قاسىم-جومارت توقايەۆ: تاۋەلسىزدىك كەزەڭىندە حالقىمىز ەلدىكتىڭ بىرەگەي ۇلگىسىن كورسەتتى
«بارشاڭىزدى قاستەرلى تاۋەلسىزدىگىمىزدىڭ 30 جىلدىق مەرەيتويىمەن شىن جۇرەكتەن قۇتتىقتايمىن. بۇل - ۇلت مەرەيىن وسىرەتىن ۇلىق مەيرام. ءبىز تاريح تۇرعىسىنان العاندا قىسقا مەرزىم ىشىندە جاڭا قازاقستاننىڭ نەگىزىن قالادىق. تۇعىرى بەرىك، ەكونوميكاسى قۋاتتى، بەدەلى بيىك مەملەكەتكە اينالدىق. مۇنىڭ ءبارى - ەڭ الدىمەن ەلباسى نۇرسۇلتان ءابىش ۇلى نازاربايەۆتىڭ كورەگەن ساياساتىنىڭ جەمىسى. سونىمەن بىرگە بۇكىل حالقىمىزدىڭ ەرەن ەڭبەگىنىڭ ناتيجەسى»، - دەدى مەملەكەت باسشىسى مەملەكەتتىك ناگرادالار يەگەرلەرىن ماراپاتتاۋ راسىمىندە.
ءوز سوزىندە پرەزيدەنت كەز كەلگەن حالىقتىڭ تابىسقا جەتۋى ازاماتتارىنا بايلانىستى ەكەنىن ەسكە سالدى.
«بۇل ءومىردىڭ زاڭى. ادام كاپيتالى مەن مىقتى مەملەكەت - بارلىق قيىندىقتى ەڭسەرە الادى. تاۋەلسىزدىك كەزەڭىندە حالقىمىز ەلدىكتىڭ بىرەگەي ۇلگىسىن كورسەتتى. «ەڭبەك - ىرىستىڭ بۇلاعى، باقىتتىڭ شىراعى» دەپ بەكەر ايتىلماعان. شىن مانىندە، ءبىزدىڭ بۇگىنگى جەتىستىگىمىز - بارشا حالقىمىزدىڭ ورتاق جەڭىسى. جاڭا قازاقستاندى وركەندەتۋگە ازاماتتارىمىزدىڭ كوبى سۇبەلى ۇلەس قوستى. بۇگىنگى مەرەيلى ساتتە ەلىمىزدىڭ بارشا ازاماتتارىنا تاباندى ەڭبەگى ءۇشىن زور العىس ايتامىن»، - دەدى قاسىم-جومارت توقايەۆ.
ايتا كەتەيىك، اقوردادا مەملەكەت باسشىسىنىڭ جارلىعىمەن ەلىمىزدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى، بەلسەندى قوعامدىق قىزمەتى ءۇشىن ءبىر توپ ازامات مەملەكەتتىك ناگرادالارمەن ماراپاتتالدى.
اۆتور: ايجان سەرىكجان قىزى
