ۇ ب ت: ۇلتتىق تەستىلەۋ ورتالىعى تەگىن ونلاين ساباق وتكىزىپ جاتىر
ۇ ب ت: ۇلتتىق تەستىلەۋ ورتالىعى تەگىن ونلاين ساباق وتكىزىپ جاتىر
نۇر-سۇلتان. قازاقپارات - ۇلتتىق تەستىلەۋ ورتالىعى ۇ ب ت- عا دايىندالۋعا ارنالعان تەگىن ونلاين ساباقتار وتكىزىپ جاتىر، دەپ حابارلايدى قازاقپارات ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
اتالمىش ورتالىق ۇلتتىق ءبىرىڭعاي تەستىلەۋدى ۇيىمداستىرۋمەن جانە وتكىزۋمەن اينالىسادى. ونلاين ساباقتار ءىرى رەسپۋبليكالىق ءبىلىم بەرۋ ورتالىقتارىمەن بىرلەسىپ ازىرلەندى. ساباقتار ءبىلىم بەرۋ ورتالىقتارىنىڭ YouTube ارنالارىندا تىكەلەي ەفيردە وتكىزىلەدى. ونلاين ساباقتىڭ بارلىق ەفيرى ساقتالادى، ياعني ونى تالاپكەر كەز-كەلگەن ۋاقىتتا كورە الادى.
«مينيسترلىك تەستىلەۋ كەزىندە عانا ەمەس، ونىڭ باستالۋىنا دەيىن دە قولايلى جاعداي جاساۋ ءۇشىن جۇمىس جۇرگىزىپ جاتىر. تۇلەكتەردىڭ ۇ ب ت- عا دايىندىعىن ۇلتتىق تەستىلەۋ ورتالىعى ءبىلىم بەرۋ ورتالىقتارىمەن بىرلەسىپ ەكىنشى جىل وتكىزىپ وتىر. بىلتىر 376 ساعات ونلاين ساباق وتكىزىلدى. وعان ەلىمىزدىڭ بارلىق ءوڭىرىنىڭ مەكتەپ تۇلەكتەرى قاتىستى. ولار قازاق ءتىلى، قازاق ادەبيەتى، قازاقستان تاريحى، ماتەماتيكا، حيميا، بيولوگيا، فيزيكا، گەوگرافيا جانە باسقا دا پاندەر بويىنشا دايىندىقتان ءوتتى. بيىل وتكەن جىلمەن سالىستىرعاندا تۇلەكتەردى قابىلداۋ ەمتيحاندارىنا دايىنداۋعا قاتىسىپ جاتقان ءبىلىم بەرۋ ورتالىقتارى مەن ونلاين پلاتفورمالار سانى ارتتى. جوبا بيۋدجەت قاراجاتىن جۇمساماي ىسكە اسىرىلعانىن اتاپ وتكىم كەلەدى»، - دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
تالاپكەرلەرگە ارنالعان ونلاين ساباقتار وسى وقۋ جىلىنىڭ سوڭىنا دەيىن جالعاسادى. تەگىن ونلاين ساباقتار مىنا كەستە بويىنشا وتكىزىلەدى:
• Qazbilim ورتالىعى Youtube كانالىندا https://www.youtube.com/c/QAZBILIMTV تىكەلەي ەفيردە قازاق تىلىندە كۇن سايىن ساعات 20.00-دە (نۇر-سۇلتان قالاسىنىڭ ۋاقىتى بويىنشا)؛
• Educon Dostyk -تىڭ YouTube ارناسىندا تىكەلەي ەفيردە ءار سەيسەنبى كۇنى ساعات 19.00-دە قازاق تىلىندە، ساعات 20.00-دە ورىس تىلىندە؛
• Zerdeli - ءار سەيسەنبى مەن بەيسەنبى كۇندەرى ساعات 20.00-دە YouTube ارناسىندا؛
• Sabaq online ءار سەنبى سايىن ساعات 15.00-دە YouTube ارناسىندا؛
• Samga جۇما كۇنى ساعات 20.00-دە YouTube ارناسىندا؛
• Daryn online ءار سەيسەنبى، سارسەنبى، بەيسەنبى جانە جۇما كۇندەرى ساعات 18.00-دە YouTube ارناسىندا تىكەلەي ەفيردە دايىندىق ساباقتارىن وتكىزەدى.
