تارازدا «اناعا تاعزىم» رەسپۋبليكالىق انالار فورۋمى ءوتتى
«اناعا تاعزىم» رەسپۋبليكالىق انالار فورۋمىنىڭ اشىلۋىندا جامبىل وبلىسىنىڭ اكىمى بەردىبەك ساپاربايەۆ ق ر مەملەكەتتىك حاتشى قىرىمبەك كوشەربايەۆتىڭ قۇتتىقتاۋ حاتىن وقىپ بەردى. ەل تاۋەلسىزدىگىنىڭ 30 -جىلدىعىنا ارنالعان شارا «كونە تاراز» تاريحي- ەتنومادەني كەشەنىندە ۇيىمداستىرىلدى. وعان ەلىمىزدىڭ تۇكپىر- تۇكپىرىنەن كەلگەن قۇرمەتتى قوناقتار- ەلىمىزدىڭ الەۋمەتتىك- ەكونوميكالىق، مادەنيەت، سپورت، بيزنەس، ءبىلىم مەن عىلىمنىڭ دامۋىنا ۇلەس قوسىپ جۇرگەن ايەلدەر، تانىمال نازىك جاندىلار، كوپ بالالى انالار قاتىستى.
ايماق باسشىسى جۋىردا عانا تاراز قالاسىندا بوي كوتەرگەن «اناعا تاعزىم» ورتالىعى قازاق حالقىنىڭ سالت- ءداستۇرىن ەسكەرە وتىرا ايەلدىڭ وتباسىنداعى ءرولىن كۇشەيتۋگە، بولاشاق انالاردى تاربيەلەۋگە باعىتتالاتىنىن جەتكىزدى. فورۋم باستالماس بۇرىن كەشەندى ارالاپ، تانىسقان قوناقتار دا قولعا الىنىپ جاتقان يگى جۇمىستارعا وڭ باعاسىن بەردى.
«بۇگىنگى «اناعا تاعزىم» فورۋمى سۇلۋلىق پەن ىزگىلىكتىڭ بەينەسى سانالىپ، سونداي- اق، تۇتاس ەلىمىزدىڭ دامۋىنا ۇيىتقى بولار قازاقتىڭ اناسى دەگەن اتقا لايىق، XXI عاسىر ايەلىنىڭ قالىپتاسۋىنا ءوز ۇلەسىن تيگىزەدى دەپ ويلايمىن. قازاقتا «اكە ۇلدى تاربيەلەيدى، انا تۇتاس ۇلتتى تاربيەلەيدى» دەگەن قاناتتى ءسوز بار. راسىندا، انا بالاسىنا بەرگەن تاربيەسى ارقىلى بولاشاقتىڭ قالىپتاسۋىنا دا ىقپال ەتەدى. سىزدەر ەلىمىزدىڭ دامۋى مەن وركەندەۋىنە، قوعامدىق- ساياسي جانە رۋحاني الەۋەتىن ىسكە اسىرۋعا بەلسەندى اتسالىسىپ كەلەسىزدەر. قازىرگى كەزدە ءبىزدىڭ وبلىسىمىزدا 36629 اسا كوپبالالى انا بار بولسا، ونىڭ 19212 ءى «التىن» جانە «كۇمىس» القا يەگەرلەرى. اتامەكەن كاسىپكەرلىك پالاتاسى جانىنان قۇرىلعان «ىسكەر ايەلدەر» كەڭەسىنە 25 تەن استام كاسىپكەر ايەلدەر مۇشەلىك ەتۋدە. وبلىستىق دەپۋتاتتىق كورپۋسىنىڭ - 33 پايىزىن ايەل- ازاماتشالار قۇرايدى. قازاقتىڭ وسىنداي مىقتى ارۋلارى باردا ەلدىڭ ەرتەڭىنە دەگەن سەنىمىمىز ارتا تۇسەتىنى ءسوزسىز»، - دەدى بەردىبەك ساپاربايەۆ.
بۇدان سوڭ ءسوز العان قازاقستان حالقى اسسامبلەياسى رەسپۋبليكالىق انالار كەڭەسىنىڭ ءتورايىمى، قازاقستان رەسپۋبليكاسى پرەمەر- ءمينيسترىنىڭ كەڭەسشىسى ءنازيپا شاناي دا ءوز ويىن ورتاعا سالدى. شارانىڭ ماڭىزىن تىلگە تيەك ەتىپ، انا مەن بالانى قولداۋ، وتباسىلىق قۇندىلىقتاردى نىعايتۋ جانە دامىتۋ - مەملەكەتتىڭ الەۋمەتتىك ساياساتىنىڭ باستى باعىتتارىنىڭ ءبىرى ەكەندىگىن باسا ايتتى.
