مەملەكەتتىك قىزمەتشىلەردىڭ ايلىعى نە ءۇشىن كوتەرىلدى
«مەملەكەتتىك قىزمەتتىڭ باسەكەگە قابىلەتسىز جۇمىس بەرۋشىگە اينالعانى سونشا، كوپتەگەن ساراپشى دەڭگەيىندەگى قۇجات ازىرلەي الاتىن ماماندار «ياندەكس تاكسي» سياقتى قىزمەت كورسەتۋ سالاسىندا كوبىرەك تابىس تابا باستادى. ءبىرىنشى كەزەكتە ءبىز وڭىرلەردەگى مەملەكەتتىك قىزمەتشىلەردىڭ ايلىعىن كوتەردىك. ويتكەنى، اسىرەسە، جەرگىلىكتى اكىمدىكتەردە بىلىكتىلىك ماسەلەسى وزەكتى بولدى»، - دەگەن داۋرەن ابايەۆ ايلىق كوتەرىلگەننەن بەرى قىزمەتكەر ىرىكتەۋ كونكۋرستارىندا باسەكە پايدا بولعانىن اتادى.
«بۇرىن قالاي ەدى؟ اكىمدىك ساراپشى لاۋازىمىنا كونكۋرس جاريالادى دەيىك. ءبىر ادام عانا ءوتىنىم بەرەتىن. سەبەبى ايلىعى وتە از بولدى. سەنىڭىز، مۇنداي جاعدايدا ونىڭ قۇزىرەتتىلىگىن ەشكىم تەكسەرمەيدى دە. جۇمىس ىستەۋگە كەلىسسە بولدى دەيدى. ال ايلىقتى كوتەرىپ ەدى، كونكۋرسقا تۇسەتىن وتىنىمدەردىڭ سانى 7 ەسە ءوستى-اۋ دەيمىن. كونكۋرس قانشالىقتى باسەكەلى بولسا، ىرىكتەلەتىن ماماننىڭ ساپاسى دا سونشالىقتى جوعارى بولادى. ياعني، ىرىكتەۋگە مۇمكىندىك بار. ارينە، مۇنداي ىرىكتەۋدەن ءوتىپ الىنعان ماماننىڭ قاتەلىگى دە الدەقايدا از بولادى. سونىڭ ارقاسىندا حالىقتىڭ ءومىر ساپاسىنا تيگىزەر پايداسى دا كوبىرەك بولادى»، - دەدى «اشىق ديالوگ» سۇحباتىنىڭ تۇراقتى قوناعى.
ايتۋىنشا، مەملەكەتتىك قىزمەتشىنىڭ ايلىعى موينىنا ارقالايتىن جاۋاپكەرشىگىنە ساي كوتەرىلگەن.
«تاعى ءبىر ماسەلە جاۋاپكەرشىلىك دەڭگەيىنە كەلىپ تىرەلەدى. ەلەستەتىپ كورىڭىز، ءبىر مينيسترلىكتەگى نەمەسە اكىمدىكتەگى قانداي دا ءبىر باسقارمانىڭ باسشىسى جۇزدەگەن ميلليون تەڭگەنىڭ قۇجاتىنا قول قويادى. تەكسەرۋشى ورگاندار سول قۇجاتتان ءتىپتى جالعىز فورمالدى قاتە تاپسا، سول ءۇشىن ارقالايتىن جاۋاپكەرشىلىكتىڭ قۇنىنا بۇعان دەيىن الىپ كەلگەن 150 مىڭ تەڭگە ايلىعى تاتي ما؟ ال تۇتاس ءبىر سالانىڭ نەمەسە وڭىرلەردىڭ دامۋىنا جاۋاپتى مينيسترلەر مەن اكىمدەردىڭ جاۋاپكەرشىلىگى تۋرالى ايتۋدىڭ ءوزى ارتىق»، - دەدى داۋرەن ابايەۆ.
