قازاقستاندا بيلىك باسىنا ايەلدەر مەن جاستار كوپتەپ كەلۋدە - گەرمانيا ەلشىسى
بۇل تۋرالى قازاقستانداعى گەرمانيانىڭ ەلشىسى مونيكا يۆەرسەن بۇگىن ەلوردادا «قازاقستان جاستارى: قۇندىلىقتاردى، بولجامداردى، تالپىنىستاردى باعالاۋ» زەرتتەۋىنىڭ قورىتىندىسىنا ارنالعان شارادا، دەپ حابارلايدى قازاقپارات ءتىلشىسى.
وتكەن جىلى «BISAM Central Asia» ورتالىعى 14 پەن 29 جاس ارالىعىنداعى جاستار اراسىندا زەرتتەۋدى باستادى.
ماقسات - قازاقستاندىق جاستاردىڭ ءومىر سالتىن زەرتتەۋ، ولاردىڭ ومىرگە دەگەن كوزقاراسىن انىقتاپ، قانداي قۇندىلىقتاردى باعالايتىنىن ءبىلۋ. سونىمەن قاتار ەلىمىزدە جاستار ساياساتىن ىلگەرىلەتۋ ماقساتىندا شەت مەملەكەتتەرمەن بىرلەسىپ ارەكەت ەتۋ.
«Shell Youth Study» اتتى نەمىس ءادىسناماسىنا سۇيەنىپ جاسالعان زەرتتەۋ گەرمانيادا 1953-جىلدان بەرى جۇرگىزىلىپ كەلەدى. ەلىمىزدەگى گەرمانيانىڭ ەلشىسى مونيكا يۆەرسەن بۇگىندە ەۋروپالىق وداق پەن ورتالىق ازيا ەلدەرى اراسىندا جاستاردىڭ ءومىر ءسۇرۋ ستاندارتىن جەتىلدىرۋگە باعىتتالعان بىرلەسكەن جۇمىس قولعا الىنعانىن ايتتى.
«كەلەر جىلى گەرمانيا مەن قازاقستان اراسىنداعى ديپلوماتيالىق بايلانىستىڭ ورناعانىنا 30 جىل تولادى. وسى ورايدا ءبىز قازاقستاندىق جاستار اراسىندا ءبىلىم بەرۋ باعدارلامالارىن اشىپ، ءتۇرلى سپورتتىق شارالار ۇيىمداستىرامىز. ءبىز نەلىكتەن جاستارعا توقتالىپ وتىرمىز؟ ويتكەنى، جاستار - مەملەكەتتىڭ بولاشاعى. مەملەكەت، قوعام، بيزنەس، ەكونوميكا بارلىعى دا سولاردىڭ قولىنا وتەدى. سوندىقتان دا جاستارمەن بىرلەسىپ جۇمىس ىستەپ، ولاردىڭ ۇنىنە قۇلاق اسۋ قاجەت-اق.
جالپى ازاماتتىق قوعامدا ادامدار ءوز ويىن ەركىن جەتكىزە الاتىنداي جاعداي جاسالۋى ءتيىس. وسى ورايدا قازاقستاننىڭ «حالىق ۇنىنە قۇلاق اساتىن مەملەكەت» اتتى تۇجىرىمداماسىن ايتىپ وتۋگە بولادى. بۇل جاڭاشىلدىق قوعاممەن قاتار ساياسات سالاسىنا دا وزگەرىستەر اكەلىپ جاتىر. سونىڭ دالەلى بۇگىندە قازاقستاندا بيلىك باسىنا ايەلدەر مەن جاستار كوپتەپ كەلۋدە»، - دەدى مونيكا يۆەرسەن ءوز سوزىندە.
ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل بىرلەسكەن جوبانى جۇزەگە اسىرۋدا شەتەلدىك سەرىكتەستەرگە العىسىن ءبىلدىردى.
«بۇل زەرتتەۋدىڭ الەۋەتى زور. قازىرگى جاستاردىڭ قانداي قۇندىلىقتاردى باعالاپ، نەنى قالايتىنىن ءبىلۋ ماڭىزدى. ف. ەبەرت اتىنداعى قورمەن بىرلەسكەن زەرتتەۋىمىزدىڭ قوعام مەن جاستار ءۇشىن بەرەرى كوپ دەگەن ۇمىتتەمىن»، - دەدى ول.
