تارازدا ءۇش بيگە ەڭسەلى ەسكەرتكىش قويىلدى
دانالىق پەن ادىلدىكتىڭ سيمۆولىنداي بولعان ءۇش ءبيدىڭ ەسكەرتكىشى جامبىل وبلىستىق سوتى عيماراتىنىڭ اۋماعىندا ورنالاسقان.
اشىلۋ سالتاناتىنا جامبىل وبلىسىنىڭ اكىمى بەردىبەك ساپاربايەۆ، جامبىل وبلىستىق سوتىنىڭ ءتوراعاسى ەربول احمەتجانوۆ، ق ر جوعارعى سوتىنىڭ بۇرىنعى ءتوراعاسى مۇسابەك تۇرعانبەك ۇلى، جامبىل وبلىستىق سوتىنىڭ بۇرىنعى ءتوراعاسى ماقسۇت ءابىلقايىروۆ جانە سوت جۇيەسىنىڭ ارداگەرلەرى قاتىستى.
ەربول احمەتجانوۆ پەن مۇسابەك تۇرعانبەك ۇلى ەڭ كۇردەلى كەزەڭدە قازاقتاردى بىرىكتىرۋدە شەشۋشى ءرول اتقارىپ، ەلدىڭ ەركىندىگى مەن تاۋەلسىزدىگى ءۇشىن كۇرەسكەن ۇلى بيلەردىڭ رۋحاني مۇرالارى، ونەگەلى ەڭبەكتەرىنە توقتالدى.
«قازاق بيلەرىنىڭ ءادىل سوت ءىسىن دامىتۋعا جانە نىعايتۋعا قوسقان ۇلەستەرى ولشەۋسىز. ايتەك ءبي، قازىبەك ءبي، تولە ءبيدىڭ قازاق حالقىنىڭ قالىپتاسۋىنا، ونىڭ سوت تورەلىگىمەن تىعىز بايلانىستى بولعانىن اتاپ وتكەنىمىز ابزال. ەسكەرتكىش دانالىق پەن ادىلدىكتىڭ نىشانى»، - دەدى م. تۇرعانبەك ۇلى.
بۇدان سوڭ ەسكەرتكىشكە گۇل شوقتارى قويىلدى. سالتاناتتى اشىلۋ راسىمىنەن كەيىن قوناقتار وبلىستىق سوتتىڭ جاڭا عيماراتىندا باس قوستى. وبلىس اكىمى بەردىبەك ساپاربايەۆ ءار زاماننىڭ وزىنە ساي سوت جۇيەسى بولعانىن، كەزىندەگى بيلەر كەڭەسى سونىڭ ايعاعى ەكەندىگىن اتاپ ءوتتى.
«تاۋەلسىزدىك مەرەكەسى قارساڭىندا وبلىسىمىزدىڭ ورتالىعى سانالاتىن تاريحي تاراز قالاسىنىڭ كوركىنە ءسان قوسىپ تۇرعان وبلىستىق سوتتىڭ جاڭا عيماراتىنىڭ الدىنان، التى الاشتىڭ ايگىلى بيلەرىنىڭ ەسكەرتكىشى اشىلۋى - تاريحي ماڭىزدى وقيعا جانە تاربيەلىك ءمانى زور. تولە ءبي، ايتەكە ءبي، قازىبەك ءبيدىڭ ەسىمدەرى قازاق مەملەكەتتىلىگى مەن قازاق سوت تورەلىگى نەگىزىنىڭ قالانۋىنا تىعىز بايلانىستى. ومىرلىك تاجىريبەسى مەن ءمىنسىز بەدەلىنىڭ ارقاسىندا ءوز زامانىندا ولاردىڭ شەشىمدەرى ءادىل بولعان جانە كۇمان تۋدىرماعان.
جاقىندا تاراز قالاسىندا وتكەن «سوت جۇيەسى عالىمدارىنىڭ ديالوگى» I حالىقارالىق فورۋمىنا ق ر جوعارعى سوتىنىڭ ءتوراعاسى جاقىپ اسانوۆ، ق ر جوعارعى سوتىنىڭ سۋدياسى، سۋديالار وداعىنىڭ ءتوراعاسى ساكەن ابدوللا، سۋديا-عالىمدار، رەسەي، تۇركيا، قىرعىزستان، وزبەكستان مەن بەلارۋسسيادان كەلگەن شەتەلدىك زاڭگەر عالىمدار قاتىسىپ، ورامدى ويلارىن ورتاعا سالدى.
وبلىستىق سوتتىڭ تاعىلىمدى تاريحى، ءوز ورنى قالىپتاسقان. سالا ارداگەرلەرىنىڭ تابىستى ەڭبەگىن ساباقتاستىرا وتىرىپ، بۇگىنگى قىزمەتكەرلەر دە ادالدىق، تۋرالىق، زاڭدىلىق قاعيداتتارىن باسشىلىققا الىپ وتىرۋى ءتيىس. بۇل حالىقتىڭ سوت جۇيەسىنە دەگەن سەنىمىنىڭ ارتا ءتۇسۋى ءۇشىن اسا ماڭىزدى»، - دەدى وبلىس اكىمى.
ايتا كەتەيىك، جاڭا ەسكەرتكىش بەتوننان قۇيىلىپ، ءمارمار تۇعىرعا ورناتىلعان. مونۋمەنت اۆتورى - ءمۇسىنشى تەمىرحان قولجىگىت. ەسكەرتكىشتىڭ بيىكتىگى - 3,50 مەتر.
