پاندەميا مۇسىلمان الەمىن ودان سايىن بىرىكتىرە ءتۇستى
«كەز كەلگەن ءداستۇرلى ءدىن حالىقتى ادامگەرشىلىك پەن ىزگىلىككە ۇندەيدى. ءدىن - ادامدىق قاسيەتتى قالىپتاستىراتىن تەڭدەسسىز تاربيە مەكتەبى. دەمەك، ءبىز ءدىننىڭ وسىناۋ قۋاتتى كۇشىن ادامدار اراسىنداعى دوستىق، ءوزارا سىيلاستىق پەن قۇرمەتتى ارتتىرۋعا باعىتتاۋىمىز كەرەك. الەمدىك جانە ءداستۇرلى ءدىن ليدەرلەرى سەزىنىڭ باستاماشىسى قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ: «حالىقتاردى ءبىر-بىرىنەن بولەتىن تەڭىزدەر ەمەس، ناداندىق پەن تىلدەردىڭ بولەكتىگى دە ەمەس، ارازدىق قانا. دوستىق جوق جەردە ارازدىققا مۇمكىندىك مول بولماق» دەگەن سوزىندە ۇلكەن ماعىنا جاتىر.
پرەزيدەنتىمىز قاسىم-جومارت كەمەل ۇلى توقايەۆ حالىققا جولداۋىندا: «قوعامداعى بىرلىك پەن كەلىسىمدى كوزدىڭ قاراشىعىنداي ساقتاۋىمىز كەرەك. ەتنوسارالىق جانە كونفەسسياارالىق قاتىناستىڭ قانشالىقتى ماڭىزدى ەكەنىن بارلىق ازاماتىمىز ءتۇسىنۋ قاجەت. ءبىز قاشان دا الاۋىزدىققا قارسى تۇرا بىلگەن ەلمىز» دەپ اتاپ ءوتتى. راسىندا، ءبىز بەيبىتسۇيگىش حالىقپىز جانە الەم حالقىن بەيبىت ءومىر سۇرۋگە ۇندەيمىز. ەلىمىزدە تۇراقتى تۇردە ءوتىپ كەلە جاتقان الەمدىك جانە ءداستۇرلى ءدىن ليدەرلەرىنىڭ سەزى وسىعان دالەل»، - دەدى باس ءمۇفتي.
ونىڭ اتاپ وتۋىنشە، الەمدى جايلاعان پاندەميالىق احۋال كوپتەگەن ورتاق يگى ءىس-شارالاردىڭ وتۋىنە توسقاۋىل بولدى. الايدا بۇل سىناق مۇسىلمان الەمىن ودان سايىن بىرىكتىرە ءتۇستى.
«ءبىز الەمنىڭ ءدىن كوشباسشىلارىنا «ءبىز - بىرگەمىز، تىلەگىمىز - ورتاق» دەگەن يگى نيەتپەن ۇندەۋ جولداپ، جۇما كۇنى ءبىر مەزەتتە دۇعا جاساۋعا شاقىردىق. ۇندەۋگە ءبىرقاتار مۇسىلمان ەلدەرى قولداۋ ءبىلدىرىپ، ونلاين رەجيمدە دۇعا جاساۋ راسىمىنە قاتىستى. وسى ءساتتى پايدالانىپ، ءدىن كوشباسشىلارىنا تاعى دا اللا رازى بولسىن ايتامىن. بۇل باستاما ءدىن قايراتكەرلەرىن ورتاق ماقساتقا جۇمىلدىردى»، - دەدى ناۋرىزباي قاجى تاعان ۇلى.
