مونبلانداعى قازىنا: الپينيستكە باعالى تاستاردىڭ جارتىسى بەرىلەدى
بۇل قوراپ مۇزدىقتىڭ ۇستىندە 1950 نەمەسە 1966 -جىلدارى Air India ۇشاعى اپاتقا ۇشىراعان كەزدە ءتۇسىپ قالۋى مۇمكىن، دەپ حابارلايدى قازاقپارات BBC- گە سىلتەمە جاساپ.
ەسىمى جاريا ەتىلمەگەن الپينيست 2013 -جىلى مونبلان تاۋىنداعى مۇزدىقتان مەتالل قوراپ تاۋىپ العان. باعالى تاستاردىڭ جانىنداعى پاكەتتەردە «ءۇندىستاندا جاسالعان» دەگەن جازۋ بولعان. سوندىقتان، فرانسۋز بيلىگى ونىڭ جارتى عاسىردان استام ۋاقىت بۇرىن مونبلاندا اپاتقا ۇشىراعان ءۇندى لاينەرىنىڭ جولاۋشىلارىنىڭ بىرىنە تيەسىلى دەپ بولجاعان. باعى بار الپينيست فرانسيا زاڭىنا سايكەس، تاپقان ولجاسىن پوليسياعا الىپ بارىپ، وسى ۋاقىتقا دەيىن باعالى زاتتاردىڭ يەسىنىڭ تۋىستارى تابىلار ما ەكەن دەپ كۇتكەن. ءبىراق، ولار تابىلمادى. ەندى، سەگىز جىلدان كەيىن شاموني كوممۋناسىنىڭ بيلىگى زاڭعا سايكەس الپينيستپەن باعالى زاتتاردى تەڭدەي بولىسكەن. ونىڭ ءاربىر بولىگى 150 مىڭ ەۋرو دەپ باعالانىپ وتىر.
شاموني ءمەرى ەريك فۋرنە فرانس- پرەسس اگەنتتىگىنە وسى تۋرالى ايتا وتىرىپ، ءالپينيستى زاڭعا باعىنعانى ءۇشىن ماقتاپ وتىر. مونبلاندا وتكەن عاسىردا ەكى ءۇندى لاينەرى قۇلاعان. 1950 -جىلعى اپاتتان 48 ادام، 1966 -جىلى - 117 ادام مەرت بولدى. فرانسيا بيلىگى باعالى تاستاردى بومبەيدەن (قازىرگى مۋمباي) نيۋ- يورككە ۇشقان ەكىنشى لاينەردىڭ جولاۋشىسى وزىمەن بىرگە الىپ بارا جاتقان دەپ بولجاپ وتىر. الپينيستەر ەكى اپاتتان كەيىن بىرنەشە ۋاقىت وتسە دە مونبلاننان جۇك قالدىقتارى مەن ادام سۇيەكتەرىن تاۋىپ وتىرعان.
2012 -جىلى تاۋ بوكتەرىنەن ءۇندىستاننان ديلوماتيالىق پوشتا سالىنعان قاپ تابىلعان ەدى. وندا 1966 -جىلعى گازەتتەر، كۇنتىزبەلەر مەن جەكە حاتتار بولعان. 1966 -جىلى اۋە اپاتىنان ءۇندى يادرولىق باعدارلاماسىنىڭ اكەسى حومي دجەحانگير بابا قازا تاپقان.
