماقسات تۇتادى. ۋاقىتى مەن كۇش- جىگەرىن سارپ ەتىپ، 2014 -جىلى شىڭجاڭ قىسقى ويىندارىندا قاتارىنان 5 رەت چەمپيون اتانادى. ءسويتىپ، 15 جاسىندا رەسمي تۇردە شىڭجاڭ قۇراماسىنىڭ مۇشەلىگىنە ءوتىپ، ۇلتتىق جارىسقا قاتىسۋ قۇقىعىنا يە بولادى. ال 2016 -جىلى قىتايدىڭ ۇلتتىق قۇراماسىنا الىنادى. 2019 -جىلى ۇلتتىق قۇرامانىڭ ساپىندا جۇرگەن اقنار ەل ىشىندە جانە شەتەلدە وتكەن الامانداردا قاتارىنان 2 التىن، 4 كۇمىس جانە 1 قولا مەدال جەڭىپ الادى. بۇل كەزدە ول ءالى 20 عا دا تولماعان ەدى.
ال بىلتىرعى الەم چەمپيوناتىندا اقنار كونكيمەن جۇگىرۋدەن كوماندالىق جارىسقا قاتىسىپ، قىتايدىڭ قورجىنىنا قولا مەدال سالادى. 5-اقپاندا بەيجىڭدەگى قىسقى وليمپيادا ويىندارىندا ايەلدەر اراسىنداعى 3000 مەترگە كونكيمەن جۇگىرۋ جارىسىندا اقنار 4:12.28 ۋاقىتىمەن 17-ورىنعا يە بولدى. ويىننان كەيىن بەرگەن سۇحباتىندا قازاق قىزى بۇدان دا جوعارى ناتيجەلەردەن ءۇمىتتى ەكەنىن، ءالى دە شەبەرلىگىن شىڭداۋ ءۇشىن ايانباي ەڭبەك ەتەتىنىن جەتكىزدى.
اقنار ەندى 10-اقپان كۇنى ايەلدەر اراسىنداعى 1500 جانە 5000 مەترگە كونكيمەن جۇگىرۋ جارىسىندا دا باق سىناماق.
ەسكە سالساق، بەيجىڭدەگى XXIV قىسقى وليمپيادا ويىندارىندا قىتاي اتىنان ءۇش قانداسىمىز قاتىسۋدا.
اۆتور: مۇحتار مۇرات
