قازاقستان مەن ا ق ش ستراتەگيالىق ىنتىماقتاستىق پەرسپەكتيۆالارىن تالقىلادى
وتىرىستىڭ نەگىزگى ماقساتى - وتكەن جارتىجىلدىقتاعى بىرلەسكەن جۇمىستى قورىتىندىلاۋ جانە ەكى ەل اراسىنداعى ستراتەگيالىق ارىپتەستىكتى ودان ءارى كەڭەيتۋ پەرسپەكتيۆالارىن ايقىنداۋ بولدى.
«بۇل ءبىزدىڭ قارىم- قاتىناسىمىزداعى ماڭىزدى كەزەڭ. شارانىڭ كۇن ءتارتىبى جاھاندىق، وڭىرلىك قاۋىپسىزدىك سالاسىنداعى ءوزارا ءىس- قيمىلدى، قۇقىق قورعاۋ سالاسىنداعى ىنتىماقتاستىقتى، كليماتتىڭ وزگەرۋىن، ءبىلىم الماسۋدى جانە باسقالارىن قوسا العاندا، كەڭ اۋقىمدى ماسەلەلەردى قامتيدى. اسىرەسە، ساۋدا- ەكونوميكالىق، ينۆەستيتسيالىق ىنتىماقتاستىقتى تالقىلاۋعا ەرەكشە نازار اۋدارىلادى»، - دەدى اقان راحمەتۋللين سىرتقى ىستەر مينيسترلىگىندە جۋرناليستەرگە ارنالعان بريفينگتە.
ءوز كەزەگىندە ا ق ش مەملەكەتتىك حاتشىسىنىڭ كومەكشىسى دونالد لۋ ءوز ەلىنىڭ قازاقستان ءۇشىن سەنىمدى سەرىكتەس ەكەنىن اتاپ ءوتتى.
«ءبىز ەكونوميكانىڭ ءتۇرلى سەكتورلارىندا، اسىرەسە مۇناي- گاز سالاسىندا وتە بەلسەندى جۇمىس ىستەدىك. وسى 30 جىل ىشىندە ءبىز 37 ميلليارد دوللار ينۆەستيتسيا اكەلدىك. الداعى ۋاقىتتا دا قازاقستاننىڭ سەرىكتەسى بولىپ، «جاسىل» ەكونوميكاعا كوشۋگە اتسالىسقىمىز كەلەدى، جاڭارتىلاتىن ەنەرگيا كوزدەرىنە - جەل، كۇن ەنەرگياسى، گيدروەنەرگەتيكاعا ينۆەستيتسيا سالماقشىمىز ءبىزدىڭ ەلدەرىمىز ءوز تاريحىنداعى ەڭ بەرىك قارىم- قاتىناستارعا يە. قازىر ءبىز COVID-19، جاھاندىق جىلىنۋ، اۋعانستانداعى داعدارىس سياقتى ءبىرقاتار سىن- قاتەرگە تاپ بولدىق. ا ق ش ۇزاق جىل قازاقستاننىڭ سەنىمدى سەرىكتەسى بولىپ قالا بەرەدى دەپ ۇمىتتەنەمىن. مەن وسىندا كەلىپ، تاۋەلسىزدىكتىڭ 30 جىلدىعىن سىزدەرمەن بىرگە اتاپ وتكەنىمە قۋانىشتىمىن»، - دەدى دونالد لۋ.
ايتا كەتەيىك، بۇگىنگى وتىرىستىڭ كۇن ءتارتىبى ساياسي، ساۋدا- ەكونوميكالىق جانە ينۆەستيتسيالىق، مادەني- گۋمانيتارلىق، عىلىمي- تەحنيكالىق سالالارداعى ەكىجاقتى قاتىناستاردىڭ وزەكتى ماسەلەلەرىن جانە ادام قۇقىقتارى، ادام ساۋداسى جانە باسقا دا ماسەلەلەردى قامتىدى. وتىرىس قورىتىندىسى بويىنشا بىرلەسكەن مالىمدەمە قابىلداندى.
اۆتور: ايجان سەرىكجان قىزى
