ۆلاديمير پۋتين ە ا ە و قۇرىلۋىنداعى ەلباسىنىڭ ەڭبەگىن اتادى

نۇر-سۇلتان. قازاقپارات - رەسەي فەدەراتسياسىنىڭ پرەزيدەنتى ۆلاديمير پۋتين قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ ە ا ە و قۇرۋداعى ەرەكشە ەڭبەگىن اتاپ ءوتتى، دەپ حابارلايدى قازاقپارات.

«شىنىندا دا، قازاقستاندىق ارىپتەسىمىزدىڭ ءسوزىن تاعى دا راستاعىم كەلەدى: قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ ءبىزدىڭ بىرلەستىگىمىزدى قۇرۋدىڭ باستاماشىسى بولدى. ونىڭ ماعان تەلەفون شالعانى دا ءالى ەسىمدە، سوندا ن. نازاربايەۆ رەسەيدىڭ جاقىن بولاشاققا باسىمدىق رەتىندە نە كورەتىنى تۋرالى ءبىرقاتار ماڭىزدى سۇراقتار قويدى. بۇل قازاقستان ءۇشىن دە، رەسەي ءۇشىن دە ينتەگراتسيالىق بىرلەستىك قۇرۋ باسىمدىق بولادى دەپ ۋاعدالاستىق، بۇل جونىندە بۇرىن دا ايتقانبىز»، - دەدى ۆلاديمير پۋتين جوعارى ەۋرازيالىق ەكونوميكالىق كەڭەستىڭ وتىرىسىندا.

ۆلاديمير پۋتين قازاقستاننىڭ تۇڭعىش پرەزيدەنتىنىڭ باستاماسىمەن بۇل پروتسەسس دامي باستاعانىن اتاپ ءوتتى.

«ال قازىر - بۇكىل الەمدىك ەكونوميكا ءۇشىن دە، ءبىزدىڭ ەكونوميكا ءۇشىن دە وسىنداي قيىن كەزەڭدە ءبارىنىڭ دۇرىس جاسالعانىن سەزىنىپ وتىرمىز. ءبىز قانداي دا ءبىر قيىندىقتارعا قاراماستان، بىرلەسكەن كۇش-جىگەردىڭ ارقاسىندا ءوزارا ساۋدانى ارتتىرا العانىمىزدى كورىپ وتىرمىز. قاسىم-جومارت كەمەل ۇلى ايتقانداي، بيىلعى توعىز ايدا وداققا مۇشە مەملەكەتتەر اراسىنداعى تاۋار اينالىمىنىڭ كولەمى شامامەن 16 پايىزعا وسكەن. ءبىزدىڭ ستاتيستيكا بويىنشا، بۇل 2019-جىلداعى ءتيىستى كورسەتكىشتەن 10 پايىزعا ارتىق. كەز كەلگەن جاعدايدا، بۇل جاقسى كورسەتكىش. ءوزارا ينۆەستيتسيالار، قارجى سەكتورى جانە ەڭبەك نارىعى تۇراقتى ديناميكانى كورسەتۋدە»، - دەدى ۆلاديمير پۋتين.