قازاقستاندىق جاس عالىمدار جاساندى سپۋتنيك كونسترۋكتورلارىن ويلاپ تاپتى
جەردىڭ كىشى جاساندى سپۋتنيكتەرىنىڭ يننوۆاتسيالىق كونسترۋكتورلارىن ءال- فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى ويلاپ تاپتى. قۇرىلعى وقۋشىلار مەن ستۋدەنتتەردى عارىشتىق اپپاراتتى جوبالاۋ جانە قۇراستىرۋ نەگىزدەرىنە ۇيرەتۋگە ارنالعان. جابدىق مەملەكەتتىك تىلدە باعدارلامالىق قامتاماسىز ەتۋمەن جانە قاجەتتى ادىستەمەلىك ماتەريالدارمەن جاراقتالعان.
ەستەرىڭىزگە سالا كەتەيىك، بۇعان دەيىن يلون ماسك كومپانياسى ج و و عالىمدارى ازىرلەگەن «Al-Farabi -2» نانوسپۋتنيگىن ىسكە قوسقان بولاتىن.
«كونسترۋكتورمەن جۇمىس ىستەۋ بارىسىندا ءبىلىم الۋشىلاردىڭ تەحنولوگيا سالاسىنداعى داعدىلارى داميدى. ولار وسى عارىش اپپاراتىن جوبالاۋدا پراكتيكالىق ءبىلىم الادى. كونسترۋكتوردىڭ كومەگىمەن وقۋشى نەمەسە ستۋدەنت ءوز نانوسپۋتنيگىن جيناپ، ونى گەليي شارىنىڭ كومەگىمەن ستراتوسفەراعا جىبەرە الادى. 2017 -جىلى قازۇۋ- دىڭ «Al-Farabi -2» العاشقى نانوسپۋتنيگى عارىشقا ۇشىرىلعانىن اتاپ وتكىم كەلەدى. 2018 -جىلى يلون ماسك كومپانياسى ءبىزدىڭ ۋنيۆەرسيتەتتە قۇرىلعان «Al-Farabi -2» ەكىنشى نانوسپۋتنيگىن ىسكە قوستى»، - دەدى ءال- فارابي اتىنداعى قازۇۋ عىلىمي- تەحنولوگيالىق پاركىنىڭ ديرەكتورى ءامىرحان تەمىربايەۆ.
سونداي- اق قازۇۋ عالىمدارى فيزيكا زاڭدارىن زەرتتەۋ ءۇشىن موبيلدى اپپاراتتىق- باعدارلامالىق كەشەن قۇردى. جابدىقتىڭ كومەگىمەن ءارتۇرلى زەرتحانالىق جۇمىستاردى جۇرگىزۋگە بولادى. كەشەن باسقا جابدىقتارمەن سالىستىرعاندا ءبىرقاتار ارتىقشىلىققا يە. موبيلدى اپپاراتتىق- باعدارلامالىق كەشەن ىقشام جانە موبيلدى: بۇكىل كەشەن پورتاتيۆتى چەمودانعا سالىنىپ، باتارەيامەن جۇمىس ىستەيدى.
د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ عالىمدارى مەديتسينالىق يمپلانتانت ۇلگىلەرىن شىعارۋ بويىنشا تاجىريبەلىك- ونەركاسىپتىك ۋچاسكى قۇردى. ونىمدەر جەرگىلىكتى شيكىزات - جوعارى ساپالى تيتاننان جاسالعان. جوبا جوعارى تەحنولوگيالىق سالانىڭ يمپورتىن الماستىرۋعا باعىتتالعان. وتاندىق يمپلانتتار وزىندىك قۇنى بويىنشا ايتارلىقتاي تومەن، ياعني ازاماتتاردىڭ الەۋمەتتىك وسال ساناتتارىنا قولجەتىمدى.
«ءبىز تراۆماتولوگيا جانە ورتوپەديا عىلىمي- زەرتتەۋ ينستيتۋتىنىڭ عالىمدارىمەن بىرلەسە سىنىقتارعا ارنالعان 12-دەن استام سۇرانىسقا يە يمپلانتاتتى انىقتادىق. ءبىز جاساعان يننوۆاتسيالىق تيتان كەيدجدەرى ومىرتقا ارالىق ديسكىلەردى اۋىستىرۋ ءۇشىن قولدانىلادى. ولار قۇرىلىمى مەن قاسيەتى بويىنشا بارىنشا ادام سۇيەگىنە ۇقساس. ءبىز يمپلانتاتتاردى 3D- پرينتەردە باسىپ شىعارامىز، قازىر تاجىريبەلى ۇلگىلەر كلينيكالىق سىناقتاردان ءوتىپ جاتىر. تيتان يمپلانتتارىنىڭ ادام اعزاسىنا تەز بەيىمدەلەتىنى بايقالادى»، - دەدى د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىندەگى ورتالىقتىڭ عىلىمي قىزمەتكەرى، PhD دوكتور باعدات ازاماتوۆ.
Dulaty University ستۋدەنتتەرى ينسۋلت العان ناۋقاستاردى وڭالتۋعا ارنالعان يننوۆاتسيالىق ترەناجەرلەر ويلاپ تاپتى.
«ءبىز الدىمىزعا ينسۋلتپەن اۋىراتىن ناۋقاستاردى وڭالتۋعا ارنالعان ارزان ءارى ءتيىمدى ترەناجەردى ازىرلەۋ مىندەتىن قويدىق. ديزايننىڭ ىڭعايلى ەتىپ جاسالۋىنا بايلانىستى ترەناجەرلەردى ءارتۇرلى بۇلشىقەت توپتارىنا جاتتىعۋلار جاساۋ ءۇشىن قولدانۋعا بولادى. ءسىز جۇكتەمە دارەجەسىن جانە سەرىپپەلەردىڭ كەرنەۋىن وزگەرتە الاسىز. سونداي- اق ترەناجەرلاردىڭ كومەگىمەن ينسۋلت العان ناۋقاستاردى وڭالتۋ ءۇردىسىن ايتارلىقتاي تەزدەتەتىن جەكە كۋرستار ۇيىمداستىرۋعا بولادى. وتاندىق ترەناجەرلاردىڭ تاعى ءبىر ارتىقشىلىعى - ولاردىڭ ىڭعايلىلىعى. ترەناجەرلەر مەتالدان، اعاشتان جانە بىلعارىدان جاسالعان. سوندىقتان ولار بەرىكتىگى جوعارى جانە توزۋعا ءتوزىمدى»، - دەدى ازىرلەۋشىلەردىڭ ءبىرى، جاس عالىم الەكساندر سكالكين.
