نۇرسۇلتان نازاربايەۆ: تاڭىرگە تاۋبە، كوزدەگەنىمىز بەن كوكسەگەنىمىزگە جەتتىك

نۇر- سۇلتان. قازاقپارات - ق ر تۇڭعىش پرەزيدەنتى - ەلباسى نۇرسۇلتان نازاربايەۆ بارشا قازاقستاندىقتى تاۋەلسىزدىگىمىزدىڭ 30 جىلدىق مەرەيتويىمەن قۇتتىقتادى، دەپ حابارلايدى قازاقپارات ءتىلشىسى.

«قىمباتتى وتانداستار! ارداقتى اعايىن! قادىرمەندى حالىق! ەڭ اسىل قۇندىلىعىمىز - قاستەرلى تاۋەلسىزدىگىمىزدىڭ 30 جىلدىق تورقالى تويىمەن بارشاڭىزدى شىن جۇرەگىممەن قۇتتىقتايمىن! قازىر عانا مەنىڭ الدىمدا ەلىمىزدىڭ پرەزيدەنتى قاسىم- جومارت كەمەل ۇلى بولعان ءىستىڭ ءبارىن ايتىپ، بارشا ازاماتقا ءوزىنىڭ تىلەگىن، ماعىنالى ءسوزىن جولدادى. وعان قوسىپ، ءبولىپ ايتاتىن ءسوز دە جوق. بارلىعى قامتىلدى. سوندىقتان قۇرمەتتى قاسىم- جومارت كەمەل ۇلى، سىزگە شىن جۇرەگىممەن مازمۇندى بايانداماڭىز بەن ەل باسقارعان كەزدەگى مەنىڭ ەڭبەگىمە بەرگەن اسا جوعارى باعاڭىز ءۇشىن زور ريزاشىلىمدى بىلدىرەمىن»، - دەدى ەلباسى تاۋەلسىزدىكتىڭ 30 جىلدىعىنا ارنالعان سالتاناتتى ءىس- شارا بارىسىندا.

ق ر تۇڭعىش پرەزيدەنتى تاۋەلسىزدىك العان كەزەڭدەگى قيىندىقتارعا توقتالىپ ءوتتى.

«تاڭىرگە تاۋبە، كوزدەگەنىمىز بەن كوكسەگەنىمىزگە جەتتىك. كوكتەن تىلەگەنىمىز، كۇتكەنىمىز بولدى. كۇتكەن ەسەمىزدى، بارلىعىن الدىق. كەمىسىمىزدى تولتىردىق. ارۋاق قولدادى، ادىلەت ورنادى. مىڭ ءولىپ، مىڭ تىرىلگەن قاسيەتتى حالقىمىزعا قايتا كەلدىك. مىڭجىلدىقتار توعىسىندا بايىرعى مەملەكەتتىلىگىمىز قايتا جاڭعىردى»، - دەدى نۇرسۇلتان نازاربايەۆ.

«عاسىرلار بويى اتا- بابالار ۇلان بايتاق جەردى اق بىلەكتىڭ كۇشىمەن، اق نايزانىڭ ۇشىمەن قورعاپ، بىزگە ميراس ەتتى. مەن سول اتا- بابالار اماناتىنا ءاردايىم ادال بولدىم.

«ەل باسىنا كۇن تۋسا، ەر ەتىكپەن سۋ كەشەر. ارعىماققا كۇن تۋسا اۋىزدىقپەن سۋ ىشەر» دەگەن ءسوز بار. جۇرتىمنىڭ بولاشاعى ءۇشىن جانىمدى ايامادىم. بۇگىن ارادا 30 جىل وتكەن سوڭ سول اسقاق ارماندارىمنىڭ ورىندالعانىن كورۋ مەن ءۇشىن زور باقىت. جەتكەن بارلىق بيىكتەر بىزدىكى جانە بارىمىزدىكى. ونى ەشكىم دە جوققا شىعارا المايدى»، - دەگەن تۇڭعىش پرەزيدەنت وردا بۇزار جاسقا كەلگەن قازاقستان بولاشاقتا قازىرگىدەن دە قۋاتتى، ايگىلى مەملەكەتتىڭ بىرىنە اينالاتىنىنە سەنىم ءبىلدىردى.

«قازىرگى كۇنى ءبىز الدىمىزعا وزىق 30 ەلدىڭ قاتارىنا قوسىلۋ جونىندە ەرەكشە ماقسات قويىپ وتىرمىز. ارمانسىز ادام - قاناتسىز قۇس دەگەندەي، وركەندەۋ جولىندا بىزگە ەشقاشان توقمەيىلسۋگە، توقتاۋعا بولمايدى»، - دەدى نۇرسۇلتان نازاربايەۆ.

ايتا كەتەيىك، بۇگىن مەملەكەت باسشىسى قاسىم- جومارت توقايەۆتىڭ قاتىسۋىمەن ق ر تاۋەلسىزدىگىنىڭ 30 جىلدىعىنا وراي سالتاناتتى جيىن ءوتىپ جاتىر. سالتاناتتى ءىس- شاراعا ق ر تۇڭعىش پرەزيدەنتى - ەلباسى نۇرسۇلتان نازاربايەۆ، ۇكىمەت مۇشەلەرى، پارلامەنت دەپۋتاتتارى، مادەنيەت جانە قوعام، ونەر، مادەنيەت سپورت قايراتكەرلەرى، زيالى قاۋىم وكىلدەرى قاتىسىپ وتىر.