قاشىقتان جۇمىس ىستەۋ ميعا قالاي اسەر ەتەدى؟

نۇر-سۇلتان. قازاقپارات – عالىمدار قاشىقتان جۇمىس ىستەۋ رەجيمىندە ميدىڭ كوگنيتيۆتى فۋنكتسيالارى قالاي وزگەرەتىنىن تالدادى.

كوۆيد پاندەمياسىنىڭ باستالۋىنا بايلانىستى كوپتەگەن جۇمىس بەرۋشىلەر ءوز قىزمەتكەرلەرىن قاشىقتان جۇمىس ىستەۋ جۇيەسىنە اۋىستىردى. دەگەنمەن، پاندەمياعا قاتىستى قاتاڭ شەكتەۋلەر جويىلعاننان كەيىن دە، مۇنداي رەجيمنىڭ ءتيىمدى تۇستارىنان باس تارتقىسى كەلمەگەن كەي جۇمىسشىلار ۇيدەن جۇمىس جاساۋدى جالعاستىرۋدى تاڭدادى.

وكىنىشكە وراي، جاڭا زەرتتەۋ قاشىقتان جۇمىس ىستەۋ مي قىزمەتىنىڭ ايتارلىقتاي بۇزىلۋىنا اكەلەتىنىن كورسەتتى.

روتتەردام مەنەدجمەنت مەكتەبىنىڭ زەرتتەۋشىلەرى الەمدىك دەڭگەيدەگى شاحماتشىلار توبى جاساعان 215000 ءجۇرىستى زەرتتەدى. كەيبىرەۋلەر قاشىقتان وينادى، قالعانى تۋرنيرلەردە بەتپە- بەت ويناعان. عالىمدار ۇيدەن ويناعان شاحماتشىلاردىڭ ويىن ساپاسى وففلاين ويناعاندارعا قاراعاندا الدەقايدا ناشار ەكەنىن انىقتادى.

«ءبىزدىڭ زەرتتەۋلەرىمىزدىڭ ناتيجەلەرى قاشىقتىقتا جاسالعان جۇمىستىڭ ونىمدىلىگى ايقىن تومەندەيتىنىن كورسەتەدى»، - دەيدى زەرتتەۋ اۆتورلارىنىڭ ءبىرى، دوكتور داينيس سەگنەرس. ول شاحماتتىڭ «كەڭسەدە جۇمىس ىستەۋگە ۇقسايتىنىن» باسا ايتادى. «شاحماتتا قولدانىلاتىن تانىمدىق داعدىلار ومىردەگى كۇردەلى تاپسىرمالاردى شەشۋگە دە قولدانىلادى. مىسالى، كەلىسىم- شارت جاساۋ، تەندەرلىك قۇجاتتاردى نەمەسە باسقارۋ شەشىمدەرىن دايىنداۋ، ياعني انىق جانە ناقتى ويلاۋدى قاجەت ەتەتىن وسىنداي مىندەتتەردى قاجەت دەڭگەيدە اتقارۋ دا شاحمات ويىنى ىسپەتتى»، - دەپ تۇسىندىرەدى عالىم.

«كارانتينگە دەيىن دە ءبارىمىز قاشىقتان جۇمىس ىستەۋگە اۋىسساق بولاتىن ەدى. ءبىراق جۇمىس بەرۋشىلەردىڭ بۇعان كەلىسپەۋىنىڭ وزىندىك سەبەپتەرى بولدى»، - دەدى تاعى ءبىر زەرتتەۋشى، مانچەستەر ۋنيۆەرسيتەتىنىڭ پسيحولوگيا پروفەسسورى كەري كۋپەر.

ونىڭ ايتۋىنشا، قاشىقتان جۇمىس ىستەۋ ارقىلى ءبىز ءوز جۇمىس ساپامىزعا قاتىستى پىكىردى سيرەك ەستيمىز. بۇل ءبىزدىڭ مامان رەتىندە ءوسىپ، جاقسى جاققا وزگەرۋىمىزدى باياۋلاتادى.

