باتىر بابالارىمىز بۇكىل ەۋرازيادا ات ويناتقان قۋاتتى مەملەكەتتەر قۇردى - توقايەۆ
«تاعدىر تاۋقىمەتى ۇلتىمىزدىڭ جۇرەگىنەن ازاتتىق رۋحىن وشىرە المادى. قازاقتىڭ قايسار ۇل- قىزدارى قاشاندا ەلدى بوستاندىققا ۇندەپ، جىگەرىن جاني ءبىلدى. ءبىزدىڭ مەملەكەتتىلىك تاريحىمىز كونە زاماننان باستاۋ الادى. ءبىر كەزدە ءبورىلى بايراق كوتەرگەن كوك تۇرىكتەر ماڭگى ەل بولۋعا ۇمتىلدى. كۇلتەگىن مەن بىلگە قاعان تۋرالى تاستاعى جازۋلار تاريحىمىزدىڭ تەرەڭدىگىن تانىتادى. باتىر بابالارىمىز بۇكىل ەۋرازيادا ات ويناتقان قۋاتتى مەملەكەتتەر قۇردى»، - دەپ اتاپ ءوتتى ق ر پرەزيدەنتى.
مەملەكەت باسشىسى بابالارىمىزدىڭ سايىن دالادا تەڭدەسى جوق كوشپەلىلەر وركەنيەتىن قالىپتاستىرعانىن اتاپ ءوتتى.
«الىپ قۇرلىقتىڭ ساياسي- ەكونوميكالىق دامۋ بارىسىنا وراسان زور ىقپالىن تيگىزدى. ولار ۇرپاققا اسقاق رۋحىن جانە ءور نامىسىن ميراس ەتتى. باعا جەتپەس مادەني مۇراسى مەن جاۋھار جادىگەرلەرىن تابىستادى»، - دەدى مەملەكەت باسشىسى.
«التىن وردا ورتا عاسىرداعى الىپ مەملەكەت رەتىندە بەلگىلى. قازاق حالقى وسى ۇلىق ۇلىستىڭ تىكەلەي مۇراگەرى بولىپ سانالادى. ودان كەيىن تاريح تورىنە قازاق حاندىعى شىقتى. قازىرگى تاڭدا قاسىم حاننىڭ قاسقا جولىن، ەسىم حاننىڭ ەسكى جولىن، ءاز تاۋكەنىڭ جەتى جارعىسىن بىلمەيتىن قازاق كەمدە- كەم. مەملەكەتتىلىگىمىزدىڭ بەرىك تۇعىرى بولعان دالا زاڭدارى ەل جادىندا ساقتالىپ، بۇگىنگى كۇنگە دەيىن جەتتى»، - دەپ اتاپ ءوتتى ق ر پرەزيدەنتى.
مەملەكەت باسشىسى ءتول تاريحىمىزداعى ەڭ كۇردەلى ساتتەردە حالقىمىز جۇدىرىقتاي جۇمىلا بىلگەنىن باسا ايتتى.
«بۇلانتى، وربۇلاق جانە اڭىراقاي شايقاستارى - وسىنىڭ ايقىن دالەلى. قازاقتىڭ ەلدىك جولىنداعى ەرلىگى وتارشىلدىققا قارسى ۇلت- ازاتتىق قوزعالىستاردا ايقىن كورىندى. الاش ارىستارى دەربەس مەملەكەت قۇرۋ ءۇشىن جانىن پيدا ەتتى. ەكىنشى دۇنيەجۇزىلىك سوعىس كەزىندە ەل ازاماتتارى مايدان دالاسىندا ەرلىكپەن شايقاستى. كەڭەس زامانىندا زيالىلارىمىز ءتىلىمىز بەن ءدىلىمىزدى ساقتاپ قالۋ ءۇشىن ايانباي ەڭبەك ەتتى. 60-جىلداردا ءتول مادەنيەتىمىز ەرەكشە دامىپ، قازاق ادەبيەتىندە تالانتتار شوعىرى قالىپتاستى. بىرەگەي تۋىندىلار دۇنيەگە كەلدى. كوركەم شىعارمالار ۇرپاق ساناسىن وياتىپ، جاقسىلىققا جەتەلەيتىن تاربيە قۇرالىنا اينالدى»، - دەدى مەملەكەت باسشىسى.
جەلتوقسان قاھارماندارى تاۋەلسىزدىكتى ءبىر تابان جاقىنداتقانى انىق.
«كەشەگى جەلتوقسان قاھارماندارى تاۋەلسىزدىكتى ءبىر تابان جاقىنداتقانى انىق. اسقار تاۋ الىستاعان سايىن اسقاق كورىنەدى. ءبىزدىڭ بابالارىمىز قازاقتىڭ دەربەس مەملەكەت قۇرىپ، ەركىن ءومىر سۇرۋگە قۇقىلى ەكەنىن تاريح الدىندا دالەلدەدى. وسىلايشا، مىڭجىلدىقتار توعىساتىن تۇستا ازاتتىق تۋى كوگىمىزدە جەلبىرەدى. ۇلتتىڭ ەڭ ۇلى مۇراتى - تاۋەلسىزدىككە قول جەتكىزدىك. سول ساتتەن باستاپ قازاق ەلىنىڭ ۇلى كوشى بولاشاققا بەت تۇزەدى. حالقىمىز ءوز مەملەكەتىن قۇرۋعا كىرىستى. بۇل - تاريحي ادىلدىكتىڭ ورناۋى»، - دەپ اتاپ ءوتتى ق ر پرەزيدەنتى.
اۆتور: مارلان جيەمباي
