داۋرەن ابايەۆ مەملەكەتتىك ماراپاتتاردىڭ «قۇنسىزدانۋى» تۋرالى پىكىر ءبىلدىردى

نۇر-سۇلتان. قازاقپارات - ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ مەملەكەتتىك ماراپاتتاردىڭ «قۇنسىزدانۋى» تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«اۋەلى ايتاتىنىم، ماراپاتتاردىڭ ءبارىنىڭ دارەجە-دەڭگەيى بولادى. مۇنى ماراپات دەۆالۆاتسيالانىپ بارا جاتىر دەگەن ۋاجگە قاتىستى ايتىپ وتىرمىن. ساناۋلى عانا ادامدارعا بەرىلەتىن وردەندەر مەن مەدالدەر بار. ونداي ماراپات جىل سايىن بەرىلىپ جاتقان دا جوق. مەرەيتوي مەدالدەرىنىڭ ءجونى باسقا. ونداي ماراپات ەلىمىزدىڭ دامۋىنا ەلەۋلى ۇلەس قوسىپ جۇرگەن ءتۇرلى سالاداعى، ءتۇرلى وڭىردەگى ءبىرتالاي قايراتكەرگە بۇيىرادى»، - دەدى ول «اشىق ديالوگ» سۇحباتىندا.

ونىڭ پايىمىنشا، مەملەكەت بەرگەن ماراپاتتاردىڭ قۇنى قاتارداعى كاسىبي مامانداردىڭ ەڭبەگى تۇرعاندا ەشقاشان تۇسپەيدى.

«ءوزىڭىز جاي عانا ەلەستەتىپ كورىڭىز. 30 جىل ەڭبەك ءوتىلى بار، ازامات دەگەن اتقا لايىق جۇزدەگەن ادامدى تاربيەلەگەن مۇعالىمگە «مەدالىڭىز قۇنسىزدانىپ كەتتى، باعاسى قالعان جوق» دەگەندى ءتۇسىندىرىپ كورىڭىز. وسىنداي جۇزدەگەن مۇعالىمدى ماراپاتتادىق. ءدال وسى ءۋاجدى ءومىر بويى كاسىپورىنداردا نەمەسە اۋىل شارۋاشىلىعىندا ەڭبەك ەتكەن «ەڭبەك داڭقى» وردەنىنىڭ 126 كاۆالەرىنە ايتىپ كورىڭىز. نەمەسە 133 ەڭبەك ارداگەرىنە، پاندەميامەن ءالى كۇرەسىپ جاتقان جۇزدەگەن دارىگەرگە ايتىپ كورىڭىز. بۇل ماراپاتتار - ولاردىڭ ولشەۋسىز ەڭبەگى مەن قىزمەتىنە قوعام مەن مەملەكەتتىڭ كورسەتكەن قۇرمەتى»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.

اۆتور: ەسىمجان ناقتىباي