سونىمەن قاتار، كەڭسەدە قازىرگى تاڭدا كەز كەلگەن مامانعا تالاپ رەتىندە قويىلاتىن داعدىلاردى دامىتا الامىز. مىسالى، ونداي قاسيەتتەرگە ىنتىماقتاستىق پەن قيىن الەۋمەتتىك جاعدايلاردا تەز ارەكەت ەتۋ جاتادى.

روتتەردام زەرتتەۋى كەڭسە جۇمىسىنىڭ ارتىقشىلىقتارىن كورسەتەتىن جالعىز زەرتتەۋ ەمەس. وسى جىلدىڭ قىركۇيەك ايىندا ۇلىبريتانيادا جۇرگىزىلگەن ساۋالناما كۇندەلىكتى كەڭسەگە بارىپ- قايتۋ پسيحيكاعا وڭ اسەر ەتەتىنىن كورسەتتى. زەرتتەۋگە قاتىسۋشىلاردىڭ 45 پايىزى ءوز ويلارىن ارىپتەستەرىمەن تىكەلەي بولىسە الاتىندىقتان كەڭسەدە وزدەرىن ونىمدىرەك سەزىنەتىنىن ايتقان. زەرتتەۋگە قاتىسقاننىڭ جارتىسى ۇيدەن جۇمىس ىستەگەندە ءۇي شارۋاسىنا تىم ءجيى الاڭدايتىنىن مويىنداعان.

وسى ساۋالنامانىڭ ناتيجەلەرىن تالداي كەلە لوندون ۋنيۆەرسيتەتى كوللەدجىنىڭ نيەۆرولوگتارى كەڭسەگە بارۋ قىزمەتكەرلەرگە جۇمىس پەن ءۇي ءومىرىن اجىراتا بىلۋگە مۇمكىندىك بەرۋ ارقىلى تانىمدىق قابىلەت پەن ونىمدىلىگىن جاقسارتاتىنىن ايتتى. مي فۋنكسيالارىن زەرتتەۋشى پروفەسسور دجوزەف ديەۆلين The Telegraph باسىلىمىنا بەرگەن سۇحباتىندا: «كەڭسەدە جۇمىس ىستەۋ ۇيدەن جۇمىس ىستەۋگە قاراعاندا ءتيىمدى، اسىرەسە باسقا ادامدارمەن بەتپە-بەت قارىم-قاتىناس جاساۋ ارقىلى تاجىريبە ارتتىرۋ مۇمكىندىگىن بەرەدى»، - دەيدى.

«كەز كەلگەن ۇلتتىڭ ينتەللەكتىن تومەندەتۋ ونىڭ وكىلدەرىن الەۋمەتتىك وقشاۋلاۋدان باستالادى. جالعىزدىق كۇنىنە 15 قوراپ تەمەكى شەككەنمەن نەمەسە ءبىر بوتەلكە دجين ىشكەنمەن بىردەي»، - دەيدى دجەيمس گۋدۆين.

بەركلي ۋنيۆەرسيتەتىنىڭ تاعى ءبىر زەرتتەۋى ءوزىن «جالعىز» دەپ سيپاتتايتىنداردىڭ ويلاۋ قابىلەتى الەۋمەتتىك بەلسەندى ادامدارعا قاراعاندا 20 پايىزعا تومەن ەكەنىن كورسەتكەن. «الەۋمەتتىك وقشاۋلانۋ زياندى جانە اقىل- ەس كەمىستىگىنە الىپ كەلەدى، سونداي-اق كوگنيتيۆتىك فۋنكسيانى تومەندەتەدى»، - دەپ جالعاستىردى گۋدۆين.

عالىم كەري كۋپەر دۇرىسى ۇيدە جانە كەڭسە جۇمىس ىستەۋ رەجيمىن قاتار ۇستانۋ دەپ سانايدى. «زەرتتەۋ قىزمەتكەرگە بەلگىلى ءبىر اۆتونوميا بەرۋ شارشاۋدىڭ ازايۋىنا اكەلەتىنىن جانە جالپى ونىمدىلىكتى ارتتىراتىنىن كورسەتتى. مۇنداي گيبريدتى جۇمىس ىستەۋ رەجيمى ەڭ ءتيىمدى جول ەكەنى داۋسىز»، - دەدى عالىم.

massaget.kz