مەملەكەت باسشىسى پرەمەر- مينيستر اسقار ءماميندى قابىلدادى
اسقار مامين قازاقستاننىڭ ەكونوميكاسى پاندەميا جاعدايىنا ءساتتى بەيىمدەلىپ، ەكونوميكالىق ءوسىمنىڭ قارقىندى دامىپ كەلە جاتقانىن ايتتى. 11 ايدىڭ قورىتىندىسى بويىنشا ءى ج ءو 3,8 پايىزعا ارتقان. پرەزيدەنتكە بيىلعى قاڭتار- قازان ايلارى ارالىعىنداعى سىرتقى ساۋدا اينالىمىنىڭ كورسەتكىشتەرى تۋرالى مالىمەت بەرىلدى.
پرەمەر- ءمينيستردىڭ مالىمەتىنە سايكەس، سىرتقى ساۋدا كولەمى 82,2 ميلليارد دوللاردى قۇرادى. بۇل بىلتىرعى وسى كەزەڭدەگى كورسەتكىشپەن سالىستىرعاندا 14,1 پايىز ارتىق. سونىمەن قاتار ەكسپورتتىڭ كولەمى 23,5 پايىزعا كوبەيىپ، 49,1 ميلليارد دوللارعا دەيىن جەتكەن. ال وڭدەلگەن تاۋارلاردىڭ ەكسپورتى 24,4 پايىزعا ارتقان. ساۋدا تەڭگەرىمى 16 ميلليارد دوللارعا جەتكەن. مەملەكەت باسشىسىنا ازىق- تۇلىك قاۋىپسىزدىگىن قامتاماسىز ەتۋ، الەۋمەتتىك ماڭىزى بار ازىق- تۇلىكتىڭ باعاسىن تۇراقتاندىرۋ، ينفلياتسياعا قارسى ءىس- قيمىلدىڭ كەشەندى شارالارىن جۇزەگە اسىرۋ جونىندە باياندالدى.
سونىمەن قاتار قاسىم- جومارت توقايەۆقا ەلىمىزدەگى سانيتارلىق- ەپيدەميولوگيالىق احۋال، سونىڭ ىشىندە حالىققا ۆاكسينا سالۋ جۇمىستارىنىڭ قارقىنى تۋرالى مالىمەت بەرىلدى. اسقار مامين پرەزيدەنتكە سىرتقى جانە ىشكى ينۆەستيتسيالاردى تارتۋ ءىسىن كۇشەيتۋگە، شاعىن جانە ورتا بيزنەستىڭ الەۋەتىن ارتتىرۋعا، وڭىرلەردى دامىتۋعا، وڭدەۋ سەكتورىنىڭ ءوسىمى ەسەبىنەن ەكونوميكانىڭ قۇرىلىمدارىن ودان ءارى ءارتاراپتاندىرۋعا باعىتتالعان شارالاردىڭ جۇزەگە اسىرىلۋ بارىسى تۋرالى ايتتى.
