قاسىم- جومارت توقايەۆ پارلامەنتارالىق وداقتىڭ پرەزيدەنتى دۋارتە پاشەكونى قابىلدادى
اڭگىمەلەسۋ بارىسىندا قازاقستاننىڭ پارلامەنتارالىق وداقپەن ءوزارا ىقپالداستىعىنىڭ ماڭىزدى باعىتتارى تالقىلاندى. پرەزيدەنت قاسىم- جومارت توقايەۆ دۋارتە پاشەكوعا ءىلتيپات بىلدىرە وتىرىپ، پارلامەنتارالىق وداقپەن اراداعى ىنتىماقتاستىقتى نىعايتۋعا تىڭ سەرپىن بەرۋ تۇرعىسىنان ونىڭ ەلىمىزگە جاساعان ساپارىنىڭ ماڭىزدىلىعىن اتاپ ءوتتى.
- پارلامەنتارالىق وداق پارلامەنتارالىق بايلانىستاردى دامىتۋ ىسىندە ماڭىزدى ءارى جەتەكشى ۇيىم سانالادى. ءسىزدىڭ ساپارىڭىز پارلامەنتتىك ديپلوماتيانى كەڭەيتۋ تۇرعىسىنان ساياسي ماڭىزعا يە. ءبىز اتالعان وداقپەن ءوزارا تىعىز قارىم- قاتىناستاردى دامىتۋعا باسا ءمان بەرەمىز جانە وسى ماڭىزدى ۇيىمنىڭ ءتوراعاسى لاۋازىمىنداعى ءسىزدىڭ ميسسياڭىزدى قولدايمىز، - دەدى مەملەكەت باسشىسى.
قاسىم- جومارت توقايەۆ دۋارتە پاشەكوعا ەلىمىزدەگى دەموكراتيالىق ينستيتۋتتاردى جانە زاڭ ۇستەمدىگىن نىعايتۋعا، ادام قۇقىعى مەن گەندەرلىك تەڭدىكتى قامتاماسىز ەتۋگە باعىتتالعان اۋقىمدى ساياسي رەفورمالاردىڭ جۇزەگە اسىرىلۋى جونىندە ايتتى. سونداي- اق مەملەكەت باسشىسى ونى 2022 -جىلدىڭ قىركۇيەك ايىندا بولاتىن الەمدىك دىندەر كوشباسشىلارىنىڭ VII سەزىنە قاتىسۋعا شاقىردى.
ءوز كەزەگىندە دۋارتە پاشەكو كەزدەسۋگە مۇمكىندىك بەرگەنى ءۇشىن قاسىم- جومارت توقايەۆقا العىس ءبىلدىرىپ، مەملەكەت باسشىسىن قازاقستان تاۋەلسىزدىگىنىڭ 30 جىلدىعىمەن قۇتتىقتادى. سونىمەن قاتار ول ەلىمىزدىڭ وسى كەزەڭدەگى ەكونوميكالىق جانە ديپلوماتيالىق تابىستارىن جوعارى باعالاپ، قازاقستاننىڭ مەملەكەتتەر مەن ادامدار اراسىندا ديالوگ ورناتۋدىڭ جارقىن ۇلگىسى بولىپ وتىرعانىنا نازار اۋداردى. پورتۋگاليا پارلامەنتاريى مەملەكەت باسشىسىنا پارلامەنتارالىق وداقتى دامىتۋدىڭ الداعى كەزەڭدەگى باسىمدىقتارى تۋرالى ايتتى. سونىمەن قاتار قازاقستان مەن پورتۋگاليا قاتىناستارىن وركەندەتۋ اياسىندا نۇر- سۇلتان مەن ليسسابون اراسىنداعى ىنتىماقتاستىقتىڭ قارقىندى دامىپ كەلە جاتقانى اتاپ ءوتىلدى.
