تۇركىستان وبلىسىندا اناسىنا رەنجىگەن ەكى وقۋشى قىز ۇيدەن كەتىپ قالعان

لەڭگىر. قازاقپارات - تۇركىستان وبلىسىندا جوعالعان ەكى بىردەي جاس ءوسپىرىم قىز تابىلدى، دەپ حابارلايدى قازاقپارات.

تولەبي ا پ ب-عا جەرگىلىكتى 2 ايەل حابارلاسىپ، وزدەرىنىڭ 9-سىنىپ وقيتىن قىزدارى مەكتەپكە كەتىپ، سودان حابارسىز كەتكەنىن كورسەتكەن. 14 جاسار قىزداردىڭ انالارى ءوز بەتىنشە ىزدەپ تاپپاعان سوڭ پوليتسيا قىزمەتكەرلەرىنەن كومەك سۇرايدى. ءتارتىپ ساقشىلارى حابار الىسىمەن كامەلەت جاسىنا تولماعان ەكى بىردەي قىزدى تابۋعا بىردەن كىرىستى.

بارۋى مۇمكىن دەگەن ايماقتاردى ءجىتى باقىلاپ، بارلىق تۋىستارى مەن دوستارىنان جاۋاپ الدى. وسىلايشا پوليتسەيلەر تاباندىلىقپەن جاسالعان جۇمىستىڭ ناتيجەسىندە از ۋاقىت ىشىندە جوعالعان ەكى قىزدى مەگوپوليستەن تاپتى. بەلگىلى بولعانداي، قىزدار جوعالاردان بۇرىن وتباسىندا اتا- اناسىنىڭ اراسىندا جانجال تۋىنداعان. وسىنىڭ سالدارىنان ەكى قىز ءوزارا اقىلداسىپ، ۇيدەن كەتىپ قالۋدى كوزدەگەن. سودان سوڭ مەكتەپتەن شىعىپ، وزدەرىنىڭ جيناپ جۇرگەن اقشاسىن الىپ، شىمكەنت قالاسىنا قاراي باعىت العان.

ءوز كەزەگىندە جاس ءوسپىرىم قىزداردىڭ امان-ەسەن تابىلعانىنا قۋانعان انالارى تولەبي پوليتسيا قىزمەتكەرلەرىنە شىن جۇرەكتەن العىسىن جەتكىزدى. تۇركىستان وبلىسىنىڭ پوليتسەيلەرى اتا-انالارعا قىراعى بولۋدى جانە بالالارىن قاراۋسىز قالدىرماۋ قاجەتتىگىن ەسكەرتەدى.

«سونىمەن قاتار قىزدارىڭىزبەن سىرلاسىپ، ويىن تولىق تىڭداۋعا شاقىرادى. بالالارىڭىز نەمەسە جاقىندارىڭىز اداسىپ، جوعالعان جاعدايدا، تەز ارادا 102 تەلەفونى ارقىلى پوليتسياعا حابارلاسىڭىزدار» دەيدى پوليتسەيلەر.