نۇرسۇلتان نازاربايەۆ: مەن اتا-بابالار اماناتىنا ءاردايىم ادال بولدىم

نۇر-سۇلتان. قازاقپارات - وركەندەۋ جولىنا تۇسكەن قازاقستانعا ەشقاشان توقمەيىلسۋگە، توقتاۋعا بولمايدى.

ق ر تاۋەلسىزدىگىنىڭ 30 جىلدىعىنا ارنالعان سالتاناتتى جيىندا ەلباسى نۇرسۇلتان نازاربايەۆ وسىنداي وي ايتتى، دەپ حابارلايدى قازاقپارات.

«عاسىرلار بويى اتا-بابالار ۇلان بايتاق جەردى اق بىلەكتىڭ كۇشىمەن، اق نايزانىڭ ۇشىمەن قورعاپ، بىزگە ميراس ەتتى. مەن سول اتا-بابالار اماناتىنا ءاردايىم ادال بولدىم. «ەل باسىنا كۇن تۋسا، ەر ەتىكپەن سۋ كەشەر. ارعىماققا كۇن تۋسا، اۋىزدىقپەن سۋ ىشەر» دەگەن ءسوز بار. جۇرتىمنىڭ بولاشاعى ءۇشىن جانىمدى ايامادىم. بۇگىن ارادا 30 جىل وتكەن سوڭ سول اسقاق ارماندارىمنىڭ ورىندالعانىن كورۋ - مەن ءۇشىن زور باقىت. جەتكەن بارلىق بيىكتەر - بىزدىكى جانە بارىمىزدىكى. ونى ەشكىم دە جوققا شىعارا المايدى»، - دەگەن تۇڭعىش پرەزيدەنت وردا بۇزار جاسقا كەلگەن قازاقستان بولاشاقتا قازىرگىدەن دە قۋاتتى، ايگىلى مەملەكەتتىڭ بىرىنە اينالاتىنىنا سەنىم ءبىلدىردى.

«قازىرگى كۇنى ءبىز الدىمىزعا وزىق 30 ەلدىڭ قاتارىنا قوسىلۋ جونىندە ەرەكشە ماقسات قويىپ وتىرمىز. ارمانسىز ادام - قاناتسىز قۇس دەگەندەي، وركەندەۋ جولىندا بىزگە ەشقاشان توقمەيىلسۋگە، توقتاۋعا بولمايدى»، - دەدى نۇرسۇلتان نازاربايەۆ.

ايتا كەتەيىك، بۇگىن مەملەكەت باسشىسى قاسىم-جومارت توقايەۆتىڭ قاتىسۋىمەن ق ر تاۋەلسىزدىگىنىڭ 30 جىلدىعىنا وراي سالتاناتتى جيىن ءوتىپ جاتىر. سالتاناتتى ءىس-شاراعا ق ر تۇڭعىش پرەزيدەنتى - ەلباسى نۇرسۇلتان نازاربايەۆ، ۇكىمەت مۇشەلەرى، پارلامەنت دەپۋتاتتارى، مادەنيەت جانە قوعام، ونەر، سپورت قايراتكەرلەرى، زيالى قاۋىم وكىلدەرى قاتىسىپ وتىر.