«ايەلدىڭ باستى ميسسياسى - دۇنيەگە ۇرپاق اكەلۋ. ۇيادا بالا نە كورسە، ۇلكەن ومىرگە قانات قاعىپ ۇشقاندا سونى ىستەيدى. بالا تاربيەسىندە انانىڭ ءرولىن ايتىپ جەتكىزۋ مۇمكىن ەمەس»، - دەدى ن. شاناي.
قوعام قايراتكەرى، مەلەكەتتتىك ءتىلدىڭ جاناشىرى اسىلى ءالي قىزى وسمان ۇرپاق تاربيەسى تاقىرىبىندا ءسوز قوزعادى.
«بۇگىنگى ءوتىپ جاتقان فورۋمنىڭ ەرەكشە ءمانى بار. ءدال وسى قوعامدا قازاقتىڭ بويىنا بىتكەن اسىل قاسيەتتەرى بىزدەن الشاقتاپ بارا جاتىر. سول الشاقتىقتىڭ ورنىن تولتىرۋعا انالار ۇلكەن ۇلەس قوسادى. ءتالىم- تاربيە انانىڭ اق سۇتىمەن، بەسىك جىرىمەن بالانىڭ بويىنا داريدى. ۇلى تۇلعالاردا اق جاۋلىقتى انالاردىڭ ءتالىمىن الادى. مەنىڭ پايىمىمشا، بۇگىنگى قوعامدا ەڭ الدىمەن تاربيەگە باسىمدىق بەرۋ قاجەت. ول - ۇلتتىق تاربيە بولۋى ءتيىس. ياعني، ءبىلىم - الەمدىك، تاربيە - ۇلتتىق بولعانى ءجون. قازاقتىڭ ءبىلىمى دە، بىلىگى دە اسىپ تۇر.
«اتادان - وسيەت، انادان قاسيەت دەگەن اتالى ءسوز بار. ونە بويى دانالىققا، اقىلى دارياداي اتا- اجەلەرىمىز ءاربىر شاڭىراقتا، وڭىردە بار. قازاقتىڭ سالت- ءداستۇرىن، ادەت- عۇرپىن ساقتاعان جانۇيالار دا جەتەرلىك. ءبىز سول وتباسىلاردى، قاريالارىمىزدى قوعامعا، جاستارعا ناسيحاتتاۋىمىز ءتيىس - دەپ اتاپ ءوتتى مەملەكەت جانە قوعام قايراتكەرى، «ءۇش بايلىق» قوعامدىق بىرلەستىگىنىڭ ءتورايىمى ورازكۇل اسانعازى قىزى.
بۇدان سوڭ اقىن، مەملەكەتتىك سىيلىق يەگەرى اقۇشتاپ باقتىگەرەيەۆا، ق ر ايەلدەر كۇشتەرى جانە قازاقستان ىسكەر ايەلدەرى قاۋىمداستىعىنىڭ پرەزيدەنتى راۋشان سارسەمبايەۆا، تۇركيا ەلىنەن ارنايى كەلگەن بۋرسا ايماعىنداعى اۋىل ايەلدەرى قاۋىمداستىعىنىڭ ءتورايىمى سەرمين چاكالىوگلۋ، بەلگىلى ەتنوديزاينەر، «التىن وردا» ديزاين ءۇيىنىڭ نەگىزىن قالاۋشى ىرزا تۇرسىنزادا، اتىراۋ وبلىسى اكىمىنىڭ ورىنباسارى باقىتگۇل حامەنوۆا، قازاق ۇلتتىق پەداگوگيكالىق قىزدار ۋنيۆەرسيتەتىنىڭ رەكتورى گۇلميرا قاناي، بەلسەندىسى، كوپبالالى انا التىن كانيكار جانە تاعى باسقالار ءسوز الىپ، وي- ۇسىنىستارىن ءبىلدىردى.
ايماق باسشىسى بەردىبەك ساپاربايەۆ ايتىلعان بارلىق ۇسىنىستار نازارعا الىناتىنىن ايتتى.
