قازاقستان «قىرعي قاباق سوعىستىڭ» بۇرىنعى وشاعىن ءۇمىتتىڭ سيمۆولىنا اينالدىردى - پان گي مۋن
«الدىمەن بارلىق قاتىسۋشىلاردى قازاقستان رەسپۋبليكاسى تاۋەلسىزدىگىنىڭ 30 جىلدىعىمەن شىن جۇرەكتەن قۇتتىقتاۋعا رۇقسات ەتىڭىزدەر. قازاقستان مەن ورتالىق ازيا ايماعىنىڭ دوسى رەتىندە قازاقستاننىڭ سوڭعى 30 جىلدا قانشالىقتى العا باسقانى جونىندە وي جۇگىرتۋ مەن ءۇشىن كوڭىل سۇيسىنتەرلىك جايت. بارشاڭىزعا بەلگىلى، ءوز ەلىمنىڭ وتارشىلدىقتان سوعىسقا، ال دەموكراتيا ءۇشىن كۇرەستەن ەكونوميكالىق ءوسۋ مەن تۇراقتىلىققا قالاي جەتكەنىنىڭ كۋاسىمىن. كەدەيشىلىكتى، سوعىستى، ءوسۋ مەن ورنىقتىلىقتى ءوز كوزىممەن كورگەن مەن ءۇشىن قازاقستاننىڭ تابىستى وسۋگە، تۇراقتىلىققا جانە ايماقتاعى كوشباسشى بولۋعا اپاراتىن ءوز جولى مەن تراەكتورياسىنىڭ كۋاسى بولۋ زور ماقتانىش»، - دەدى ساياساتكەر.
سونداي-اق ب ۇ ۇ بۇرىنعى باس حاتشىسى ءوزىنىڭ تۋعان ەلى كورەيا رەسپۋبليكاسى مەن قازاقستاننىڭ ىنتىماقتاستىعى بەكي تۇسۋىنە تىلەكتەس ەكەنىن ءبىلدىردى.
«مەن بۇل تابىسقا نەگىزىنەن قازاقستاننىڭ تۇڭعىش پرەزيدەنتى جوعارى مارتەبەلى نۇرسۇلتان نازاربايەۆ پەن قازاقستان باسشىلىعىنىڭ ارقاسىندا قول جەتكىزىلدى دەپ سانايمىن. ولار «قىرعي قاباق سوعىستىڭ» بۇرىنعى وشاعىن ءۇمىتتىڭ، حالىقارالىق ىنتىماقتاستىق پەن يادرولىق قارۋدان ازا اۋماقتىڭ سيمۆولىنا اينالدىردى. قازاقستاننىڭ تاۋەلسىزدىگىنىڭ العاش مويىنداعان ەلدەردىڭ ءبىرى كورەيا مەن قازاقستان اراسىنداعى تىعىز ەكىجاقتى قارىم-قاتىناستار تۋرالى ءارقاشان ەرەكشە ىقىلاسپەن ويلايتىن بولام. قازاقستاننىڭ ايماقتىق كوشباسشى رەتىندە وركەندەۋى جالعاسىپ وتىرعاندىقتان، ايماقتىق تۇراقتىلىقتى ساقتاۋعا، كورەيامەن قارىم-قاتىناسىن نىعايتۋعا جانە 2030-جىلعا دەيىنگى ورنىقتى دامۋعا باعىتتالعان بارلىق يگى ۇمتىلىستارىندا قازاقتاننىڭ تابىسقا جەتۋىنە تىلەكتەسپىن. ءبىز COVID-19 پاندەمياسى باستالۋىنىڭ ەكى جىلدىق مەجەسىنە بىرتىندەپ جاقىنداعان سايىن قازاقستان حالقىنا زور دەنساۋلىق پەن تابىس تىلەيمىن. الداعى 30 جىل ىشىندە جانە ودان كەيىنگى كەزەڭدە بەيبىتشىلىك پەن وركەندەۋدى تىلەيمىن»، - دەدى پان گي مۋن.
