قازاقستاندا ديزەل وتىنى قىمباتتادى

نۇر-سۇلتان. قازاقپارات - جازعى ديزەل وتىنى ءبىر جىل ىشىندە سەگىز پايىزعا قىمباتتادى.

بۇل - ديزەل وتىنى تاپشىلىعىنا دەيىنگى جاعداي. جانارماي تاپشىلىعى رەسەيدەن جەتكىزىلگەن ءونىم ەسەبىنەن وتەلەدى، باعا رەسەيدەگى كوتەرمە باعاعا بايلانىستى، - دەپ حابارلايدى Energyprom.kz.

بيىل تامىزداعى قورىتىندى بويىنشا، جازعى ديزەل وتىنىنىڭ باعاسى جىلىنا 8,1 پايىزعا - ليترىنە 199 تەڭگەگە دەيىن وسكەن.

قازاقستاننىڭ ءىرى قالالارى مەن مەگاپوليستەرىنىڭ ىشىندە جازعى ديزەل وتىنىنىڭ ەڭ قىمبات كورسەتكىشى قوستانايدا بولدى (215 تەڭگە)، ەڭ ارزانى - تاراز بەن سەمەيدە (195 تەڭگە).

قوستاناي (14,1 پايىزعا)، باتىس قازاقستان (11,9 پايىزعا) جانە سولتۇستىك قازاقستان (10,6 پايىزعا) وبلىستارىنىڭ تۇرعىندارىنا قىمباتشىلىق قيىندىق تۋدىردى. باعانىڭ ەڭ از ءوسۋى شىعىس قازاقستان وبلىسىندا تىركەلدى (جىلىنا 5,8 پايىزعا).

2021 -جىلدىڭ قاڭتار- تامىزىندا ەلىمىزدە 3,4 ميلليون توننا ديزەل وتىنى ءوندىرىلدى، بۇل بىلتىرعىمەن سالىستىرعاندا 8,2 پايىزعا كوپ. ەڭ ءىرى ءوندىرىس كولەمى پاۆلودار (1,3 ميلليون توننا، جىلىنا 25,3 پايىز) جانە اتىراۋ (1 ميلليون توننا، پليۋس 1,3 پايىز) وبلىستارىندا. 2020 -جىلى رەسپۋبليكادا وتىن ءوندىرۋ 7,1 پايىزعا، 4,7 ميلليونعا تومەندەدى.

ءوندىرىس كولەمى وسۋىنە قاراماستان، رەسپۋبليكادا ديزەل وتىنى جەتىسپەۋشىلىگى بايقالادى. ەنەرگەتيكا ۆيتسە- ءمينيسترى اسەت ماعاۋوۆ ورتالىق كوممۋنيكاتسيالار قىزمەتىندە وتكەن بريفينگتە بيىل ديزەل وتىنىن ءوندىرۋ كولەمى 4,9 ميلليون تونناعا جەتەتىنىن، بۇل جوعارى كورسەتكىش ەكەنىن، ءبىراق سۇرانىس تا سوعان ساي رەكوردتىق كورسەتكىشتە ەكەنىن ايتتى.

«ءبىزدىڭ ەسەپتەۋىمىز بويىنشا، سۇرانىس ايىنا شامامەن 50-60 مىڭ تونناعا ءوستى. قانشا ديزەل وندىرسەك تە، سۇرانىس ءوسىپ جاتىر. مامىر- قىركۇيەكتە ديزەل وتىنىنا سۇرانىس 2019 -جىلمەن سالىستىرعاندا 260 مىڭ تونناعا جانە بىلتىرمەن سالىستىرعاندا 480 مىڭ تونناعا ءوستى. تامىزدا 519 مىڭ توننا ديزەل وتىنى جۇمسالدى. بۇرىن مۇنداي بولماعان. قور ازايىپ جاتىر. ديزەل وتىنىن ەكسپورتتاۋ ناۋرىزدا، بەنزين قاڭتاردا توقتاتىلدى»، - دەدى ۆيتسە- مينيستر.

قازاقستاندىق وتىن وتە ارزان، سوندىقتان شەكارا ماڭىنداعى وڭىرلەردە دە ساتىلىپ جاتىر.

«ءبىزدىڭ باعالاۋىمىز بويىنشا، نەگىزگى سەبەپ ديزەل وتىنى باعاسىنىڭ ايتارلىقتاي ايىرماشىلىعىنان بولىپ وتىر. ءىرى ج ق س- دە شامامەن ليترىنە 207-208 تەڭگە، قالعان جەلىلەردە - 230-240 تەڭگە. جىل باسىنان بەرى ليترىنە 200 تەڭگە بولدى. سالىستىرىپ قاراساق، رەسەي فەدەراتسياسىمەن ليترىنە 100 تەڭگەگە، وزبەكستانمەن - 70-80 تەڭگەگە، قىرعىز رەسپۋبليكاسىمەن - 61 تەڭگەگە ايىرماشىلىق بار. سونىمەن قاتار، ترانزيتتىك اعىمدار قازاقستان شەكارالارىندا جانارماي قۇيىپ الۋعا تىرىسادى»، - دەپ ءتۇسىندىردى ماعاۋوۆ.

پ م ح ز- داعى جوندەۋگە بايلانىستى جانارماي رەسەيدەن جەتكىزىلەدى. يمپورتتالاتىن گازويل باعاسى رەسەي فەدەراتسياسىنداعى كوتەرمە باعاعا بايلانىستى بولادى.

ەسكە سالايىق، ديزەل وتىنى تاپشىلىعى كوپتەگەن وڭىرلەردە بايقالدى، ديزەل تەك تالون بويىنشا بەرىلدى. تاپشىلىققا بايلانىستى پاۆلودار وبلىسىندا م ح ز جوندەۋ جۇمىستارى كەيىنگە قالدى.