جولاۋشىنىڭ سمارتفونىن ۇرلاعان جولسەرىك ۇستالدى
بۇل تۋرالى قازاقپارات وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ حابارلايدى.
«توبىل ستانسياسىنداعى پوليتسيا بولىمشەسىنە اقمولا وبلىسىنىڭ 45 جاستاعى تۇرعىنى جۇگىندى. ەر ادام «نۇر-سۇلتان - ورال» جولاۋشىلار پويىزىندا تەلەفونىن ۇرلاتىپ العانىن حابارلادى. ول ۇيىقتاپ جاتقاندا گادجەتتى جاستىقتىڭ استىنان سۋىرىپ اكەتكەن. جەدەل- ىزدەستىرۋ ءىس- شارالارى كەزىندە كولىك پوليتسياسى قىزمەتكەرلەرى اتالعان پويىز ۆاگوندارىنىڭ ءبىرىنىڭ جولسەرىگىن ۇستادى. 26 جاستاعى جولسەرىك جولاۋشىنىڭ ماس جاتقانىن پايدالانىپ، قىمبات ماركالى ۇيالى تەلەفوندى ۇرلاپ كەتكەنى بەلگىلى بولدى. شىعىن شامامەن 100 مىڭ تەڭگەنى قۇرادى»، - دەپ جازادى دەپارتامەنتتىڭ باسپا ءسوز قىزمەتى.
ساقشىلاردىڭ ايتۋىنا قاراعاندا، كۇدىكتى جولسەرىك العاشىندا ىزدەستىرۋ شارالارىنا «بەلسەندى كومەك» كورسەتكەن.
«سوتقا دەيىنگى تەرگەۋ بارىسىندا جابىرلەنۋشى جولسەرىكپەن مامىلەگە كەلىپ، ۇرلانعان تەلەفونىن قايتارىپ الدى. وسىلايشا قىلمىستىق ءىس توقتاتىلدى. ال جولسەرىكتىڭ جۇمىس بەرۋشىسىنە ونى تارتىپتىك جاۋاپكەرشىلىككە تارتۋ جانە پويىز بريگادالارىنىڭ باستىقتارىمەن ءتۇسىندىرۋ جۇمىستارىن جۇرگىزۋ تۋرالى ۇسىنىس جىبەرىلدى»، - دەلىنگەن دەپارتامەنتتىڭ دەرەگىندە.
اۆتور: ەسىمجان ناقتىباي
