ەلتاڭبا اۆتورى جەكە قۇجاتتارىن ۇلتتىق ارحيۆ قورىنا تاپسىردى - فوتو
مۇندا، ەگەمەن ەلدىڭ ەلتاڭباسىن جاساعان اۆتور جانداربەك مالىبەك ۇلىنداي تۇلعانىڭ ءومىر جولى مەن شىعارماشىلىعى، تىڭ تۋىندىلارىنىڭ ءتۇپنۇسقا جوبالارى، قولجازبالارى مەن سۇبەلى سۇحباتتارى، جاريالانعان ەڭبەكتەرى، فوتو-بەينە ماتەريالدارى تاعى دا باسقا بارلىق قۇجاتتارى ۇلتتىق ارحيۆكە بەرىلدى.
ۇلتتىق ارحيۆ ديرەكتورى ساعيلا نۇرلانوۆانىڭ باسشىلىعىندا ارنايى قوردىڭ اشىلۋ سالتاناتى قۇجاتتىق، ماكەتتىك كورمەلەرمەن قوسا ۇلكەن ءىس-شارا بولىپ اتالىپ ءوتىلدى.
سالتاناتتى شاراعا بەلگىلى تۇلعالاردان ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى، اكادەميك ديحان قامزابەك ۇلى، مەملەكەت قايراتكەرى، قۇجاتتانۋشى جاقىپوۆ ءمىربولات حابي ۇلى، فيلولوگيا عىلىمدارىنىڭ دوكتورى، پروفەسسور سەرىك نەگيموۆ، جازۋشى، دراماتۋرگ، جۋرناليست، تاريحشى، فيلولوگ-عالىم جولتاي ءالماش ۇلى، ساياسي عىلىمدارىنىڭ دوكتورى، پروفەسسور ابدىجالەل قوشقار ۇلى، قازاق ۇلتتىق ونەر ۋنيۆەرسيتەتىنىڭ پروفەسسورى بايقوڭىر يجان ۇلى، قولجازبالار جانە سيرەك كىتاپتار ۇلتتىق ورتالىعىنىڭ باسشىسى جاندوس بەكدىلدا ۇلى قاتىستى.
اتالعان جينالىسقا قاتىسۋشىلار ەلتاڭبانىڭ تاريحى تۋرالى ءوز ويلارىمەن ءبولىستى.
جينالىستا ءسوز العان جانداربەك مالىبەكوۆ ەلتاڭبا تەك مەرەكەلىك شارالاردا عانا ەمەس، كۇندەلىكتى ومىردە كوبىرەك ناسيحاتتاۋ كەرەك ەكەنىن ايتتى.
«ەلدىڭ رامىزدەرىنىڭ كوبىرەك ناسيحاتتالۋى جاس ۇرپاقتىڭ وتانشىلدىق رۋحىن وياتادى»، - دەيدى ەلتاڭبا اۆتورى.
اتالعان ءىس-شارا سوڭىندا جانداربەك مالىبەكوۆ ءوزى ارنايى جاساتقان ەلتاڭبانىڭ توسبەلگىسىن ۇلتتىق ارحيۆ ديرەكتورى ساعيلا نۇرلانوۆاعا تارتۋ ەتتى.
ايتا كەتەيىك، بۇگىن قازاقستان رەسپۋبليكاسى ۇلتتىق ارحيۆىنىڭ ديرەكتورى ساعيلا نۇرلانوۆا تاۋەلسىزدىكتىڭ 30 جىلدىعى قارساڭىندا مەملەكەت باسشىسى قاسىم-جومارت توقايەۆتىڭ جارلىعىمەن «قۇرمەت» وردەنىمەن ماراپاتتالعان بولاتىن.
اۆتور: بەيسەن سۇلتان
