امەريكالىق تانىمال كومپانيا قىتايداعى جۇمىسىن توقتاتقانىن جاريالادى
قىتاي زاڭناماسىنا سايكەس، قىتايدا جۇمىس ىستەيتىن كەيبىر شەتەلدىك كومپانيالار اتالعان ەل تاراپىنداعى ورىنسىز دەپ سانالاتىن كونتەنت پەن كىلت سوزدەردى سەنزۋرالاۋعا ( تىيىم سالۋعا ) مىندەتتەلەدى.
«قىتايداعى ىسكەرلىك جانە قۇقىق تالاپتارىنىڭ كۇردەلەنە تۇسكەنىن ەسكەرە وتىرىپ، Yahoo قىزمەتتەرىنىڭ جيىنتىعى قىتايدا 1-قاراشادان باستاپ قول جەتىمدى بولمايدى»، - دەلىنگەن كومپانيا حابارلاماسىندا.
ايتا كەتەيىك، Yahoo China كومپانياسى 1999 -جىلى الەمدەگى جەتەكشى ينتەرنەت- كومپانيالاردىڭ ءبىرى بولعان كەزدە ىسكە قوسىلدى. كەيىنگى جىلدارى ءوز قىزمەتىن ەداۋىر قىسقارتتى. 2013 -جىلى Yahoo قىتايلىق ەلەكتروندى پوشتا قىزمەتىن جاۋىپ تاستادى. ەكى جىلدان كەيىن كومپانيا بەيجىڭدەگى كەڭسەسىن جاۋىپ تاستاعان ەدى.
Yahoo قىتايداعى قىزمەتىن قىسقارتقان سوڭعى امەريكالىق كومپانيا بولدى، ويتكەنى ۇكىمەت Facebook جانە Twitter سياقتى تانىمال پلاتفورمالاردى بۇعاتتاعان. سونداي-اق، وتكەن ايدا Microsoft قىتاي نارىعىندا LinkedIn-دى جاۋىپ تاستاعان بولاتىن.
الەۋمەتتىك جەلىلەر قىتايداعى ەرەجەلەرگە باعىنادى جانە ۇكىمەتتىڭ تالابىمەن قىتاي قولدانۋشىلارىنىڭ جەكە دەرەكتەرىن جىبەرۋگە مىندەتتى. سونداي-اق، پلاتفورمالار قىتايدىڭ بيلەۋشى كوممۋنيستىك پارتياسىن سىنعا العان حابارلامالاردى جويۋعا دا مىندەتتەلەدى.
