سەناتتا زەينەتاقى جيناعىنىڭ ەڭ تومەنگى جەتكىلىكتى مەجەسىن انىقتاۋ ادىستەمەسى تالقىلاندى

نۇر-سۇلتان. قازاقپارات - سەناتورلار زەينەتاقى جيناعىنىڭ ەڭ تومەنگى جەتكىلىكتى شەگىن انىقتاۋ ادىستەمەسىن تالقىلادى.

كەزدەسۋگە ەڭبەك جانە حالىقتى الەۋمەتتىك قورعاۋ مينيسترلىگىنىڭ، «ب ج ز ق» ا ق جانە وزگە دە ۇيىمداردىڭ وكىلدەرى شاقىرىلدى، دەپ حابارلايدى قازاقپارات.

سەناتتىڭ قارجى جانە بيۋجەت كوميتەتىنىڭ ءتوراعاسى ولگا پەرەپەچينا شارانى اشا كەلىپ، ەلىمىز پرەزيدەنتىنىڭ ازاماتتارعا زەينەتاقى جيناقتارىنىڭ ءبىر بولىگىن پايدالانۋعا قۇقىق بەرۋ جونىندەگى باستاماسى جۇرتشىلىق تاراپىنان وڭ قابىلدانعانىن اتاپ ءوتتى.

بۇل رەفورما جالدامالى قىزمەتكەرلەردىڭ جالاقىلارىن جارىققا شىعارۋعا تۇرتكى بولدى، قۇرىلىس جانە وعان بايلانىستى سالالارعا سەرپىن بەردى، دەگەنمەن بۇل تۇرعىن ءۇي باعاسىنىڭ وسۋىنە اسەر ەتتى، دەپ اتاپ ءوتتى سەناتور.

«سەناتورلاردى زەينەتاقى جيناعىنىڭ ءبىر بولىگىن الىپ قويۋ مۇمكىندىگى ماسەلەسى ءارقاشان تولعاندىرىپ كەلەدى، ويتكەنى ول ءبىزدىڭ وتانداستارىمىزدىڭ ەلەۋلى بولىگى ءۇشىن اسا ماڭىزدى. دەپۋتاتتار كورپۋسى ءۇشىن قىزمەت بارىسىندا وتانداستارىمىزدىڭ الەۋمەتتىك ءال-اۋقاتى ءاردايىم باستى ورىندا جانە بولاشاقتا دا وسى قاعيداتتاردى ۇستانادى»، - دەپ اتاپ ءوتتى ولگا پەرەپەچينا.

كەزدەسۋدىڭ نەگىزگى ماقساتى - زەينەتاقى جيناقتارىنىڭ جەتكىلىكتىلىگىنىڭ ەڭ تومەنگى شەگىن ۇلعايتۋ ىقتيمالدىعىنا بايلانىستى جاعدايدى ءتۇسىندىرۋ بولىپ وتىر. دەپۋتاتتار ەڭ تومەنگى جەتكىلىكتىلىك شەگىن انىقتاۋ ادىستەمەسىنىڭ جۇمىس قاعيدالارىن ءتۇسىندىرۋ ماقساتىندا ساراپشىلارعا ساۋال قويىپ وتىر. ول تۋرالى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سەناتورلارعا ايتىپ بەردى، ال «ب ج ز ق» ا ق باسشىسى زەينەتاقى جيناقتارىنىڭ ءبىر بولىگىن پايدالانۋدىڭ قوردىڭ زەينەتاقىمەن قامسىزداندىرۋ جونىندەگى مىندەتتەرىن جۇزەگە اسىرۋعا ىقتيمال اسەرى تۋرالى حاباردار ەتتى.