بيىل قازاقستاندا قانشا مەكتەپ سالىنادى؟

نۇر-سۇلتان. قازاقپارات - ق ر پرەمەر-ءمينيسترى اسقار مامين مەكتەپتەردە ورىن جەتىسپەۋشىلىگى پروبلەماسىن شەشۋ، ءبىلىم ساپاسىن جاقسارتۋ ءۇشىن قانداي جۇمىس جۇرگىزىلىپ جاتقانىن ايتتى، دەپ حابارلايدى قازاقپارات ءتىلشىسى.

ب ا ق وكىلدەرىمەن كەزدەسۋ بارىسىندا اسقار مامين بۇل ماسەلەدە ەلىمىزدە ورىن الىپ جاتقان دەموگرافيالىق پروتسەستەرگە ءجىتى نازار اۋدارۋ قاجەتتىگىن باسا اتاپ ءوتتى.

«ياعني، سوڭعى 10 جىلدا تۋۋ كورسەتكىشى 2 ەسەگە ارتىپ وتىر. سوعان وراي وقۋشى ورىندارىنىڭ سانى مۇلدەم باسقاشا قالىپتاسقان. وسىعان بايلانىستى بىزگە 5 جىلدىڭ ىشىندە 1 مىڭ مەكتەپ، جىل سايىن 200 مەكتەپ سالۋ قاجەت»، - دەدى ۇكىمەت باسشىسى.

پرەمەر-ءمينيستردىڭ اتاپ وتۋىنشە، ەلىمىزدىڭ ءبىلىم سالاسى ينۆەستيتسيالىق تۇرعىدا تارتىمدى بولا تۇسۋدە.

«بيىل 160 جەكەمەنشىك مەكتەپ سالىنادى. ياعني، بۇگىندە جەكە كاپيتال كەلىپ جاتىر جانە ءبىلىم بەرۋ جوبالارىن قارجىلاندىرۋدا. ولار ءوز ينۆەستيتسيالارىن جان باسىنا قارجىلاندىرۋ ارقىلى قايتارىپ الادى. وسىنداي قارجىلىق مودەلدى قالىپتاستىرۋ ءتيىمدى بولا تۇسۋدە. مۇنداي كوپتەگەن مودەل بار. بيىل ءبىز شامامەن 300 مەكتەپتى پايدالانۋعا بەرەمىز. الدىمىزدا تۇرعان 5 جىلدىڭ ىشىندە مىڭ مەكتەپ سالۋ مىندەتىن ورىندايمىز دەپ ويلايمىن»، - دەدى ول.

وسى ورايدا اسقار مامين ءبىلىم ساپاسىن دا ەستەن شىعارماۋ قاجەتتىگىنە باسا نازار اۋدارتتى.