قازاقستاننىڭ الەمدىك ازىق- تۇلىك حابتارىنىڭ ءبىرى بولۋىنا مۇمكىندىگى بار – مامين
بۇل تۋرالى ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«وندىرىستە كلاستەرلىك دامىتۋدى، شاعىن وندىرۋشىلەر مەن وندىرۋشىلەردى اۋىل شارۋاشىلىعى كووپەراتيۆتەرىنە بىرىكتىرۋدى ىنتالاندىرۋ ارقىلى وڭدەلگەن اۋىل شارۋاشىلىعى ونىمدەرىنىڭ كولەمىن ۇلعايتۋ كەرەك. بۇل جوبالاردى ىسكە اسىرۋ ەڭ الدىمەن، ەلدىڭ ازىق- تۇلىك قاۋىپسىزدىگىن قامتاماسىز ەتۋگە باعىتتالعان. جالپى 2023 -جىلدىڭ سوڭىنا دەيىن بارلىق نەگىزگى ازىق- تۇلىك ونىمدەرى بويىنشا يمپورتقا تاۋەلدىلىكتى الىپ تاستاۋ قاجەت»، - دەدى ۇكىمەت باسشىسى.
اسقار مامين ىشكى نارىق قامتاماسىز ەتىلگەننەن كەيىن ءونىم تۇرلەرى مەن ونىڭ تارالۋ گەوگرافياسىن كەڭەيتۋ ارقىلى ەكسپورت كولەمىن ۇلعايتۋ ماڭىزدى ەكەندىگىن ايتتى.
«سونىمەن قاتار ساقتاۋ جانە لوگيستيكا ينفراقۇرىلىمىنا قولجەتىمدىلىكتى قامتاماسىز ەتۋ قاجەت. سەبەبى تاۋاردىڭ وزىندىك قۇنىندا ولاردىڭ ۇلەسى باسىم. الەمدىك نارىقتا ازىق- تۇلىك تاۋارلارىنا سۇرانىستىڭ ارتقانىن ەسكەرە وتىرىپ، ەلىمىزدىڭ الەمدىك ازىق- تۇلىك حابتارىنىڭ ءبىرى بولۋىنا مۇمكىندىگى بار»، - دەدى پرەمەر- مينيستر.
