تۇرىك تەلەارناسى «توميريس» فيلمىنىڭ جەلىسى بويىنشا سەريال تۇسىرەدى
جوبانى تۇركيانىڭ جەتەكشى تەلەارناسى TRT تەلەراديوكورپوراتسياسى جۇزەگە اسىرادى. بۇل تۋرالى ق ر مادەنيەت جانە سپورت ءمينيسترى اقتوتى رايىمقۇلوۆانىڭ جاقىندا ىستامبۇلدا وتكەن Korkut Ata Turkic World Film Festival تۇرىك ارناسىنىڭ وكىلدەرىمەن كەزدەسۋىنەن كەيىن بەلگىلى بولدى.
اتالعان باسقوسۋعا «قازاقفيلم» كينوستۋدياسىنىڭ باسشىلىعى - پرەزيدەنتى اقان ساتايەۆ پەن ۆيتسە- پرەزيدەنت ايدار باتالوۆ تا قاتىسقان بولاتىن.
ايتا كەتەيىك، «قورقىت اتا» فەستيۆالىنىڭ شىمىلدىعىن اشقان «توميريس» فيلمى تۇرىك جۇرتشىلىعىنا جاقسى تانىس. قىركۇيەك ايىندا ماسساگەتتەر حانشايىمى تۋرالى كينوتۋىندى تۇركيادا 200-دەن استام كينوتەاتردا كورسەتىلىپ، كورەرمەننىڭ ۇلكەن قىزىعۋشىلىعىن تۋدىردى. سونىمەن قاتار فەستيۆال بارىسىندا تۇركى الەمى ەلدەرىنىڭ كينەماتوگرافيا سالاسىنداعى ىنتىماقتاستىعىن دامىتۋعا تىڭ سەرپىن بەرەتىن ماڭىزدى قۇجاتقا قول قويىلدى.
كەلىسىمگە ق ر مادەنيەت جانە سپورت ءمينيسترى اقتوتى رايىمقۇلوۆا، ءازىربايجان رەسپۋبليكاسىنىڭ مادەنيەت ءمينيسترى انار كەريموۆ، قىرعىز رەسپۋبليكاسى مادەنيەت، اقپارات، سپورت جانە جاستار ساياساتى ءمينيسترى ازامات جامانقۇلوۆ، «وزبەك كينو» ۇلتتىق اگەنتتىگىنىڭ باس ديرەكتورى فيرداۆس ابدۋحاليكوۆ جانە تۇركيانىڭ مادەنيەت جانە تۋريزم ءمينيسترى مەحمەت ەرسوي قول قويدى.
قۇجات اياسىندا تاراپتار تۇركى الەمىنىڭ كينويندۋسترياسىن قولداۋعا باعىتتالعان بىرلەسكەن قور قۇرۋعا كەلىستى. سونداي- اق، فەستيۆال اياسىندا اقتوتى رايىمقۇلوۆا «قازاقفيلم» كينوستۋدياسىنىڭ باسشىلىعىمەن بىرگە بەلگىلى تۇرىك كينەماتوگرافيستەرىمەن جانە فەستيۆال قاتىسۋشىلارىمەن ءبىرقاتار كەزدەسۋلەر وتكىزىپ، بىرلەسكەن كينوجوبالاردى جۇزەگە اسىرۋ ماسەلەلەرىن تالقىلادى.
ەستەرىڭىزگە سالا كەتەيىك، بيىل تۇركيانىڭ مادەنيەت جانە تۋريزم مينيسترلىگى العاش رەت ۇيىمداستىرعان Korkut Ata Turkic World Film Festival كينوفەستيۆالىنە 13 ەلدەن 42 كينوكارتينا قاتىستى. بايقاۋ باعدارلاماسىندا «قازاقفيلمنىڭ» تۋىندىلارى، ونىڭ ىشىندە رەجيسسەر رۇستەم ءابدىراشوۆتىڭ «قازاق حاندىعى. التىن تاق» تاريحي فيلمى، رەجيسسەر باقىت قايىربەكوۆتىڭ «وگون، مەرتسايۋشيي ۆ سوسۋدە» دەرەكتى فيلمى، رەجيسسەر اداي ابەلدينوۆتىڭ «كۇلتەگىن» تولىقمەتراجدى انيماتسيالىق فيلمى، رەجيسسەر ساتىبالدى نارىمبەتوۆتىڭ «امانات» كينوتۋىندىسى جانە ت. ب. كورسەتىلدى.
فەستيۆالدىڭ سالتاناتتى جابىلۋ ءراسىمى كەزىندە «قازاقفيلم» كينوستۋدياسى تۇركى الەمى كينەماتوگرافياسىنا قوسقان ۇلەسى ءۇشىن ارنايى سىيلىقپەن ماراپاتتالدى. كينوستۋديا پرەزيدەنتى اقان ساتايەۆقا Respect Award اتتى جۇلدەنى بەلگىلى تۇرىك اكتريساسى فاحريە ەۆدجەن تابىستادى. كەلەسى جىلى اتالعان فەستيۆال تۇركيانىڭ بۋرسا قالاسىندا وتەدى. ال 2024 -جىلى ونى قازاقستاندا وتكىزۋ جوسپارلانىپ وتىر. ق ر مادەنيەت جانە سپورت ءمينيسترى اقتوتى رايىمقۇلوۆا فەستيۆال تۇركىتىلدەس ەلدەردىڭ رۋحاني استاناسى - تۇركىستاندا وتكىزىلۋى مۇمكىن ەكەنىن اتاپ ءوتتى.
