مەملەكەت باسشىسى «جاڭا قازاقستاننىڭ» باستى قۇندىلىقتارىن اتادى

نۇر- سۇلتان. قازاقپارات - ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا حالىققا ۇسىنىلىپ وتىرعان «جاڭا قازاقستان» ساياساتىنىڭ باسىم باعىتتارىن اتادى، دەپ حابارلايدى قازاقپارات ءتىلشىسى.

«جاڭا قازاقستاندى» قۇرۋ ءۇشىن ءادىل ءارى تۇسىنىكتى مەملەكەتتىك ساياسات جۇرگىزىلۋى كەرەك. بۇل ساياسات ساناسىز شەنەۋنىكتەردىڭ جونسىزدىگىنە جول بەرمەيدى. باسەكەگە جانە تەحنولوگياعا نەگىزدەلگەن ەكونوميكانى قالىپتاستىرادى. سونىمەن بىرگە جەكە مەنشىككە، ادامنىڭ قۇقىقتارى مەن بوستاندىعىنا قول سۇعىلماۋىنا زاڭ ۇستەمدىگى ارقىلى كەپىلدىك بەرەدى»، - دەدى مەملەكەت باسشىسى.

سونداي- اق، ق. توقايەۆ «جاڭا قازاقستاندى» قۇرۋعا ءار ازاماتتىڭ اتسالىسۋىن سۇرادى.

«بارلىق ازاماتتارعا بىردەي مۇمكىندىك جاسايتىن دا وسى ساياسات. اركىم قازاقستاننىڭ بولاشاعىنا جاۋاپتى ەكەنىن سەزىنىپ، ورتاق ىسكە ۇلەسىن قوسۋى كەرەك. جۇرت مەملەكەتتەن اشىق ءارى تۇسىنىكتى ساياسات جۇرگىزۋدى تالاپ ەتەدى. وسى تالاپقا ساي بولۋىمىز قاجەت»، - دەدى پرەزيدەنت.

«قازاقستان حالقىنا» قورىنا شەتەلدىك ينۆەستورلاردىڭ اقشا اۋدارۋى قۇپتالادى.

ق ر پرەزيدەنتى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا «قازاقستان حالقىنا» قورىنىڭ جۇمىسىنا توقتالدى.

«بيزنەستەن سالىقتىق ادالدىق پەن الەۋمەتتىك جاۋاپكەرشىلىك تالاپ ەتىلەدى. بۇل ءتاسىلدىڭ ءبىر كورىنىسى - «قازاقستان حالقىنا» بەرىلەتىن قايىرىمدىلىق. مەن بۇعان دەيىن ايتقان بولاتىنمىن، بۇگىن ونى قالىپتاستىرۋ نەگىزىنەن ءىرى ۇلتتىق بۋرجۋازيا ەسەبىنەن ءجۇرۋى ءتيىس ەكەنىن تاعى دا قايتالايمىن. دەگەنمەن باسقا كومپانيالاردىڭ، سونىڭ ىشىندە شەتەلدىك ينۆەستورلاردىڭ جارنالارى، ارينە، قۇپتالادى»، - دەدى قاسىم- جومارت توقايەۆ.

پرەزيدەنت بۇل قورعا اقشا اۋدارۋ ءماجبۇرلى شارا ەمەس ەكەنىن ەسكە سالدى. «تاعى دا اتاپ وتكىم كەلەتىنى - بۇل ماجبۇرلەۋ ەمەس. تابىستى كومپانيالار مەن ازاماتتارعا جالپى ۇلتتىق يگى ماقساتتارعا قاراجات ءبولۋ مۇمكىندىگى»، - دەدى مەملەكەت باسشىسى.

اۆتور: ەسىمجان ناقتىباي