وقيتىن ۇلت: اقتوتى رايىمقۇلوۆا ۇلتتىق كەڭەس مۇشەلەرىنە جاڭا جوبانى تانىستىردى
بۇل جايىندا پرەزيدەنت كومەكشىسى ەرلان قارين ءمالىم ەتتى.
«كەزدەسۋ اياسىندا مينيستر بيىل وتكىزىلگەن نەگىزگى مادەني، سپورتتىق ءىس-شارالار مەن عىلىمي كونفەرەنسيالارعا توقتالدى. سونداي-اق، اقتوتى رايىمقۇلوۆا مادەنيەت، سپورت جانە ساۋىقتىرۋ نىساندارىنىڭ قۇرىلىسى مەن جوندەۋ جۇمىستارىنا، مۇمكىندىگى شەكتەۋلى جاندار ءۇشىن ءتۇرلى سپورت تۇرلەرىن دامىتۋ بويىنشا مەملەكەتتىك قولداۋ شارالارىنىڭ ىسكە اسۋىنا نازار اۋداردى»، - دەپ جازدى ەرلان قارين Facebook پاراقشاسىندا.
سونىمەن قاتار، مينيستر ۇلتتىق كەڭەس الاڭىندا ايتىلعان ويىن بيزنەسىن رەتتەۋگە جانە «وقيتىن ۇلت» جوباسىن جۇزەگە اسىرۋعا قاتىستى مەملەكەت باسشىسى تاپسىرمالارىنىڭ ورىندالۋ رەتىمەن تانىستىردى.
«مينيستر بايانداماسىنان كەيىن كەزدەسۋ سۇراق-جاۋاپ فورماتىندا جالعاستى. ۇلتتىق كەڭەس مۇشەلەرى اسحات سادىرباي ، جەمىس تۇرماعامبەتوۆا ، تاتيانا تالايەۆا ، قايسار تۇرسىنقوجا، ءبورىحان نۇرمۇحامەدوۆ ، قازىبەك يسا ، ايگۇل ورىنبەك، ايدوس سارىم، مارات ءباشىموۆ جانە ماكسيم روجين ءتۇرلى مەرەيتويلىق ءىس-شارالاردى وتكىزۋ جانە مادەني مۇرانى ناسيحاتتاۋ، تاريحي-مادەني ەسكەرتكىشتەردى ساقتاۋ، ادەبيەت جانە باسپا سالاسىن دامىتۋ، جاپپاي جانە كاسىبي سپورتتى قولداۋ بويىنشا ءوز سۇراقتارىن قويدى. كەزدەسۋ سوڭىندا قاتىسۋشىلار تالقىلانعان ماسەلەلەر مەن ۇسىنىستاردى بىرلەسىپ پىسىقتاۋعا كەلىستى» دەپ تۇيىندەدى ءسوزىن پرەزيدەنت كومەكشىسى.
