قۇتقارۋشىلار قىزمەتتىك پاتەرىن جەكە مەنشىككە اۋدارۋ مۇمكىندىگىنە يە بولۋى مۇمكىن
«ازاماتتىق قورعانىس ورگاندارىنىڭ قىزمەتكەرلەرى مەن قۇتقارۋشىلاردى الەۋمەتتىك قامسىزداندىرۋ شارتتارىن جاقسارتۋ تۋرالى ساۋالدارىڭىز بويىنشا مىنانى حابارلايمىن. قازىر ازاماتتىق قورعانىس ورگاندارىندا اسكەري شەن بەرىلەتىن اسكەري قىزمەتكەر مارتەبەسى قىزمەتتىك مىندەتى ازاماتتىق قورعانىس جۇەيسىن دامىتۋمەن بايلانىستى لاۋازىمدار ساناتىنا عانا بەرىلەدى» ، - دەپ جازدى اسقار مامين دەپۋتاتتىق ساۋالعا بەرگەن جاۋابىندا.
ياعني، توتەنشە جاعدايلاردىڭ الدىن الۋ جانە ولاردى جويۋ، حالىققا شۇعىل مەديتسينالىق جانە پسيحولوگيالىق كومەك كورسەتۋ جونىندەگى، سونداي- اق مەملەكەتتىك ورتكە قارسى قىزمەت ورگاندارىندا قىزمەت وتكەرىپ جۇرگەن ازاماتتىق قورعانىس ورگاندارىنىڭ قىزمەتكەرلەرىنە قۇقىق قورعاۋ ورگاندارى قىزمەتكەرلەرىنىڭ ارناۋلى اتاقتارى ءتيىستى ول جەڭىلدىكتەرگە ەڭبەك سىڭىرگەن جىلدارى ءۇشىن جەڭىلدىكتى زەينەتاقى تولەمدەرى، قازا تاپقان نەمەسە مەرتىككەن جاعدايلاردا وتباسىنا ۇسىنىلاتىن الەۋمەتتىك كەپىلدىكتەر، مەديتسينالىق جانە ساناتوري- كۋرورتتىق جەڭىلدىكتەر، مەملەكەتتىك تۇرعىن ءۇي قورىنان ءبىرىنشى كەزەكتە باسپانا بەرۋ، سىنىپتىق بىلىكتىلىگى ءۇشىن ۇستەمەاقى تولەۋ سياقتى شارالار جاتقىزىلعان.
«ازاماتتىق قورعانىس ورگاندارىنىڭ قۇتقارۋشىلارىنا قىزمەت سىنىبى، ءاردايىم توتەنشە جاعدايعا شىعۋعا دايىن جۇرەتىنى، راديوستانتسيالارمەن جۇمىس ىستەگەنى، تىم جوعارى نەمەسە تىم تومەن تەمپەراتۋرالاردا جۇمىس ىستەگەنى، قازا تاپقانداردىڭ دەنەلەرىمەن نەمەسە ءمايىت بولشەكتەرىمەن ءجيى بەتپە- بەت كەلەتىن پسيحيكالىق- ەموتسيونالدى جۇكتەمەسى ءۇشىن قوسىمشا اقىلار مەن ۇستەمەاقىلار كوزدەلگەن. توتەنشە جاعدايلار مينيسترلىگى (ت ج م) مۇددەلى مەملەكەتتىك ورگاندارمەن بىرلەسىپ، ازاماتتىق قورعانىس ورگاندارىنىڭ قىزمەتكەرلەرى مەن قۇتقارۋشىلارىن الەۋمەتتىك قامسىزداردىرۋ شارتتارىن جاقسارتۋ بويىنشا جۇيەلى جۇمىس جۇرگىزۋدە» دەلىنگەن پرەمەر- ءمينيستردىڭ جاۋابىندا.
ۇكىمەت باسشىسىنىڭ دەپۋتتارعا بەرگەن مالىمەتى بويىنشا، اتالعان الەۋمەتتىك قورعاۋ شارالارىن جەتىلدىرەتىن نورما جوباسى ءماجلىستىڭ قاراۋىندا جاتىر. ول قۇجات بويىنشا ەندى قۇتقارۋشىلار وزدەرى تۇرىپ جاتقان قىزمەتتىك باسپانانى مەنشىككە قاراتۋ تەتىتكەرى قاراستىرىلعان.
«ۇكىمەتتىڭ 2021 -جىلعى 22 -شىلدەدەگى 505 № قاۋلىسىمەن پارلامەنت ماجىلىسىنە ەنگىزىلگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قۇقىق قورعاۋ ورگاندارى، ونىڭ ىشىندە ازاماتتىق قورعانىس ورگاندارى قىزمەتكەرلەرىنىڭ الەۋمەتتىك كەپىلدىكتەرى مەن جەڭىلدىكتەرىن جاقسارتۋعا باعىتتالعان تۇزەتۋلەر كوزدەلگەن. بۇل - وزدەرى تۇرىپ جاتقان تۇرعىن ۇيلەردى مەنشىككە الۋ، قىزمەتكەرلەردىڭ بالالارىنا مەكتەپكە دەيىنگى بالالار مەكەمەلەرىندە كەزەكتەن تىس ورىن بەرۋ، قىزمەتكەر اۋرۋى سالدارىنان قايتىس بولعان جاعدايدا وتەماقى تولەۋ ماسەلەلەرى» ، - دەپ جازادى اسقار مامين.
