10:35, 30 - قاراشا 2021 | GMT +5
قازاقستان مىسىرمەن اۋە قاتىناسىن توقتاتادى
نۇر- سۇلتان. قازاقپارات - قازاقستان 3-جەلتوقساننان باستاپ مىسىرمەن اۋە قاتىناسىن توقتاتادى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءبىرىنشى ۆيتسە- ءمينيسترى مارات شورانوۆ ايتتى، دەپ حابارلايدى قازاقپارات ءتىلشىسى.
«بەلگيادا مىسىردان كەلگەن ادامنان «وميكرون» شتاممىنىڭ كوروناۆيرۋس ينفەكتسياسى جاعدايىنىڭ انىقتالعانىن جانە مىسىردان كەلەتىن جولاۋشىلار سانىن ەسكەرە وتىرىپ، مىسىرمەن اۋە قاتىناسىن توقتاتىلا تۇرادى»، - دەدى ءبىرىنشى ۆيتسە- مينيستر.
سونىمەن قاتار مارات شورانوۆ قازاقستان رەسپۋبليكاسى اۋماعىندا اينالىمدا جۇرگەن كورونوۆيرۋس ينفەكتسياسى شتامدارىن سەكۆەنەرلەۋ زەرتتەۋ جۇمىستارى جالعاساتىندىعىن اتاپ ءوتتى.
بۇعان دەيىن ءبىرىنشى ۆيتسە- مينيستر «وميكرون» شتامىنىڭ جاڭا نۇسقاسىنىڭ پايدا بولۋىن بايلانىستى وسى جىلعى 3-جەلتوقساننان باستاپ ەلىمىزدە ءبىرقاتار شەكتەۋ ءىس- شاراسى ەنگىزىلەتىندىگىن ايتقان ەدى.
