ەرلى-زايىپتىلاردىڭ زەينەتاقى جيناقتارىن بىرىكتىرۋگە مۇمكىندىك بەرىلەدى
جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالىپ جاتىر. زاڭ جوباسىنىڭ نەگىزگى ماقساتى - ساقتاندىرۋ نارىعىن جانە باعالى قاعازدار نارىعىن ودان ءارى دامىتۋ. ول ءۇشىن جاڭا ونىمدەر ەنگىزۋ، قىزمەتتەردى تسيفرلاندىرۋ، تۇتىنۋشىلار مەن ينۆەستورلاردىڭ قۇقىعىن قورعاۋ، زاڭنامانى ۇزدىك حالىقارالىق پراكتيكاعا سايكەس كەلتىرۋ تالاپ ەتىلەدى. زاڭ جوباسىندا ءۇش كودەكسكە جانە 27 زاڭعا وزگەرىستەر مەن تولىقتىرۋلار ەنگىزۋ كوزدەلەدى.
«زاڭ جوباسىنىڭ ءبىرىنشى بلوگى ساقتاندىرۋ سەكتورىن كەشەندى دامىتۋعا باعىتتالعان. ساقتاندىرۋ سەكتورى ساقتاندىرۋ اكتيۆتەرىنىڭ تۇراقتى ءوسۋىن جانە جوعارى قارجىلىق ورنىقتىلىقتى كورسەتىپ وتىر. نارىق اكتيۆتەرى سوڭعى ءۇش جىلدا 76 پايىزعا ءوسىپ، 1,7 تريلليون تەڭگەنى نەمەسە ىشكى جالپى ءونىمنىڭ 2,3 پايىزىن قۇرايدى. زاڭ جوباسىندا جيناقتاۋشى ساقتاندىرۋدى دامىتۋ ءۇشىن جاڭا الەۋمەتتىك ماڭىزدى ساقتاندىرۋ ونىمدەرىن ەنگىزۋ كوزدەلەدى. بۇل مەملەكەتتىك ءبىلىم بەرۋ جيناقتاۋشى جۇيەسى اۋقىمىندا جيناقتاۋشى ساقتاندىرۋ جانە بىرلەسكەن ەرلى- زايىپتى زەينەتاقى اننۋيتەتى»، - دەدى ءمادينا ءابىلقاسىموۆا.
ونىڭ ايتۋىنشا، ءبىلىم بەرۋ جيناقتاۋشى ساقتاندىرۋ ءونىمى بالانىڭ جوعارى وقۋ ورنىندا وقۋىنا اقى تولەۋ ءۇشىن اقشانى كەپىلدىكپەن جيناقتاۋعا مۇمكىندىك بەرەدى. بۇل ءونىم قوسىمشا ساقتاندىرۋدى قامتاماسىز ەتەدى.
«ەكىنشى ءونىم - بىرلەسكەن ەرلى- زايىپتى زەينەتاقى اننۋيتەتى. بىرلەسكەن اننۋيتەت ەرلى- زايىپتىلاردىڭ نەمەسە جاقىن تۋىستارىنىڭ زەينەتاقى جيناقتارىن بىرىكتىرۋگە مۇمكىندىك بەرەدى. ەگەر ەرلى- زايىپتىلاردىڭ بىرىندە زەينەتاقى جيناعى جەتپەي، ال ەكىنشىسىندە ارتىق بولسا، ولار زەينەتاقى جيناقتارىن بىرگە قوسىپ، زەينەتاقى اننۋيتەتىن ساتىپ الادى. سونىمەن بىرگە، تولەمدەردى ءومىر بويى الۋعا مۇمكىندىك الادى»، - دەپ ءتۇسىندىردى اگەنتتىك باسشىسى.
