الماتىدا اۋقىمدى جەر سىلكىنىسىنىڭ قاۋپى قانداي

نۇر- سۇلتان. قازاقپارات - بۇگىن ماجىلىستەگى ازاماتتىق قورعاۋ جۇيەسىنە قاتىستى ۇكىمەت ساعاتىندا دەپۋتات دۇيسەنباي تۇرعانوۆ ەلدەگى سەيسميكالىق قاۋىپسىزدىك ماسەلەسىن كوتەردى، دەپ حابارلايدى قازاقپارات ءتىلشىسى.

«ساراپشىلاردىڭ باعالاۋى بويىنشا الماتىداعى جويقىن جەر سىلكىنىسى جاعدايىندا عيماراتتاردىڭ 60 پايىزعا دەيىنگى كولەمى بۇزىلۋى مۇمكىن، كەلتىرىلەتىن تىكەلەي شىعىن 200 ميلليارد تەڭگەگە جەتۋى ىقتيمال. قانشا عيمارات پەن قۇرىلىس نىساندارى پاسپورتتاۋمەن قامتىلعان؟ سەيسميكالىق جاعدايدىڭ جاڭا كارتالارىن ەسكەرە وتىرىپ، قۇرىلىس نورمالارى ازىرلەندى مە؟ بۇل كارتالار جاريا تۇردە قاشان شىعارىلادى»، - دەپ سۇرادى ءماجىلىس دەپۋتاتى دۇيسەنباي تۇرعانوۆ.

ءوز كەزەگىندە توتەنشە جاعدايلار ءمينيسترى يۋريي يلين اتالعان تاۋەكەلدەر شىنىمەن دە بار ەكەنىن مويىندادى.

«الماتىدا ءىرى اۋقىمداعى جەر سىلكىنىسىنىڭ قاۋپى بار. ونىڭ سالدارىنان تۇرعىنداردىڭ كوبىسىنە قاتەر ءتونۋى مۇمكىن. بۇل رەتتە ومىرىنە قاۋىپ تونەتىندەر مەن جاراقات الاتىنداردىڭ سانىنا قاتىستى ساراپشىلار ءارتۇرلى مالىمەتتەردى ايتىپ وتىر. سەبەبى باعالاۋ جۇرگىزۋدىڭ ءتۇرلى ادىستەرى بار»، - دەدى مينيستر.

ونىڭ ايتۋىنشا، سەيسميكاعا توزىمدىلىك بويىنشا باعدارلاما قارجىلاندىرۋدىڭ بولماۋىنان ءتيىستى دەڭگەيدە جۇزەگە اسىرىلمادى.

«قاراجاتتىڭ تاپشىلىعىنان كوپتەگەن باعدارلاما قىسقارتىلدى. بىزدە پاندەميا قاراجاتتىڭ ەلەۋلى كولەمىن شەكتەدى، ونىڭ ىشىندە توتەنشە جاعدايدىڭ الدىن الۋعا قاتىستى. اكىمدىك تاراپىنان قاراجات ءبولىندى. الماتىداعى بارلىق نىسانداردىڭ پاسپورتتاۋى جۇرگىزىلدى. دەرەكتەر بازاسى ساۋلەت جانە قۇرىلىس باقىلاۋ دەپارتامەنتىندە تۇر جانە جوبانى ارى قاراي ىسكە اسىرۋدا پايدالانىلىپ كەلەدى»، - دەدى ۆەدومستۆو باسشىسى.

اۆتور: رۋسلان عابباسوۆ