ەلباسى جوعارى ەۋرازيالىق ەكونوميكالىق كەڭەستىڭ وتىرىسىنا قاتىستى
جيىندا ەۋرازيا ەكونوميكالىق وداعى قىزمەتىنىڭ وزەكتى ماسەلەلەرى، 2021-جىلداعى ىنتىماقتاستىق قورىتىندىلارى، سونداي-اق وداققا مۇشە ەلدەردىڭ الداعى كەزەڭدەگى ءوزارا ەكونوميكالىق ىقپالداستىعىن دامىتۋ جوسپارى تالقىلاندى.
جوعارى ەۋرازيالىق ەكونوميكالىق كەڭەستىڭ قۇرمەتتى ءتوراعاسى ءوز سوزىندە پاندەميا مەن داعدارىستاردى ەڭسەرۋ، ەش شەكتەۋلەرسىز ورتاق ىشكى نارىق قاعيداتتارىن ساقتاۋ، سونداي-اق قازىرگى زامانعا ساي دامۋدىڭ جاڭا باعىتتارىن ايقىنداۋ ءۇشىن بىرلەسكەن شارالار قابىلداۋ قاجەتتىگىن اتاپ ءوتتى.
سونىمەن قاتار ەلباسى ەۋرازيا ەكونوميكالىق وداعى اۋماعىندا يمپورتتى الماستىراتىن باعدارلامالار ازىرلەۋ مۇمكىندىگىن ايتىپ، بۇل قادام ينتەگراتسيالىق بىرلەستىككە مۇشە ەلدەردىڭ ازاماتتارى ءۇشىن جاڭا جۇمىس ورىندارىن اشۋعا ىقپال ەتەتىنىنە نازار اۋداردى.
«بۇگىندە ەۋرازيا ەكونوميكالىق وداعىنا مۇشە مەملەكەتتەردىڭ ەكونوميكالىق بەلسەندىلىگىن ارتتىرۋ جۇمىستارىن كۇشەيتۋ قاجەت. جاھاندىق سەنىم داعدارىسى مەن گەوساياسي شيەلەنىس جاعدايىندا وداقتى ساقتاپ قالۋدىڭ جانە نىعايتۋدىڭ ماڭىزى زور. ول جاڭا قاتىسۋشىلارعا اشىق ءارى باسقا ينتەگراتسيالىق بىرلەستىكتەرمەن ىنتىماقتاستىققا دايىن. تەك بارلىق تاراپتىڭ ۇيلەسىمدى كۇش-جىگەرى ءبىزدىڭ ەكونوميكالارىمىزدىڭ ءوسىمىن قالپىنا كەلتىرۋدىڭ كىلتى بولىپ سانالادى»، - دەدى نۇرسۇلتان نازاربايەۆ.
ەلباسى قازاقستاننىڭ ەۋرازيا ەكونوميكالىق وداعىنا ءتوراعالىعىن قورىتىندىلاي كەلە، وزبەكستانعا بايقاۋشى مەملەكەت مارتەبەسى بەرىلگەنىن جانە ەۋرازيالىق ەكونوميكالىق كوميسسيا مەن شاڭحاي ىنتىماقتاستىق ۇيىمى حاتشىلىعى اراسىنداعى ءوزارا تۇسىنىستىك تۋرالى مەموراندۋمعا قول قويىلعانىن قۇپتايتىنىن اتاپ ءوتتى.
سونداي-اق نۇرسۇلتان نازاربايەۆ ازەربايجان رەسپۋبليكاسىن ەۋرازيا ەكونوميكالىق وداعىنا بايقاۋشى مەملەكەت رەتىندە شاقىرۋ مۇمكىندىگى تۋرالى ايتتى.
قازاقستاننىڭ تۇڭعىش پرەزيدەنتى ەۋرازيا ەكونوميكالىق وداعىنىڭ ەۋروپالىق وداقپەن، شاڭحاي ىنتىماقتاستىق ۇيىمىمەن جانە تۇركى مەملەكەتتەرى ۇيىمىمەن ىنتىماقتاستىعىن ودان ءارى نىعايتا ءتۇسۋ ءۇشىن «ۇلكەن ەۋرازيا» ءتورتجاقتى ەكونوميكالىق فورۋمىن قۇرۋدى ۇسىندى.
